30 տարի առաջ գյուղը լքածների համար ջրագիծ քաշեցին, իսկ հիմնական բնակիչների համար՝ ոչ

«Փաստ» օրաթերթը գրում է

 

Լոռու մարզի Տաշիրի շրջանի Սարչապետ համայնքի մի խումբ բնակիչներ պատրաստվում են բաց–նամակ հղել վարչապետ Կարեն Կարապետյանին՝ իրենց ջրի խնդիրը լուծելու խնդրով: Պարզվում է՝ «Վեոլիա ջուր» ընկերությունը տուգանք է սահմանել գյուղի որոշ բնակիչների համար, ովքեր նախորդ տարի սեփական ուժերով իրենց փողոցներում ջրագծեր են անցկացրել:

Վրացական սահմանից մեկ կիլոմետր հեռավորության վրա գտնվող գյուղում տարիներ շարունակ օգտվել են արոտավայրերից հոսող առվակներից: Մոտ չորս տարի առաջ «Վեոլիա ջուր»–ը գյուղի որոշ թաղամասերում ջրագծեր անցկացրեց:

Սարչապետի բնակիչ Գևորգ Բարոյանը «Փաստի» հետ զրույցում նշում է, թե սկզբից շատ ուրախացան այդ լուրից: Սակայն որոշ ժամանակ անց պարզ դարձավ, որ իրենց փողոցը ծրագրի մեջ չի մտնում և իրենց համար ջրագիծ չեն անցկացնելու: Բարոյանը տարակուսում է՝ իրենց փողոցը գտնվում է գյուղի անմիջապես կենտրոնում, սակայն իրենք դուրս են մնացել ծրագրից: Եվս մեկ զարմանալու պատճառ է տալիս ընկերության՝ այնպիսի փողոցներում ջրագիծ անցկացնելը, որի բնակիչները 30 տարի առաջ լքել են գյուղը և, ինչպես նա է ասում, հույս էլ չկա, որ հետ կգան:

Գյուղացիները սեփական միջոցներով ջրագծեր են անցկացրել առաջին անգամ նախորդ տարվա հոկտեմբերին՝ մոտ 240 մ երկարությամբ, երկրորդ անգամ էլ այս տարեսկզբին: Ընդհանուր առմամբ մոտ 30 ընտանիք է այդ աշխատանքներին մասնակցել:

«Ջրագիծն անցկացրինք, ձմեռն անցավ, գարունը բացվեց: Եկան հաշվիչները կնքեցին, մեզնից պահանջեցին մեր և մեր տների անձնագրերի պատճենները: Բայց չանցավ երկու ամիս, նորից եկան ու հայտարարեցին, թե մենք անօրինական միացում ենք արել, սա ջրի գողություն է, և մեզ հասնում է 180–250 հազար դրամի չափով տուգանք: Մենք իհարկե չհամաձայնվեցինք և ոչ մի թուղթ չստորագրեցինք»,– պատմեց նա:

Ընկերության ներկայացուցիչների վերջին այցը գյուղ տեղի է ունեցել երկու օր առաջ: Նրանք եկել են, մի քանի հաշվիչների վրայից կնիքներ պոկել և նշել, թե դրա հետ կապված արձանագրություններ կկազմեն:

Գյուղացիներն ասում են, որ հիմա իհարկե մի մասն օգտվում է ջրից, բայց անորոշ վիճակ է, ձյուն է եկել, սառնամանիք է և, եթե հանկարծ գան ջուրն անջատեն, իրենք կկանգնեն փաստի առաջ: Նրանք ասում են, թե ընկերությունից ոչինչ չեն պահանջում, միայն խնդրում են ներառել իրենց ծրագրի մեջ, դարձնել բաժանորդ, որպեսզի իրենք կարողանան վճարել օգտագործված ջրի դիմաց:

«Չեն ուզում անեն, կպած ուզում են տուգանք տանք: Ժողովրդական խոսք կա. մուկը ծակը չի մտնում, ցախավելը պոչից են կապում: Հիմա մենք հազիվ մեր թոշակներից մի քանի կոպեկ առանձնացրել ենք, աշխատանքներ կատարել, էդ փողը չենք ուզում, պարզապես աբոնենտ դարձրեք մեզ, որպեսզի մենք վճարենք: Թե ի՞նչ է մտել իրենց մեջ, ինչի՞ են փոշմանել: Իմ կարծիքով` կիսավեր տների համար ջրագիծ քաշելուց, ծախս անելուց հետո որոշել են այդ գումարները տուգանքով հանել: Քանի անգամ դիմել ենք իրենց, ասել՝ մեզ ծրագրի մեջ մտցրեք, պատասխանել են՝ չի հասնում, ծրագրից դուրս եք: Իսկ այն, որ կմ–երով ջրագիծ են քաշել ու անիմաստ աշխատանք կատարել, դա օրինակա՞ն է»,– նշեց Գևորգ Բարոյանը:

Բարոյանը շեշտում է՝ այսպես են անում, որ ժողովուրդը գնում է, իսկ հետո ասում են՝ արտագաղթ է.«Բա արտագաղթ էլ կլինի, ամեն ինչ էլ: Ցավալին գիտեք որն է, որ այդ ջուրը շաբաթական միայն 8 ժամ են պոմպով մղում: Մնացած ժամանակ ջուրը հոսում է հենց այնպես, գնում Ադրբեջան: Մեզ ասում են անօրինական է, Ադրբեջան գնա՞լն է օրինական»:

Հավելենք, որ հոդվածը պատրաստելու ժամանակ «Փաստը» հարցում ուղարկեց «Վեոլիա ջուր» ընկերությանը՝ հասկանալու համար նաև մյուս կողմի տեսակետը: Ընկերության մամուլի ծառայությունից մեզ տեղեկացրին, որ հարցմանը կպատասխանեն սահմանված ժամկետներում:

 

Քրիստինա Տեր-Մաթևոսյան