Լավրենտի Միրզոյան. «Լրագրողներն ինչպե՞ս են օրենքը խախտելով համագումար անցկացնում»

Այսօր Հայաստանի գրողների միության դահլիճում տեղի ունեցավ Հայաստանի ժուռնալիստների միության համագումարը: Միության նախագահ Աստղիկ Գևորգյանը հաշվետվություն ներկայացնելուց հետո հայտարարեց, որ իր թեկնածությունն այլևս չի առաջադրելու, սակայն մշտապես պատրաստ է կանգնել նորընտիր նախագահի կողքին և սատարել նրան:

Նրա ելույթից հետո ամբիոնին մոտեցավ մանկավարժական գիտությունների թեկնածու, պրաֆեսոր, լեզվաբան, խմբագիր Լավրենտի Միրզոյանը և հայտարարեց՝ համագումարն օրենքով չի անցկացվում: Նրա խոսքով նախ պետք է սկզբնական կազմակերպություններում տեղի ունենար ընտրություն. միության բոլոր անդամներին պետք էր նախապես իրազեկել համագումարի անցկացման, տեղի ու ժամի մասին:

«Համագումարը պետք է ունենար իր օրակարգը և աշխատակարգը, բայց ինչպես տեսաք, ոչ մեկն էլ չգիտեր, որ համագումար էր անցկացվելու: Ինձ զանգել են որպես միության հնագույն անդամի, ես էլ եկել եմ: Բայց չգիտեմ, թե համագումարի անդամ եմ, թե ոչ, վճռական ձայնի իրավունք ունեմ թե՝ ոչ: Համագումարի ղեկավար մարմին չկա, գրանցում չկա, հայտնի չէ, թե միության  քանի պատվիրակ է մասնակցում, քանիսն են բացակա, ինչու են բացակա: Այսինքն՝ աշխատակարգ պետք է լինի»,- ասաց Լ. Միրզոյանը:

Նրա համար նաև հասկանալի չէր, թե ինչու  համագումարին չեն մասնակցում միության անդամ լրատվամիջոցների ներկայացուցիչները: Նա նաև նշեց, որ այսօր միության առջև բազում խնդիրներ կան, որոնք հարկավոր է լուծել:

«Բոլորը դժգոհում են եթերի լեզվից, մամուլի գրավոր խոսքից: Եվ համագումարում պետք է բովանդակային հարցեր քննարկվեին, բայց այս հավաքին մասնակցում են մարդիկ, ովքեր լրագրողների միության անդամ չեն: Պատահական մարդիկ են եկել: Շատ-շատերին տեսա, որոնք միության անդամ չեն, բայց եկել են:

Եվ այս պայմաններում ոնց պետք է քարտուղարություն և նախագահ ընտրենք, քանի որ ոչ մեկս մանդատ չունենք: Մենք ունենք կանոնադրություն, որը հաստատված է Արդարադատության նախարարության կողմից, բայց այդ կանոնադրությունն այսօր խախտում ենք, քանի որ կանոնադրությանը փաստորեն չի գործում: Ես առաջարկեցի, որպեսզի համագումար նախապատրաստող հանձնախումբ ստեղծվի, այդ հանձնախումբն աշխատի, նախապես լրատվամիջոցներով տեղեկացնի, որ այսինչ օրը  տեղի է ունենալու համագումար, այս օրակարգով, բայց ոչինչ չի արվել:

Ոչ մի լրատվամիջոց չի հայտարարել, որ համագումար է տեղի ունենալու: Ես առաջարկեցի, որ նախագահություն ընտրեն, որպեսզի համագումարը ղեկավարի: Սրանք բոլորն օրենքի խախտումներ են»,- ասաց Լ. Միրզոյանը:

Միության անդամը նշեց նաև, որ եթե որևէ տեղ օրենք է խախտվում, լրատվամիջոցներն աղմուկ-աղաղակ են բարձրացնում, բայց նույն լրատվամիջոցներն օրենքի խախտմամբ  համագումար անցկացնում:

«Այսօր լրագրողներն ինչ պետք է մեկնաբանեն. տեղի ունեցավ համագումար բարձր մակարդակով և այսինչ-այսինչյանին ընտրեցին միության նախագա՞հ: Ես թեկնածուների մասին ոչինչ ասել չեմ կարող, բայց ինչու են նման ձևով վարվում: Ինձ բազմաթիվ մարդիկ են զանգահարում ու հարցնում՝ համագումա՞ր է, ասում եմ՝ հա:

Ասում են՝ բա ինչու մեզ էլ չեն հրավիրել: Փաստորեն յոլա տանելու տարբերակով են առաջ շարժվում՝ պլյուս դնեն, թե համագումար են արել: Սա համագումար չէ: Ես, այսքանը տեսնելով, էլ անելիք չունեմ: Ես դիրորոշում ունեցող մարդ եմ և դուրս եմ գալիս դահլիճից»,- ասաց Լ. Միրզոյանը:

Մինչև քվեարկությունը Ժուռնալիսների միության այլ անդամներ ևս լքեցին դահլիճը, սակայն համագումարի ընթացքը դրանից չխախտվեց: Ներկաները ձայների 57 կողմ և 1 դեմ հարաբերակցությամբ միության նախագահ ընտրեցին Սաթիկ Սեյրանյանին:

Ավելացնենք նաև, որ համագումարի կեսից դահլիճ եկան նաև ԱԺ պատգամավորներ Մարգարիտ Եսայանն ու Աղվան Վարդանյանը:

 

Արմինե Գրիգորյան