ԱԺ մշտական հանձնաժողովում բնության հատուկ պահպանվող տարածքների վերաբերյալ լսումներ են անցկացվել

 ՀՀ ԱԺ տարածքային կառավարման, տեղական ինքնակառավարման, գյուղատնտեսության և բնապահպանության հարցերի մշտական հանձնաժողովի նախաձեռնությամբ  տեղի են ունեցել «ՀՀ բնության հատուկ պահպանվող տարածքների առկա վիճակը, հիմնախնդիրները և լուծման ուղղությունները»  թեմայով խորհրդարանական լսումները: Ինչպես «Արմենպրես»-ին տեղեկացրին ՀՀ բնապահպանության նախարարության տեղեկատվության և հասարակայնության հետ կապերի վարչությունից, լսումներին մասնակցել են ԱԺ պատգամավորներ, պատասխանատու պետական և իրավապահ մարմինների, հասարակական, գիտական, միջազգային կազմակերպությունների ներկայացուցիչներ, տեղեկատվական տեխնոլոգիայի ոլորտի ընկերությունների մասնագետներ:

Տալով լսումների մեկնարկը` Տարածքային կառավարման, տեղական ինքնակառավարման, գյուղատնտեսության և բնապահպանության հարցերի մշտական հանձնաժողովի նախագահ Վարդևան Գրիգորյանն ընդգծել է բնության հատուկ պահպանվող տարածքների/ԲՀՊՏ/ նշանակությունը և կարևորել այնտեղ առկա խնդիրների լուծումը, ինչ նպատակով էլ հրավիրվել են լսումները:

ՀՀ բնապահպանության նախարար Արծվիկ Մինասյանը հրավիրված լսումները նշանավորել է երկու առումով` առաջին, որ օրենսդիր մարմինը լիարժեք տեղեկացված լինի ՀՀ կառավարության կողմից բնապահպանության ոլորտում իրականացվող քաղաքականության մասին և անհրաժեշտության դեպքում  օրենսդրական կարգավորումները պատշաճ տեսքի բերելու և երկրորդ` հանրության լայն շերտերի ներգրավումն է այն կարևոր հարցերի մեջ, որոնք են ԲՀՊՏ-ների ընկալումը, պահպանման խնդիրները, սերունդների համերաշխության սկզբունքի իրագործումը: «Համաշխարհային առաջադեմ փորձը բնության հատուկ պահպանվող տարածքները դիտարկում է որպես մի կենսամիջավայր, որտեղ իրականացվում է, ոչ միայն պահպանության գործառույթ, այլ այն ունի հստակ տնտեսական և սոցիալական դրսևորում, իսկ տնտեսական և սոցիալական շահը կարող է ապահովվել, եթե իրականացվի դրանց պատշաճ պահպանություն»,- նշել է բնապահպանության նախարարը և հավելել, որ այս հիմնարար մոտեցումը հակադրվում է անցումնային տնտեսություն ունեցող երկրներում երկար տարիներ գերակայող բնությունը շահագործելու գործընթացին և ներկայում առաջնային է համարվում շրջակա միջավայրի պահպանությամբ`  տնտեսական և սոցիալական արժեքներ  ստեղծելու քաղաքականությունը: Ըստ բնապահպանության նախարարի, այն այն երկրները, որոնք բնական ռեսուրսները օգտագործել են կայուն` ոչ սպառողական սկզբունքով, ապահովել են տնտեսության էական և կայուն աճ և ՀՀ կառավարության վարած ռեսուրսների կայուն օգտագործման քաղաքականությունը նաև սահմանադրական նորմի իրացում է: Նկատելով, որ այսօր Հայաստանի տարածքի 13.1 տոկոսն են կազմում ԲՀՊՏ-ները` Ա. Մինասյանը տեղեկացրել է, որ աշխատանքներ են իրականացվում ոչ միայն այդ տարածքները ընդլայնելու, այլ նաև դրանց պահպանության ուժեղացման և կանոնավոր դարձնելու ուղղությամբ:

Լսումներին ելույթներով հանդես են եկել ՀՀ ԲՆ կենսառեսուրսների կառավարման գործակալության բնության հատուկ պահպանվող տարածքների և դենդրոպարկերի կառավարման բաժնի պետ Ա. Աղասյանը, ՀՀ գյուղատնտեսության նախարարության «Հայանտառ» ՊՈԱԿ-ի տնօրենի առաջին տեղակալ, գլխավոր անտառապետ Ռուբեն Պետրոսյանը և Բնության համաշխարհային հիմնադրամի հայաստանյան գրասենյակի տնօրեն Կարեն Մանվելյանը: Վերջիններս պատասխանել են նաև պատգամավորների, հասարակական և գիտական կազմակերպությունների  ներկայացուցիչների հարցերին:

Ելույթներով հանդես են եկել ԱԺ նախագահի տեղակալ Միքայել Մելքումյանը, Գիտության, կրթության, մշակույթի, երիտասարդության եւ սպորտի հարցերի մշտական հանձնաժողովի նախագահ Վարդան Բոստանջյանը, պատգամավորներ Լենա Նազարյանը, Սերգեյ Բագրատյանը, Տարածքային կառավարման,տեղական ինքնակառավարման, գյուղատնտեսության և բնապահպանության հարցերի մշտական հանձնաժողովի նախագահի տեղակալ Արաիկ Հովհաննիսյանը, ՀՀ բնապահպանության նախարարի տեղակալ Խաչիկ Հակոբյանը, նախարարության պատասխանատու ստորաբաժանումների ղեկավարներ, հասարակական և գիտական  կազմակերպությունների ներկայացուցիչներ:

Քննչական կոմիտեի վերահսկողության գլխավոր վարչության  պետ Թաթուլ Պողոսյանը  ներկայացրել է երկու տարվա ընթացքում բնապահպանական նորմերի խախտման դեպքերով հարուցված գործերի արդյունքները և շեշտել հանցագործությունները կանխարգելելու ուղղությամբ աշխատանք տանելու անհրաժեշտությունը, քանի որ  գործերի ընթացքը ցույց է տալիս, որ հասցված վնասներն անվերականգնելի են:

Իր եզրափակիչ ելույթում Արծվիկ Մինասյանը  կարևորել է օրենսդիրի ներկայացուցիչների կողմից լսումների ժամանակ բարձրացված հարցերի պատասխանները և լուծումները ստանալու հարցում հետևողական լինելը, ինչում շահագրգռված է բնապահպանական գերատեսչությունը, և պարզաբանումներ ներկայացրել հնչած որոշ հարցադրումների վերաբերյալ: