Ծառայության մեջ աչքի ընկած զինծառայողները խրախուսվեցին կարճատև արձակուրդով

 Գավառ քաղաքի մշակույթի պալատում ՀՀ ՊՆ բանակային չորրորդ կորպուսի եւ Գեղարքունիքի մարզպետարանի համատեղ նախաձեռնությամբ կայացավ բանակ-հասարակություն կապի ամրապնդմանն ուղղված հերթական միջոցառումը:

ՀՀ ՊՆ բանակային չորրորդ կորպուսի կազմում ծառայության մեջ աչքի ընկած 24 զինծառայողներին հուզմունքով ու հպարտությամբ դիմավորեցին իրենց ծնողներն ու հարազատները: Միջոցառումը բացվեց Տերունական աղոթքով, որը հնչեցրեց Գեղարքունյաց թեմի հոգեւոր հովիվ Տեր Գնել քահանա Մարտիրոսյանը: «Մեր ազգը դեռ Վարդանանց օրերից կենաց մահու պայքար է մղում դավանափոխության պարտադրանքի, ազգային ինքնության պահպանման համար: Այսօր էլ դահլիճում նստած այս զինվորները, նրանց ծառայակիցներն են իրենց անձնվիրությÕ �մբ պահպանում հայրենիքի անդորրը: Թող նրանց ծառայությունն անցնի ամենախաղաղ պայմաններում»,-իր խոսքում ասաց հոգեւոր հովիվը:

«Դուք հերոս զավակներ եք ծնել, ովքեր այսօր անսասան կանգնած են հայրենիքի պաշտպանության դիրքերում: Մեր պետության ջանքերով օր օրի ամրապնդվում, ավելի անառիկ են դառնում մեր պաշտպանական դիրքերը սահմանի ողջ երկայնքով, ինչը մեր բանակին հակառակորդի նկատմամբ տալիս է մեծ առավելություն, մեր զինվորներին` անվտանգ ծառայելու հնարավորություն: Սիրելի ծնողներ, մեր փոխադարձ շփումների ընթացքում դեռ չի եղել մի հրամանատար, որ դժգոհություն հայտնի Գեղարքունիքի մարզից զորակոչված զինծառայողներից, եւ ինձ մնում է միայն հպարտանալ ձեզնով ու ձեր զավակներով: Մ ենք մեր հակառակորդին կարողացանք ցույց  տալ, որ ուժը քանակի մեջ չէ, եւ այդ հաղթանակին տեր կանգնողն այսօր ձեր հերոս տղաներն են»,-իր խոսքում նշեց Գեղարքունիքի մարզպետ Ռաֆիկ Գրիգորյանը:

«Ամեն անգամ հոգիս հպարտությամբ է լցվում, երբ գովեստի խոսքեր եմ լսում որդուս մասին: Այո, միայն մեր 23 տարեկան բանակի ուժն է ծնում իրավունք, այո, մեր բանակը հզոր է իր հրամկազմով, եւ ես շնորհակալ եմ այն աչալուրջ ուշադրության ու դաստիարակության համար, որ մեր հրամատարները ցուցաբերում  է մեր զավակների հանդեպ: Դուք հերոսներ եք, թշնամու ճամփան դեպի մեր սուրբ հայրենքի օջախները փակող հերոսներ»,-իր ելույթում նշեց զինծառայողի մայր Կարինե Հովհաննիսյանը:

«Մեր զորամիավորման առջեւ խնդիր է դրված պահպանել Նախիջեւանի հետ ունեցած սահմանը, մի երկրամասի, որը մեր հայրենքի դարավոր, անբաժան մասն է կազմել, սակայն այժմ թշնամու կողմից ոչնչացվել ու ոչնչացվում  են հայկականության հետքերը: Երբ մենք ունենք ազգասիրություն, հայրենապաշտություն ու անպարտ ոգի, թշնամու ամեն մի սպառազինություն ու քանակական առավելություն ի չիք են դառնում, ինչպես որ եղավ Արցախում: Եվ ես համոզված եմ, որ նման ոգով, որ կրում են ձեր զավակները, հնարավոր կլինի ոչ միայն պաշտպանել եղածը, այլ նաեւ հետ բերել մեր մյուս կորսված աշխարհն երը»-ներկաներին դիմեց ՀՀ ՊՆ բանակային չորրոդ կորպուսի հրամանատար, գեներալ-մայոր Անդրանիկ Մակարյանը:

Ներկաներին երաժշտական կատարումներով ողջունեցին Գավառի Հ. Թալալյանի անվան երաժշտական դպրոցի սաները: Այնուհետեւ զորամիավորման հրամանատար,գեներալ-մայոր Անդրանիկ Մակարյանը կարճատեւ արձակուրդով պարգեւատրեց աչքի ընկած զինծառայողներին, շնորհակալագրերով` նրանց ծնողներին:

Բանակ-հասարակություն կապի ամրապնդման գործում ունեցած ավանդի համար Գեղարքունիքի մարզպետ Ռաֆիկ Գրիգորյանը Գեղարքունիքի մարզպետի շնորհակալագրով պարգեւատրեց ՀՀ ՊՆ բանակային չորրորդ կորպուսի հրամանատար Անդրանիկ Մակարյանին: ՀՀ ՊՆ բանակային չորրորդ կորպուսի հրամատարի շնորհակալագրով պարգեւատրվեց Գեղարքունիքի մարզպետ Ռաֆիկ Գրիգորյանը: