Հրանուշ Հակոբյանը հանդիպել է Լիոնի եւ Դեսինի քաղաքապետներին

ՀՀ սփյուռքի նախարար Հրանուշ Հակոբյանը Ֆրանսիայի Հանրապետություն կատարած այցի շրջանակներում հանդիպել է Լիոնի քաղաքապետ Գևորգ (Ժորժ) Կեպենեկյանին, տեղեկացնում է ՀՀ սփյուռքի նախարարությունը:

Հանդիպման ընթացքում կարևորվել են հայ-ֆրանսիական հարաբերությունները, քննարկվել է հատկապես 2018թ. հոկտեմբերին տեղի ունենալիք ֆրանկոֆոնիայի գագաթաժողովի անցկացման հետ կապված հարցեր, որին նախատեսվում է Ֆրանսիայի նախագահ Էմանուել Մակրոնի մասնակցությունը:

Լիոնի քաղաքապետը և Հայաստանի սփյուռքի նախարարը քննարկել են մարտ ամսին Գևորգ Կեպենեկյանի՝ Հայաստան կատարելիք հնարավոր այցի մանրամասները: Նախարարը և Լիոնի քաղաքապետը արծարծել են կրթության, ճարտարապետության, բժշկության ոլորտների հարցեր: Առանձնահատուկ կարևորվել է բարձր տեխնոլոգիաների շուրջ համագործակցությունը՝ մատնանշելով Երևանում գործող Թումո ստեղծարար տեխնոլոգիաների կենտրոնի առկայությունը:

Կողմերը անդրադարձել են նաև Հայաստան-սփյուռք գործակցության զարգացման հեռանկարներին, համայնքի ակտիվությանը, հայկական դպրոցներում հայոց լեզվի ժամաքանակի ավելացման խնդիրներին, հայկական մշակութային տների և հայ առաքելական եկեղեցու գործունեությանը վերաբերող հարցերին: Կարևորվել են շախմատի մասնագետների գործուղումը Լիոն, ինչպես նաև Ֆրանսիայում շախմատի տարածման խնդիրները: Պետք է նշել, որ շախմատի դասընթացներ կազմակերպվում են Լիոնի հայկական եկեղեցուն կից սրահում: Հանդիպման ավարտին նախարար Հակոբյանը նախարարության ոսկե հուշամեդալով պարգևատրեց Գևորգ (ժորժ) Կեպենեկյանին:

Հանդիպումից հետո նախարարը և Լիոնի քաղաքապետը ծաղիկներ են խոնարհել Հայոց ցեղասպանության զոհերի հիշատակը հավերժացնող Լիոնի հուշահամալիրում:

Լիոնի քաղաքապետի հետ հանդիպմանը հաջորդել է Հրանուշ Հակոբյանի հանդիպումը հայ գործարարների հետ, որոնց հետ քննարկվել են ոչ միայն հայ, այլ նաև ֆրանսիացի գործարարների՝ Հայաստանում ներդրումներ կատարելու հնարավորության մասին հարցեր:

Այնուհետեւ Հրանուշ Հակոբյանը հանդիպել է Դեսին քաղաքի քաղաքապետ Լորանս Ֆոտրային: Հրանուշ Հակոբյանը Դեսինի քաղաքապետին շնորհակալություն է հայտնել ընթացիկ տարվա սեպտեմբերին Արցախ կատարած այցելության համար, որի ընթացքում Արցախի Ճարտար քաղաքի և Դեսինի միջև ստորագրվել է բարեկամության հուշագիր: Սփյուռքի նախարարը բարձր է գնահատել Դեսինի քաղաքապետի աջակցությունը տեղի հայերին, հայկական մշակույթի և հիշողության կենտրոնին:

Հանդիպման ավարտին նախարար Հրանուշ Հակոբյանը Դեսինի քաղաքապետ Լորանս Ֆոտրային պարգևատրել է ՀՀ սփյուռքի նախարարության Երախտագիտության մեդալով:

Դեսինի քաղաքապետը նախարարին ուղեկցել է քաղաքի Հայկական մշակույթի և հիշողության կենտրոն, ուր տեղի է ունեցել հանդիպում հայ համայնքի ներկայացուցիչների հետ:

Աշխատանքային այցի շրջանակներում ՀՀ սփյուռքի նախարար Հրանուշ Հակոբյանն այցելել է նաև Լիոնի «Բուլուկյան» հիմնադրամ: Նախարարը շրջայց է կատարել հաստատության սրահներում և ծանոթացել հիմնադրամի կողմից իրականացվող ծրագրերին:

Հրանուշ Հակոբյանն առաջարկել է Հայաստանում բացել «Բուլուկյան» հիմնադրամի մասնաճյուղ, ինչպես նաև քարոզչական աշխատանքներ իրականացնել, որպեսզի հայկական մշակութային կենտրոնները մասնակցեն հիմնադրամի կողմից կազմակերպվող մրցույթներին:

Նախարարի հրավերով Հիմնադրամի պատասխանատուները 2018 թվականի մայիսին կայցելեն Հայաստան՝ քննարկելու հետագա գործակցության հնարավորությունները: