Արտահանման ու ներմուծման ծավալների աճ հայ–չինական առևտրային հարաբերություններում

Նախորդ շաբաթ Չինաստանի Ցինտաո քաղաքում ՀՀ դեսպան Սերգեյ Մանասարյանի և ՉԺՀ–ում ՀՀ առևտրային կցորդ Հրանտ Աբաջյանի մասնակցությամբ տեղի ունեցավ ՀՀ համագործակցության գրասենյակի բացումը, գրում է «Փաստ» օրաթերթը:

«Մեկ գոտի, մեկ ճանապարհ ինովացիոն համագործակցության կենտրոնի» կողմից ֆինանսավորվող գրասենյակի ներքո հայ գործարարները հնարավորություն կստանան հիմնելու իրենց ձեռնարկությունների ներկայացուցչությունները: Գրասենյակը զբաղվելու է չինական շուկայում հայկական ապրանքների և ծառայությունների ներկայացմամբ և իրացմամբ, զբոսաշրջության խթանմամբ և հայ–չինական գործարար կապերի ստեղծմամբ: Ցինտաո քաղաքի գրասենյակի գործառույթներն իրականացվելու են ՀՀ առևտրաարդյունաբերական պալատի և Արդյունաբերողների և գործարարների միության կողմից:

Համագործակցության գրասենյակին անհատույց տրամադրված ընդհանուր տարածքը կազմում է 500 քմ, որն ապագայում, անհրաժեշտության դեպքում, կարող է ընդլայնվել:
Այս լուրից հետո «Փաստին» հետաքրքրեց, թե հայ–չինական առևտրային հարաբերություններն ի՞նչ մակարդակի վրա են գտնվում, հայկական ո՞ր ապրանքներն են հետաքրքրում չինացի սպառողներին և առհասարակ նման գրասենյակի բացումը ի՞նչ նոր դռներ կարող է բացել հայ գործարարների առջև:

Տնտեսական զարգացման և ներդրումների նախարարության մամուլի ծառայությունից մեզ տեղեկացրին, որ ՀՀ առևտրաշրջանառությունը Չինաստանի հետ 2017 թ. հունվար–սեպտեմբերին կազմել է 417,6 միլիոն ԱՄՆ դոլար, ինչը նախորդ տարվա նույն ժամանակահատվածի համեմատ աճել է 33,3%–ով: Արտահանումը Հայաստանից Չինաստան նախորդ տարվա նույն ժամանակահատվածի համեմատ նույնպես աճել է, այս անգամ՝ 15%–ով: Այս համապատկերում աճել է նաև ներմուծումը Չինաստանից Հայաստան: Ըստ ծագման երկրի հատկանիշի՝ այն կազմել է 338,6 միլիոն ԱՄՆ դոլար, ինչը նախորդ տարվա նույն ժամանակահատվածի համեմատ ավելացել է 38%–ով:
«Փաստի» հարցմանն ի պատասխան՝ նախարարությունից հայտնել են, որ դեպի Չինաստան Հայաստանից արտահանվում է հանքահումքային արտադրանք՝ թանկարժեք (ոչ ադամանդ) և կիսաթանկարժեք քարեր ու մետաղներ, կոնյակ, գինի, գարեջուր, հանքային ջրեր և այլն։

ՀՀ համագործակցության գրասենյակի բացման նպատակով «Մեկ գոտի, մեկ ճանապարհ» ինովացիոն համագործակցության կենտրոնի հետ բանակցությունները տևել են մոտ կես տարի: Գրասենյակի գործառույթները տարածվելու են Չինաստանի հյուսիսային հատվածում՝ ընդգրկելով 19 նահանգներ: Այս գրասենյակի ներքո հայ գործարարները հնարավորություն են ստանում հիմնելու իրենց ձեռնարկությունների ներկայացուցչությունները: Այն կզբաղվի չինական շուկայում հայկական ապրանքների և ծառայությունների ներկայացմամբ և իրացմամբ, դեպի Հայաստան ներգնա զբոսաշրջության խթանմամբ և հայ–չինական գործարար կապերի հիմնմամբ և ամրապնդմամբ:

Ավելի վաղ՝ այս տարվա հունիսին, Նինգբո քաղաքում բացվել էր ՀՀ Առևտրաարդյունաբերության պալատի ներկայացուցչություն, որի նպատակն է խթանել երկու երկրների միջև առևտրաշրջանառության աճը։ Պաշտոնապես գործում է նաև Հայաստանի ազգային տաղավարը, որը զբաղվում է Չինաստանում հայկական ալկոհոլային և ոչ ալկոհոլային խմիչքների և տարատեսակ ջրերի ներկայացմամբ և վաճառքով:

Նախարարության լրատվական ծառայության փոխանցմամբ՝ ՉԺՀ–ում ՀՀ առևտրային ներկայացուցչության կողմից պարբերաբար իրականացվում են Հայաստանի ներդրումային միջավայրի, գրավչությունների և պոտենցիալ ներդրումային ծրագրերի իրազեկման միջոցառումներ։

Ներկայում տեղի են ունենում անհատական հանդիպումներ և բանակցություններ ավելի քան 10 չինական պետական և մասնավոր կառույցների և ընկերությունների հետ, ինչի մասին «Փաստին» արդեն հայտնեց ՉԺՀ–ում ՀՀ առևտրային կցորդ Հրանտ Աբաջյանը:

Քրիստինա Տեր-Մաթևոսյան