ՀՀԿ–ն կրկին ամենակողմ կուսակցությունն է, «Ելք»–ը՝ ամենադեմ

«Փաստ» օրաթերթը գրում է

 

Դեռևս մեկ ամիս առաջ, երբ parliamentmonitoring.am կայքը հրապարակեց Ազգային ժողովի 6–ամսյա գործունեությունը, այդ ամիսների ընթացքում ամենից շատ կողմ արտահայտված պատգամավորները Հանրապետական կուսակցության խմբակցությունից էին: Շարքը գլխավորում էր Վահրամ Բաղդասարյանը: Իսկ ամենից շատ դեմ քվեարկած կուսակցությունը «Ելքն» էր:

Մեկ ամիս անց պատկերը նույնն է՝ ՀՀԿ–ն շարունակում է ասել այո՝ հիմնականում առաջ տանելով իրեն ցանկալի օրինագծերը, իսկ «Ելք»–ը շարունակում է դեմ արտահայտվել դրանց: Հիմնականում ձեռնպահ և դեմ քվեարկել է «Ծառուկյան» դաշինքը: Դաշնակցությունն էլ հայտնի չէ, թե այս ամբողջում ինչ դիրք է զբաղեցնում, այսպես ասած՝ ոչ տաք, ոչ սառը:

Կայքի կողմից առանձնացված «ռեյտինգներում» հինգական պատգամավոր կա: Ամենից շատ անգամներ կողմ քվեարկած ՀՀԿ–ականների շարքում նախորդ ամսվա համեմատությամբ փոփոխություն կա՝ նոյեմբերին ամենաակտիվների թվում հայտնված Սամվել Նիկոյանն այս օրերին իր տեղը զիջել է Կնյազ Հասանովին, ով կողմ է քվեարկել ԱԺ օրինագծերին 208 անգամ: Մյուս չորս պատգամավորները կողմ են քվեարկել 209–ն անգամ: Նրանք են՝ Վահրամ Բաղդասարյանը, Գագիկ Մելիքյանը, Ավետ Սարգսյանը և Գրիգոր Ավալյանը:

«Ելք»–ի ամենադեմերի ցուցակում նույնպես փոփոխություն կա: Եթե նախորդ ամիս Գևորգ Գորգիսյանը այս ցուցակում էր, ապա այս ամիս նա իր տեղը զիջել է «մի փոքր ավելի դեմ» Արամ Սարգսյանին: Վերջինս անցած վեց ամիսների ընթացքում դեմ լինելու կոճակին է սեղմել 42 անգամ, այդպիսով առաջ անցնելով անգամ Նիկոլ Փաշինյանից ու Արտակ Զեյնալյանից, ովքեր հավասարապես քվեարկել են 40 անգամ: Նրանցից առաջ են գտնվում Լենա Նազարյանը (47) և Մանե Թանդիլյանը (44):

Ամենաշատը ձեռնպահ քվեարկած պատգամավորներն են Նաիրա Զոհրաբյանը, Վահե Էնֆիաջյանը, Վահան Կարապետյանը և Վարդան Բոստանջյանը՝ բոլորն էլ 10–ն անգամ: Նրանց մի փոքր զիջում է Արգամ Աբրահամյանը՝ 9–ն անգամ:

Բացի այս ամենաների շքերթից, parliamentmonitoring.am կայքը ևս մեկ նորամուծություն է գործարկել, այն է՝ պատգամավորների գործունեությունը համեմատելու հնարավորություն ընձեռելով կայքի այցելուներին:

Մասնավորապես, այս գործողությունը թույլ է տալիս կողք կողքի տեսնել ցանկացած երկու պատգամավորի քվեարկությունները, բացակայությունները, ինչպես նաև նրանց հայտարարագրած եկամուտն ու դրամական միջոցները: Հնարավոր է նաև պարզել, թե որքան հաճախ են նրանք նույն կերպ քվեարկել: Ծրագիրը համեմատում է միայն «թեժ» օրինագծերը և ներկայացնում, թե դրանց քվեարկությունների ժամանակ քանի անգամ են համընկել պատգամավորների դիրքորոշումները:

 

Քրիստինա Տեր-Մաթևոսյան