ՀՀ քաղաքական կյանքում վակուում է, որը կարող է նոր, ավելի լուրջ քաղաքական հարթակ ձևավորելու նախադրյալ լինել. Դ. Սանասարյան

Ներքաղաքական իրավիճակի, ընդդիմադիր դաշտի պասիվության և քաղաքական կյանքում հնարավոր զարգացումների մասին Tert.am-ը զրուցել է ընդդիմադիր քաղաքական գործիչ, «Ժառանգություն» կուսակցության անդամ Դավիթ Սանասարյանի հետ: 

-Պարո՛ն Սանասարյան, ինչո՞վ եք պայմանավորում ընդդիմադիր դաշտի պասիվությունը: 2016թ. ապրիլի 2-ի խորհրդարանական ընտրություններից հետո ընդդիմադիր կուսակցությունները պաստիվ են, գրեթե ոչ մի նախաձեռնությամբ հանդես չեն գալիս:

- Եթե առհասարակ նայենք քաղաքական դաշտի ակտիվությունների ցիկլին, ապա հիմնականում ակտիվություն տեղի է ունենում ընտրություններից առաջ և հետընտրական պրոցեսներում: Հայաստանում քաղաքական դաշտն առհասարակ ճգնաժամի մեջ է՝ և ընդդիմությունը, և իշխանությունը, որը ես որոշակի օրինաչափ եմ համարում: Հույս ունեմ, որ այս ամեն ինչը հիմք է դառնալու նոր, ավելի լուրջ քաղաքական հարթակ ձևավորելու, սա լավ նախադրյալ կարող է լինել: Այսինքն՝ վակուում է ստեղծված, որը չի կարող երկար ժամանակ շարունակվել, և անկախ ամեն ինչից սկսվելու է նոր պրպտումներ, նոր պրոցեսներ, որ այս վիճակից դուրս գանք: Իսկ քաղաքական դաշտի ճգնաժամը բառացիորեն կապված է երկրի առօրյա կյանքի հետ և նշանակում է, որ երկիրն է ճգնաժամի մեջ: 

- Նշեցիք, որ քաղաքական դաշտում ակտիվություն է լինում ընտրություններից առաջ և հետո, բայց ապրիլի 2-ի ընտրություններին չհետևեցին հետընտրական գործընթացները:

- Գիտե՞ք ինչի համար, որովհետև իշխանությունները փոխեցին խաղի կանոնները, տրամաբանությունը: Տեսեք, նախագահական ընտրությունների ժամանակ, կոպիտ ասած, ժողովուրդը բաժանվում էր երկու գույնի՝ սևի և սպիտակի, և կռիվը նրանց միջև էր տեղի ունենում: Իսկ խորհրդարանական ընտրությունների ժամանակ այդ սևն ու սպիտակը շատ հեղհեղուկ էր, այսպես ասած ցիրուցան եղած էր և չկար միաբանված պայքար, դրա համար մենք ունեցանք այս իրավիճակը: Կարծում եմ՝ սա լուրջ դաս կլինի հետագայում մեր քաղաքական ուժերի համար, որ իրենց դիրքավորումը, պայքարի մարտավարությունն այլ ձև մշակեն:  

- Ձեր ասած ճգնաժամային իրավիճակից նոր, ավելի մեծ թափով փոփոխությունը հնարավո՞ր է, որ «Ժառանգությունը» նախաձեռնի:

- Այդ հարցով պետք է խոսեք «Ժառանգության» ղեկավար մարմնի ներկայացուցիչների հետ: Ես այդ մարմիններից որևէ մեկի մեջ չկամ, շարքային կուսակցական եմ: Կուսակցության անունից ես չեմ կարող որևիցե բան ասել:

-Իսկ ընդհանրապես, ի՞նչ փոփոխություններ պետք է արվեն ընդդիմադիր դաշտում, որպեսզի Ձեր նշած ճգնաժամից  դուրս գալու ավելի մեծ հնարավորությունն օգտագործվի: 

-Պետք է խնդիրը հստակ ձևակերպել, հետո ասել, թե խնդրի լուծումը ինչպես են պատկերացնում: Խնդիրը ձևակերպելը հետևյալն է՝ կա իշխանություն, որը տարիներ շարունակ իշխանությունը բռնազավթել է, որևիցե ձևով չի թողնում, որպեսզի օրինական ճանապարհով մեկ այլ ուժ գա իշխանության: Մենք գիտենք, որ նախագահի թեկնածուներ են եղել, որում իշխանության հաղթանակը չի եղել: Ես ավելի շատ հակված եմ, որ դա ընդդիմության հաղթանակն է եղել, ուղղակի ընտրության արդյունքները փոխվել են: Տարիներ շարունակ այս է տեղի ունենում, տարիներ շարունակ կոռոզիայի է ենթարկվում քաղաքական դաշտը և սա լրջագույն խնդիր է:

-Եթե ընտրական գործընթացներով հնարավոր չէ փոփոխության հասնել, այդ դեպքում ի՞նչ պետք է արվի: 

-Դրա համար պետք է ընդվզում, որի արդյունքում իշխանությունը կբերվի իրավական դաշտ և իշխանությունը ժողովրդին վերադարձնելու իրավական պրոցեսը տեղի կունենա: Կձևավորվի ժամանակավոր կառավարություն, նոր իշխանությունների ընտրություն և երկիրը կգնա բնականոն հունով: Անկախությունից ի վեր մենք սրանք ենք ձգտում:

-Ժողովուրդն էլ ընտրություններից հետո կարծես հույսը կորցրած վիճակում է, մարդիկ արտագաղթում են: Ինչպե՞ս պետք է ընդվզում լինի:

- Հույսը չի կորել: Ուղղակի ժողովրդի շահի դեմ երկար ժամանակ կամային գործողության է եղել: Այս երկարատև պայքարի ընթացքում մարդիկ փորձել են մի բան անել, հետո բիրտ ուժ է կիրառվել նրանց նկատմամբ: Սրանում իրենց մեղքն են ունեցել նաև ընդդիմադիրները, բայց հիմնական մեղքը իշխանությանն է: 

-Այսինքն, դուք հավատո՞ւմ եք, որ ժողովուրդը ոտքի կկանգնի: 

-Այո՛, ուղղակի պետք է ժողովրդին ճիշտ առաջարկ արվի:

-Ո՞վ պետք է նման առաջարկ անի:

-Ովքեր որ իրենց վրա պատասխանատվությունը կվերցնեն ընդդիմադիր դաշտից:

-Նման ուժ հիմա Հայաստանում կա՞:

-Այս պահի դրությամբ նման ուժ չկա, որը պատրաստ է իշխանությանը ձեռնոց նետել: Բայց կարող եմ ասել, որ այս պահին ձևավորվել է «Հանուն Հայաստան պետության» ճակատը, որի ներկայացուցիչն եմ նաև ես, և որը փորձում է իր գործունեությունն այնպես մշակել, որ ժողովրդին այդ ճիշտ առաջարկը ներկայացնի:

-Ձեր պայքարն ի՞նչ հաջողություն կարող է գրանցել:

-Ընթացքը ցույց կտա, մենք հիմա կոնկրետ աշխատանքներ ենք տանում: