Հաղթանակ Շահումյան. «Բռնությունն այն է, որ կինը մի քանի կոպեկ աշխատելու համար ստիպված մտնում է զզվելի մեկի գիրկը, միայն թե փող աշխատի»

«Փաստ» օրաթերթը գրում է

 

Ճանաչված գեղանկարիչ Հաղթանակ Շահումյանը դեմ է «Ընտանեկան բռնության» մասին օրենքի ընդունմանը, քանի որ, իր կարծիքով, բռնությունների կանխարգելման համար արդեն իսկ կա և գործում է Քրեական օրենսգիրքը, որը նախատեսված է ցանկացած տեսակի բռնություն կանխարգելելու կամ դատապարտելու համար:

«Եթե ընտանիքի համար առանձին օրենք է ընդունվում, ապա յուրաքանչյուր ասպարեզ կցանկանա իր համար առանձին օրենք ընդունել՝ նկարիչներն իրենց համար, երաժիշտներն իրենց համար, այլ ոլորտներ իրենց համար և այլն: Բայց պետք չէ մոռանալ, որ մեր ժողովուրդն ի սկզբանե ներքին օրենքներ ունի, որոնք և պահպանել են մեր ընտանիքի հասկացողությունը: Բացի այդ, հայկական ընտանիքը մշտապես եղել է մեր ազգի ինքնության պահպանման ամենակարևոր օղակը: Եվ չունենալով պետականություն` մեր ազգն իր գոյությունը պահպանել է մեր ընտանիքների շնորհիվ»,– ասաց Հ. Շահումյանը:

Նա հիշեցրեց նաև, որ նախորդ դարի 70–80–ական թվականներին սովետական միջավայրում առանձին քննարկման, ուսումնասիրության և լավագույն օրինակ բերվում էր հայկական ընտանիքի օրինակը: Եվ այսօր, երբ ընտանիքի մասին օրենքն առանձնացվում է ընդհանուրից, նրա կարծիքով պատճառն այն է, որ անհայտ մարդիկ են սկսել մեզ թելադրել, թե ինչ պետք է մենք անենք:

«Մենք հազար ու մի խնդիր ունենք, և հանկարծ ընտանիքի մասին մտահոգությունն է՞ր ամենակարևորը: Եթե մտահոգվում են, ապա առաջին հերթին պետք է սոցիալական վիճակը բարելավելու մասին մտածեն: Այսօր մեր ավանդական հայկական ընտանիքի հիմնական խնդիրը մեծի ու փոքրի փոխհարաբերություններն են, որը խախտվել է: Դրա պատճառն էլ այն է, որ հայրը շատ դեպքերում չի կարողանում ապահովել իր ընտանիքին և դրա պատճառով ինքն արժեզրկվում է: Եվ եթե իսկապես մտածում են ընտանիքի մասին, պետք է առաջին հերթին ամեն ինչ անեին, որ ընտանիքներն ապահով ապրեին, որ հայրը, մայրը, երեխաներն իրենց տեղում լինեին և հարգվեին» ասաց Հ. Շահումյանը:

Գեղանկարիչն ընդգծեց նաև, որ հայ ժողովուրդը միշտ էլ առանձնահատուկ ուշադիր է եղել երեխաների նկատմամբ: Գյուղաբնակների հետ իր բազմաթիվ շփումների ժամանակ տեսել ու համոզվել է, թե նույնիսկ կիսագրագետ ու կոպիտ նիստ ու կացով մարդիկ ինչքան ուշադիր են իրենց կանանց և ընտանիքի անդամների նկատմամբ:

«Եվ դա առանձին թիրախ սարքելը նշանակում է մենք քիթներս խոթում և միջամտում ենք ընտանիքների փոխհարաբերությունների մեջ և խաթարում ենք այդ հարաբերությունները: Ես դրանից լավ բան չեմ սպասում»,– ասաց Հ. Շահումյանը:

Նրա համար հասկանալի չէ նաև, թե ինչ բռնության մասին է խոսքը, երբ ծնողը 5–րդ դասարանի իր երեխային ասում է՝ «մի՛ ծխի»: Եվ դա ինչպե՞ս կարող է որպես բռնություն կամ առավել ևս հոգեբանական բռնություն ընկալվել: Հ. Շահումյանի կարծիքով իրականում հոգեբանական բռնությունները ծնվում են սոցիալական վիճակից, որի համար ոչ թե օրենք է հարկավոր ընդունել, այլ աշխատատեղեր է հարկավոր ստեղծել:

«Դրա համար պետք է պայմաններ ստեղծվեն, որ ընտանիքի տղամարդը կարողանա իր քրտինքով գումար վաստակի, որպեսզի կարողանա իր ընտանիքն արժանապատիվ ձևով պահի, ոչ թե փողոցներում գումար մուրա: Դա է հոգեբանական բռնությունը, ոչ թե մարդկային հարաբերությունները: Այս ամենն աչքաթող ենք անում և ուզում ենք, որ ընտանիքում ամեն ինչ լավ լինի՞: Իհարկե, նաև անախորժություններ էլ կլինեն, բայց դա արդեն ընտանիքի ներքին գործն է: Ինձ դուր չի գալիս, երբ նուրբ հարցերի մասին բարձրաձայն են խոսում, էլ չեմ ասում՝ հեռուստացույցով: Սերը, և ընտանեկան հարաբերությունները, և մարդու ներքին աշխարհը փակ միջավայր են, և չի կարելի դրանք քչփորել, էժանացնել և դարձնել քննարկման թեմա»,– համոզված է Հ. Շահումյանը:

Նրա կարծիքով նոր օրենքը կոռուպցիայի նոր հարթակ է ձևավորելու: Ինչ վերաբերում է ուրիշ ազգերից սովորելուն, ապա, նրա կարծիքով, ոչ թե մենք պետք է ուրիշներից սովորենք, այլ՝ ուրիշները մեզնից:

«Ես շատ եմ եղել Ֆրանսիայում և շատ լավ գիտեմ, իրենց ձևապաշտական, արտաքինից քաղաքակիրթ պահվածքի էությունը: Եվ եթե նրանք նման կերպ են իրենց պահում, ապա դա դեռ չի նշանակում, որ իրենք իրենց կանանց ավելի շատ են սիրում, քան՝ մենք: Եվ իրականում բռնությունն այն է, որ կինը չցանկանալով, մի քանի կոպեկ աշխատելու համար ստիպված գնում ու մտնում է զզվելի մեկի գիրկը, միայն թե փող աշխատի: Այնպես որ, այս օրենքը մեզ ոչինչ էլ չի տալու, այլ ընդամենը խաթարելու է մեր հայկական ավանդական ընտանիքի արմատները, իսկ հայկական ընտանիքները կսկսեն քայքայվել դրա պատճառով»,– ասաց Հ. Շահումյանը:

 

Արմինե Գրիգորյան