Առանց լիցենզիայի հրավառություն իրականացնողներին 1 միլիոն դրամ տուգանք

ИНТЕРВЬЮ 15 Январь, 2018 15:23

«Փաստ» օրաթերթը գրում է

Կառավարությանը ներկայացված օրենսդրական նոր փաթեթի համաձայն՝ առանց թույլտվության հրավառություն իրականացնողները կտուգանվեն: Օրենսդրական փաթեթը կառավարությանն է ներկայացրել Երևանի քաղաքապետ Տարոն Մարգարյանը: Մեկ տարվա ընթացքում առաջին խախտման դեպքում տուգանքը կկազմի 1 միլիոն դրամ, իսկ նույն արարքը մեկ տարվա ընթացքում երկու անգամ կատարելը՝ երկու միլիոն դրամ:

«Փաստի» զրուցակիցն է Երևանի ավագանու «Ելք» խմբակցության անդամ Անի Սամսոնյանը, ով առաջարկներ է ներկայացրել օրենսդրական փաթեթի մշակման համար:

– Փաթեթը մշակվել է ՀՀԿ խմբակցության անդամների հետ համատեղ, որո՞նք են եղել «Ելք» խմբակցության առաջարկները:

– Նախագիծը ներկայացվել է ոչ թե ՀՀԿ խմբակցության, այլ քաղաքապետի կողմից։ «Ելք» խմբակցության անդամները փաթեթի վրա աշխատել են Երևանի քաղաքապետարանի իրավաբանական վարչության հետ։ Առաջարկներ ներկայացրել եմ ես, ավագանու անդամներ Արայիկ Հարությունյանը և Տիգրան Ավինյանը։

Մեր առաջարկներում ներառված էին ընթացիկ տարվա համար տեղական տուրքի արժեքի չափը սահմանել մինչև 500 հազար դրամ՝ կախված հրավառության տեսակից։ Համատեղ քննարկումների ընթացքում որոշվեց համայնքի վարչական տարածքում տեխնիկական և հատուկ նշանակության հրավառություն իրականացնելու թույլտվության համար սահմանել 50–300 հազար դրամ։

Մենքառաջարկեցինքնաևվարչականտուգանքըսահմանելնվազագույնաշխատավարձի 1000–ապատիկիկամ 2000–ապատիկիչափով։

Նոր նախագծով արդեն առանց թույլտվության կամ թույլտվությամբ սահմանված թույլատրելի վայրերի, պահանջների կամ պայմանների խախտմամբ հրավառություն իրականացնողները կտուգանվեն առաջին անգամ նվազագույն աշխատավարձի հազարապատիկի չափով, այսինքն մեկ միլիոն դրամ, իսկ նույն արարքը մեկ տարվա ընթացքում կրկին կատարելը՝ երկու միլիոն դրամով։

Մեր առաջարկներում կային կետեր նաև, որոնք վերաբերում էին հրավառության ժամերին, սակայն դա կհստակեցվի ավելի ուշ՝ ավագանու որոշմամբ, որովհետև նախատեսվում է իրականացնել քաղաքի գոտիավորում և ըստ դրա նաև որոշել հրավառության թույլատրելի ժամերը։

– Գործող օրենսդրությամբ արդեն իսկ հրավառություն իրականացնելու կարգը խախտելու դեպքում մարդիկ պետք է ենթարկվեին վարչական պատասխանատվության, սակայն ի՞նչն էր պատճառը, որ այն չէր գործում, և նոր նախագիծը իր մեջ ինչ նոր դրույթներ է պարունակում, ինչը թույլ կտա օրենքի տառին հստակ հետևել:

– Մենք ստանում էինք բազմաթիվ բողոքներ՝ կապված հրավառությունների իրականացման հետ։ Բողոքը հիմնականում վերաբերում էր չնախատեսված ժամերին հրավառություն իրականացնելուն։ Սա կարգավորվում էր միայն Վարչական իրավախախտումների մասին օրենսգրքի 180–րդ հոդվածով, որը վերաբերում է լռության խախտմանը, որի վերահսկողությունը պետք է իրականացներ ոստիկանությունը։

Քաղաքացիները բողոքում էին, բայց չէին ցանկանում այդ մասին հայտնել ոստիկանությանը տարաբնույթ պատճառներով։ Նոր նախագծով արդեն հրավառություն իրականացնելու համար անհրաժեշտ է հատուկ թույլտվություն, որը տալու է համայնքային իշխանությունը և վերահսկողությունը նույնպես իրականացնելու է համայնքային իշխանությունը և իրավախախտները ենթարկվելու են պատասխանատվության։

Լրացումներ են կատարվել նաև Տեխնիկական անվտանգության ապահովման պետական կարգավորման մասին օրենքում, որտեղ սահմանվում են նաև չափորոշիչները, թե որ տեսակի հրավառություն կարող է ազատ վաճառվել բնակիչներին և որը՝ ոչ։

– Որո՞նք են նոր փաթեթի առավելությունները, և արդյոք կարելի՞ է վստահ լինել, որ դրա շնորհիվ այլևս մարդիկ ստիպված չեն լինի երեկոյան ժամը 23:00–ից հետո հրավառության աղմուկ լսել:

– Հրավառության համար թույլատրելի ժամերը կլինեն տարբեր, կախված բնակավայրի առանձնահատկություններից։ Դա պետք է հաստատվի ավագանու որոշմամբ։ Ես հույս ունեմ, որ համայնքային իշխանությունը հետևողականորեն կվերահսկի այն իրավաբանական անձանց և անհատ ձեռնարկատերերին, որոնք ստացել են հրավառություն իրականացնելու թույլտվություն։

– Ինչպե՞ս եք պատկերացնում վերահսկողության մեխանիզմը: Այս փաթեթը հնարավորություն կտա՞ իսկապես գտնել բոլոր օրինախախտներին և համապատասխան պատասխանատվության ենթարկել:

– Տեխնիկական և հատուկ նշանակության հրավառություն իրականացնելու թույլտվությունը տրվելու է միայն իրավաբանական անձանց և անհատ ձեռնարկատերերին, այսինքն՝ նրանց, ովքեր մատուցում են ժամանցային կամ այլ ծառայություններ։ Մեխանիզմը պարզ է՝ ով առանց լիցենզիայի իրականացրեց հրավառություն, տուգանվելու է։