Ռոբոտաշինություն, Երևանագիտություն, նոր աղբավայրի կառուցում ու բուժծառայությունների մատչելիություն

«Փաստ» օրաթերթն անդրադարձել է Երևանի՝ 2018 թ. զարգացման ծրագրին

 

Հրապարակվել է Երևանի զարգացման 2018 թ. ծրագիրը: Այն ներառում է կետեր բոլոր ոլորտների վերաբերյալ, առանձին նշումներ կան Երևանյան բոլոր վարչական շրջաններում նախատեսվող ծրագրերի մասին: Մենք հաջորդ տարի իրականացվելիք միջոցառումներից առանձնացրել ենք մի քանիսը:

Մասնավորապես, վարձակալությամբ տրված ստորգետնյա հետիոտն անցումներում նախատեսվում է իրականացնել ընթացիկ նորոգման և հիմնանորոգման աշխատանքներ՝ վարձակալների հետ համագործակցությամբ։ Ներկայում հաշվառված է մոտ 40 հասցե, որտեղ նպատակահարմար է կառուցել վերգետնյա անցումներ։ 2018 թ. համայնք–մասնավոր հատված համագործակցությամբ նախատեսվում է իրականացնել թվով 5 վերգետնյա անցումների կառուցման ծրագիր։

Ծրագրի շրջանակում նախատեսվում է Նուբարաշենի գործող աղբավայրի հարակից տարածքում կառուցել նոր, միջազգային չափորոշիչներին համապատասխան աղբավայր՝ բոլոր ենթակառուցվածքներով, ինչպես նաև մեկուսացնել Նուբարաշենի և Աջափնյակի գործող աղբավայրերը, կառուցել արտանետվող գազերի հավաքման և այրման կայան, տեղադրել գեներատոր էլեկտրաէներգիայի ստացման համար։ Նոր աղբավայրի ամբողջ տարածքը նախատեսված է կառուցել 8,8 մլն մ3 աղբի ծավալի համար: Երևան քաղաքում տարեկան 300 հազար տոննա աղբի գնահատված ծավալի պարագայում կապահովվի շուրջ 28 տարի շահագործում: Նոր աղբավայրը կծառայի Երևան քաղաքին և հարակից 4 համայնքներին:

Նախատեսվում են իրականացնել Երևանի ներքաղաքային հասարակական տրանսպորտի նոր, արդյունավետ երթուղային ցանցի և միասնական տոմսային համակարգի մշակման և ներդրման աշխատանքներ։ Միաժամանակ նոր երթուղային ցանցի ներդրման գործընթացի շրջանակներում միկրոավտոբուսների շահագործման բացառում:

Կրթության ոլորտում նույնպես նորամուծություններ կլինեն՝ դպրոցներում ինժեներական խմբակ–լաբորատորիաների ստեղծման մեկնարկային ծրագրի (ռոբոտաշինություն) իրականացում է սպասվում: Մեկ այլ առարկա կավելանա երևանյան դպրոցների առարկաների ցանկում՝ «Երևանագիտություն»–ը:

«Դպրոցականի ազգային նկարագրի ձևավորման, Երևանի նկատմամբ սիրո և պատասխանատվության խորացման նպատակով՝ դպրոցներում խմբակի ձևով կամ դասղեկական ժամերին ուսումնասիրել «Երևանագիտություն» առարկան»,– կարդում ենք նախագծում:

Որակյալ բժշկական ծառայության մատուցման և մատչելիության բարձրացման նպատակով Երևանի ենթակայության առողջապահական կազմակերպությունների համար 2018թ. նախատեսվում է ձեռք բերել նոր բուժսարքավորումներ և բժշկական պարագաներ, մասնավորապես՝ 1 ռենտգեն ապարատ, 1 ցիստոսկոպ, 41 իմունոֆերմենտային անալիզատոր, 2 ուլտրաձայնային ստացիոնար հետազոտման սարք, 5 հարվածաալիքային թերապիայի սարքավորում, 15 գալվանիզացիայի սարքավորում: Լիարժեք ախտորոշում և արդյունավետ բուժում իրականացնելու նպատակով Երևանի բնակիչների համար նախատեսվում է ձեռք բերել նաև թանկարժեք և դժվարամատչելի հետազոտություններ, այդ թվում՝ թվով 135 կոմպյուտերային տոմոգրաֆիայի ծառայություն և 60 մագնիսա–ռեզոնանսային տոմոգրաֆիայի ծառայություն:

2018 թ. ծրագրում տեղ է գտել նաև կենդանաբանական այգուն վերաբերող հատված: Այն կվերաբացվի նոր լուծումներով՝ էլ ավելի համապատասխանելով միջազգային չափորոշիչներին։ Մասնավորապես կբացվեն միջազգային չափորոշիչներին համապատասխան կառուցված առյուծների, արջերի և գայլերի նոր ազատավանդակներ, ինչպես նաև կարանտինը։ Միաժամանակ աշխատանքներ կիրականացվեն այգու՝ խիստ անհրաժեշտ պարսպապատման ուղղությամբ։