Ավագ Հարությունյան. «Պետական տուրքի մասին օրենքը հարցը կիսատ է լուծում»

«Փաստ» օրաթերթը գրում է

 

«Պետական տուրքի մասին» ՀՀ օրենքում կատարված լրացումներով և փոփոխություններով կոնյակի սպիրտի ու կոնյակի մինչև 100 հազար լիտր արտադրության, իրացման և ներմուծման դեպքերում տարեկան 5 միլիոն դրամ պետական տուրք է սահմանվում: 100000 լիտրից ավել՝ լրացուցիչ տուրք՝ մեկ բացարձակ լիտրի համար 50 դրամի հաշվարկով, սպիրտի համար 300 դրամ է նախատեսվում: Նախկինում շեմը 15 միլիոնի էր հասնում:

Գինեգործների միության նախագահ Ավագ Հարությունյանը «Փաստ» օրաթերթի թղթակցի հետ զրույցում ասաց, որ այս փոփոխություններով կառավարությունը խթանում է տեղական արտադրությանը, միևնույն ժամանակ խնդիրի լուծումը կիսատ է մնում:

«Խնդիրը նրանում է, որ խոշոր արտադրողների համար էական նշանակություն չունի 5 թե 15 միլիոն կլինի պետական տուրքը: Այսինքն՝ սա նաև նշանակում է, որ այն փոքր բիզնեսին չի աջակցում: Այս փոփոխությունը խոշոր արտադրողների համար է արված»,– նկատեց նա:

Ցանկանում են խնդրել կառավարությանը, որպեսզի վերանայվի և նվազեցվի կոնյակի սպիրտն ու կոնյակի արտադրության համար նախատեսված պետական տուրքի շեմը: Ըստ Հարությունյանի՝ փոքր արտադրողներն ի վիճակի չեն այդքան գումար վճարել:

«10000 լիտր արտադրողի համար պետական տուրքի շեմը պետք է լինի 500000 դրամ, 100000 լիտր արտադրողի համար 5 միլիոն, իսկ մնացածներ համար՝ 15: Խոշորի համար տուրքը նվազեցնում է, բայց այնքան չի իջեցնում, որ փոքրն էլ կարողանա դրանից օգտվել:

Չգիտես ինչու կառավարությունը որոշեց, որ փոքր արտադրողները չպետք է կոնյակ արտադրեն: Մենք ուզում ենք, որ փոքր արտադրողներին հավասար պայմաններ և հնարավորություններ տրվեր: Նրանք ունեն սարքավորումներ, որը թույլ է տալիս դա անել: Ուզում ենք, որ 10000–ից մինչև 50000 շիշ արտադրողներ էլ լինեն Հայաստանում: Կառավարությունը որոշեց, որ՝ ոչ: Պետք է կոնյակ արտադրեն միայն հարուստները»,– մտահոգություն հայտնեց Գինեգործների միության նախագահը:

Խնդրի կողքին Ավագ Հարությունյանը նաև ձեռքբերումները թվարկեց: Ամփոփելով տարին՝ նա փաստեց, որ կոնյակագործների համար բարենպաստ էր: Այս ոլորտում արտադրության և արտահանման աճ է արձանագրվել:

«2013–2014 թվականների ճգնաժամից ոլորտը դեռ նոր է ուշքի գալիս: Գինեգործության և կոնյակագործության ոլորտում 2008–2009 թվականներին ճգնաժամ էր, որը խորացավ հաջորդող տարիներին, իսկ հիմա՝ վերականգնման էտապում ենք»,– ասաց Հարությունյանը:

Եվրամիության և Հայաստանի միջև ստորագրված համաձայնագիրը թույլ կտա կոնյակի հայ արտադրողներին միության կազմում ևս 25 տարի արտադրանքը ներկայացնել որպես «հայկական կոնյակ»: Անդրադառնալով հայկական կոնյակի ապագային՝ Հարությունյանը նշեց, որ Հայաստանը 1959 թվականից «կոնյակ» անվանումով խմիչք արտահանելու իրավունք չունի:

««Կոնյակ» բառը մենք միայն ռուսական շուկայում ենք օգտագործում, ուրիշ տեղ իրավունք չունենք: Ռուսական շուկայում էլ մեր դիրքերն ահագին կորցրել ենք: Տնտեսական ճգնաժամի հետևանքները չկարողացանք հաղթահարել և դոլարին համարժեք գների բարձրացում չկարողացանք ապահովել: Ստացվեց, որ հայկական կոնյակն ամենաէժանն է Ռուսաստանում, և սրանով մենք իմիջ կորցրեցինք»,– մատնանշեց նա:

Հայկական արտադրությամբ գինի և կոնյակ շատ քիչ ծավալներով են արտահանվում Եվրոպա: Արտահանման հիմնական ուղղությունը Մերձբալթյան երկրներն են:

«Ի սկզբանե՝ 1959 թվականից, երբ ընդունվեց օրենքը, արգելվեց եվրոպական երկրներ կոնյակի արտահանումը՝ «կոնյակ» անվան ներքո: 1959 թվականից ի վեր, մենք Եվրոպական Միության երկրներ «հայկական կոնյակ» բառակապակցությամբ խմիչք չենք արտահանել»,– հիշեցրեց նա:

Ըստ նրա՝ իրականում խոսքը ներքին շուկայի ու Ռուսաստանի մասին է: 25 տարի անց «կոնյակ» անվանման հետ կապված խնդիրներ կառաջանան ռուսական և տեղական շուկաներում: Իսկ ներքին շուկայում կոնյակի սպառման ծավալները մեծ չեն:

 

Մանյա Պողոսյան