Վահրամ Բաղդասարյանն ընդդիմադիրներին մեղադրում է ժողովրդին մոլորեցնելու մեջ

Ազգային ժողովի ՀՀԿ խմբակցության ղեկավար Վահրամ Բաղդասարյանը հերքում է խոսակցություններն այն մասին, թե իշխանությունները մտավախություն ունեն, որ չեն կարողանալու անցկացնել սահմանադրական բարեփոխումները և սկսել են կեղծիքների ճանապարհով գնալ: Ազգային ժողովում խորհրդարանական ճեպազրույցների ժամանակ պատգ ամավորը լրագրողների ուշադրությունը հրավիրեց այն հանգամանքի վրա, որ ընդդիմությունը ընտրություններից 1 տարի առաջ սկսում է թմբկահարել, թե ընտրությունները կեղծված են:

«Հանրապետականը դեռևս նույնիսկ ակտիվ քարոզարշավ չի սկսել, սակայն ընդդիմադիրներն արդեն խոսում են կեղծիքների, վարչական ռեսուրսի կիրառման մասին: Դա ընդամենը իմիտացիա է, և նրանք փորձում են մոլորեցնել ժողովրդին: Նրանք հայտարարում են, որ բովանդակային քննարկումների չեն մասնակցելու, սակայն տեսնում եք, որ տեսախցիկների առաջ նրանք անմիջապես ակտիվորեն քննարկման փուլ են մտնում: Եթե նրանք արդեն վստահ են, որ ընտրությունները կեղծված են, էլ ինչո՞ւ են այսքան աղմուկ բարձրացնում նույնականացման քարտերով քվեարկելու հարցի շուրջ»,- «Արմենպրես»-ի հաղորդմամբ՝ ընդգծեց Բաղդասարյանը:

ՀՀԿ խմբակցության ղեկավարը վստահեցրեց, որ եթե իշխանությունները մարդկանց թույլ չտան նույնականացման քարտերով քվեարկության գնալ, ընդդիմադիրներն ասելու էին, թե այդ 180 հազարից ավելի քաղաքացիները իրենց ընտրողներն են, «ոչ»-ի կողմնակիցներն են և պետք չէ նրանց զրկել քվեարկելու իրավունքից:

Անդրադառնալով վարչական ռեսուրսների կիրառման մասին խոսակցություններին՝ Վահրամ Բաղդասարյանն ընդգծեց, որ ՀՀԿ-ն դեռ ակտիվ քարոզչություն չի սկսել և ընդամենը շտաբում քննարկում է մարտավարությունը: «Երբ մենք կսկսենք քարոզարշավը, դուք կհետևեք և, եթե կտեսնեք ինչ-որ պարտադրանքներ, վարչական ռեսուրսի օգտագործման դեպքեր, կբարձրաձայնեք այդ մասին»,- նշեց պատգամավորը:

Նա հավելեց, որ վերջին 4 ամիսների ընթացքում եղած քննարկումների արդյունքում կարող է ասել, որ քաղաքացիական հասարակության, քաղաքական ուժերի մեծ մասը հակված է սահմանադրական բարեփոխումենրին «այո» ասել:

Ամեն դեպքում, իշխանությունները կողջունեն «ոչ»-ի ճամբարի ցանկացած գործողություն, որը կլինի օրենքի սահմաններում: «Եթե կլինեն գործողություններ, որոնք կլինեն ոչ օրենքին համապատասխան, բնականաբար, իրավաբանները պետք է արձագանքեն կարգ ու կանոն հաստատելու համար»,-ընդգծեց Բաղդասարյանը՝ անդրադառնալով հարցին, թե ընդդիմադիրներին դուր չի եկել իր այն հայտարարությունը, թե իրավապահները պետք է արձագանքեն «ոչ»-ի ճամբարի գործողություններին:

Հարցին, թե ի՞նչ է նկատի ունի՝  ոչ օրինական գործողություններ ասելով, Վահրամ Բաղդասարյանը պատասխանեց. «Ոչ օրինական գործողություն ասելով՝ ես նկատի ունեմ, հակապետական, հեղափոխական կոչերը: Այն, ինչը տեղավորվում է օրենքի սահմաններում, մենք ողջունում ենք: Դուք նաև վերջին հավաքների ընթացքում տեսաք, որ ոստիկանությունն աջակցում էր, որ հանրահավաքներն անցնեն պատշաճ մակարդակով: Եթե օրենքի սահմաններում է արվում ամեն ինչ, այդտեղ որևէ խնդիր չկա և խոչընդոտ չի կարող լինել: Սական դուք գիտեք, թե ինչն է օրենքի սահմաններից դուրս և իրավապահները կարգ ո ւ կանոն պետք է հաստատեն նման դեպքերում»,- ընդգծեց ՀՀԿ խմբակցության ղեկավարը;

Նա հավելեց, որ իրավապահներն իրավունք չունեն ձեռքերը ծալած կանգնել պատի տակ և լուռ հետևել, թե ինչ է կատարվում: Բաղդասարյանի խոսքով՝ իրավապահները պետք է հետևեն, որպեսզի, օրինակ, խաղաղ ցույցերի ժամանակ սադրիչներ չհայտնվեն: