Կրկնակի սադրանք Ադրբեջանի կողմից

Արմեն Հակոբյանը իր Ֆեյսբուքյան էջում գրում է.

Արցախի հիմնախնդրի կարգավորմամբ զբաղվող ԵԱՀԿ Մինսկի խմբի համանախագահները երեկ, կարելի է ասել, սեփական մաշկի վրա են զգացել ադրբեջանական կողմի շարունակական սադրանքներին, նրանց հրահրած սահմանային միջադեպերին լղոզված, հավասարության նշանով տված իրենց գնահատականների հետեւանքները: Հենց այն ժամանակ, երբ համանախագահները Արցախից անցնելիս են եղել Ադրբեջանի տարածք, ադրբեջանական կողմից ավտոմատ հրազենից կրակոցներ են արձակվել: 

Սա ավելին է, քան պարզապես խայտառակ սադրանքը: Սա ԱՄՆ-ը, Ֆրանսիան եւ Ռուսաստանը ներկայացնող Մինսկի խմբի համանախագահների ու նրանց գործունեության նկատմամբ ադրբեջանական իշխանությունների կողմից ուղղակի արհամարհական վերաբերմունքի ցինիկ դրսեւորում է կամ պարզապես «ցուցադրություն»: 
Առավել եւս, որ ՄԽ համանախագահները ոչ թե սոսկ հատում էին շփման գիծը, այլ տվյալ տարածքում նաեւ հրադադարի ռեժիմի դիտարկում էին իրականացնում: 

Այդ կապակցությամբ ԼՂՀ ԱԳՆ տարածած տեղեկատվության մեջ մասնավորապես նշված է, որ Լեռնային Ղարաբաղի Հանրապետության իշխանությունների հետ ձեռք բերված պայմանավորվածության համաձայն, երեկ ԵԱՀԿ առաքելությունը Արցախի եւ Ադրբեջանի զինված ուժերի շփման գծի դիտարկում է անցկացրել Մարտակերտ-Թարթառ ճանապարհահատվածում՝ ԵԱՀԿ Մինսկի խմբի համանախագահների մասնակցությամբ: Դիտարկումն իրականացվել է ԵԱՀԿ գործող նախագահի անձնական ներկայացուցիչ դեսպան Անջեյ Կասպշիկի գլխավորությամբ:

 Բայց. «Դիտարկման ժամանակ ԵԱՀԿ Մինսկի խմբի համանախագահները եւ ԵԱՀԿ գործող նախագահի անձնական ներկայացուցիչն անցել են ադրբեջանական տարածք՝ ԼՂՀ կողմից: Սակայն դիտարկման ավարտի պահին գրանցվել է գնդակոծություն ավտոմատ հրազենից ադրբեջանական կողմից»,- մասնավորապես նշված է ԼՂՀ ԱԳՆ հաղորդագրության մեջ:
Կարժամանակ անց ցանցային լրահոսում հայտնվեցին նաեւ «թվիթերիստ» ամերիկացի համանախագահ Ջեյմս Ուորլիքի հայտնած տեղեկություններն ու «դեպքի վայրից» լուսանկարները: Ջ.Ուորլիքը «Թվիթեր» սոցցանցում մասնավորապես գրել է. «Երբ մենք անցնում էինք շփման գիծը, շարունակական կրակոցները ստիպեցին ԵԱՀԿ դիտորդներին զրահաբաճկոններ հագնել. սա անընդունելի է»: 

Նրա հրապարակած լուսանկարներում պատկերված են ինքն ու գործընկերները՝ ՄԽ ռուս եւ ֆրանսիացի համանախագահներ Իգոր Պոպովը եւ Պիեռ Անդրիոն, նաեւ՝ ԵԱՀԿ գործող նախագահի անձնական ներկայացուցիչ Անջեյ Կասպրշիկը՝ շփման գիծը հատելու ընթացքում:

 Ամերիկացի համանախագահի ասածներին ու մասնավորապես «սա անընդունելի է» բնորոշմանը դեռ կանդրադառնանք: Մինչ այդ նկատենք, որ «կրակային» սադրանքով չբավարարվելով կամ յուրովի զարգացնելով այն՝ Ադրբեջանն արագորեն դիմեց երկրորդ սադրանքին, այն է՝ տեղեկություն տարածեց, թե հայկական կողմն է խախտել հրադադարի ռեժիմը: 
Բնականաբար մերոնց արձագանքը չուշացավ, եւ Լեռնային Ղարաբաղի Հանրապետության պաշտպանության նախարարությունը հանդես եկավ հայտարարությամբ. «Ադրբեջանի պաշտպանության նախարարության այսօր տարածած հաղորդագրությունն այն մասին, թե իբր ԵԱՀԿ Մինսկի խմբի համանախագահների մասնակցությամբ անցկացված դիտարկման ժամանակ հայկական կողմը խախտել է հրադադարի պահպանման ռեժիմը, հակառակորդի կողմից կիրառվող հերթական քարոզչական հնարքն է եւ իրականությանը չի համապատասխանում: Ընդհակառակը, դիտարկման ավարտին ադրբեջանական կողմը, իրեն բնորոշ գործելաոճով, ավտոմատ հրազենից կրակահերթեր է արձակել»:

Դե ինչ, ընդհանուր պատկերը եւ եղելությունը պարզից էլ պարզ է: Միաժամանակ արդեն իսկ նկատելի է, որ ԵԱՀԿ Մինսկի խմբի համանախագահների կողմից այս խայտառակ միջադեպը համարժեք գնահատականի չի արժանանալու: 

Հարցն այստեղ այն չէ, թե ամերիկացի համանախագահ Ջ.Ուորլիքը ինչ է գրել կամ դեռ էլի ինչ կգրի «Թվիթերում»: Խոսքն ընդհանրապես համանախագահների գնահատականների մասին է: Վերջին հաշվով, միայն Ուորլիքը չէ: Մյուս երկու համանախագահներին էլ կարծեք ոչ ոք չի արգելել թեկուզ սոցցանցային իրենց էջերում, էլ չենք ասում՝ պաշտոնապես արձագանքել եղելություններին եւ կոնկրետ միջադեպին: Ի վերջո կրակոցները միայն Ջեյմս Ուորլիքի համար չեն եղել:

Առհասարակ հետաքրքիր է, թե է՛լ ինչ պետք է տեղի ունենա, որ համանախագահների գիտակցությանը վերջապես հասնի այն պարզ իրողությունը, որ իրենց ամեն մի լղոզված, ոչ հասցեական ձեւակերպումն ընդամենը հանգեցնելու է Բաքվի կողմից նորանոր սադրանքների ու արկածախնդիր դրսեւորումների: 

Այնպիսի տպավորություն է, որ եթե, ասենք, Ալիեւը անձամբ ատրճանակն ուղղի համանախագահներից մեկնումեկի վրա եւ, ասենք, ծանր վիրավորի, ապա նրանք էլի «երկու կողմերին» ուղղված կոչեր կանեն, ինչը, իհարկե, անհեթեթ մոտեցում է: 

Ընդամենը մեկ օր առաջ, ՄԽ ամերիկացի համանախագահը Երեւանում պատմում էր իրենց այցի նախանշած նպատակների մասին: Իրավիճակի վերջին լարվածությանն էլ անդրադարձավ, բայց էլի՝ ոչ մի կոնկրետ արտահայտություն, թե ով է, ի վերջո, հրահրել նման կացություն, ո՞ր կողմը: 

Նման պայմաններում, կարծում ենք, Հայաստանի պաշտոնական արձագանքը բազմապատիկ կոշտ պետք է լինի: