ԱՄՆ. «Shutdown»՝ 1–ամյա պաշտոնավարման շեմին

«Փաստ» օրաթերթը գրում է

 

Անցած շաբաթ օրը, ԱՄՆ նախագահ Դոնալդ Թրամփի 1–ամյա պաշտոնավարման նախօրեին, ԱՄՆ կոնգրեսը կառավարությանը «Shutdown» հայտարարեց՝ չհաստատելով 2018–ի պետբյուջեն:

Արդյունքում դաշնային ծառայությունների մեծ մասը պաշտոնապես դադարեցրել է իր աշխատանքը, և ոչ ոք չգիտի, թե տանը նստած պետական ծառայողները երբ են վերջապես վերադառնալու իրենց գրասենյակներ:

Մամուլի պնդմամբ՝ իրավիճակի գլխավոր պատասխանատուն դեմոկրատներն են, որոնց չհաջողվեց վարչակազմի հետ համաձայնության գալ ԴԱԿԱ–ի՝ անօրինական փախստականների («երազողների») կեցության ժամկետը ԱՄՆ–ում երկարաձգող ծրագրի շուրջ: Մյուս կողմից էլ՝ դեմոկրատներն իրե՛նք էին ճնշված ներգաղթյալների իրավունքները պաշտպանող կազմակերպությունների, հեղինակավոր անձանց և սովորական ցուցարարների «գրոհով», որի ընթացքում վերջիններս դեմոկրատներին մեղադրում էին պասիվ հարմարվողականության մեջ և կոշտ միջոցներ չձեռնարկելում:

Պարզից էլ պարզ է, որ այս իրավիճում, առանց այդ էլ վերջին ընտրություններում բարոյալքված դեմոկրատներն այլևս չէին կարող լուրջ հույսեր կապել էլեկտորատի հետ՝ Կոնգրեսի նոյեմբերյան ընտրություններում, եթե գոնե չսպառնային, թե չեն հաստատի կառավարության ֆինանսավորումը: Չխոսենք արդեն այն մասին, որ այսօր էլ նրանք Թրամփի իմփիչմենթի և նոր ընտրությունների մասին են երազում՝ այն խիստ հավանական դիտարկելով, այսպես կոչված, Ռուսական գործի և հատուկ դատախազ Ռոբերտ Մյուլլերի ձեռնարկած հետաքննության համատեքստում:

Իսկ ինչո՞վ էին զբաղված Սենատում, այնուամենայնիվ, մեծամասնություն հանդիսացող հանրապետականները: Պարզվում է՝ հանրապետականները իրենք են հայտնվել անորոշ իրավիճակում, քանի որ, ինչպես հաճախ է պատահում, Սպիտակ տնից հակասական ուղերձներ են ստացել այս ամբողջ ընթացքում:

Մասնավորապես՝ անցյալ շաբաթ դեմոկրատները խոստացել էին հաստատել կառավարության ֆինանսավորումը և երկրի սահմանների ուժեղացած հսկողության հարցում Թրամփի առաջ կանաչ լույս վառել, ինչին Սպիտակ տունը հավանություն էր տվել: Սակայն, շատ չանցած, Սպիտակ տան աշխատակազմի ղեկավար Ջոն Քելլին հանդես եկավ տարօրինակ մի հայտարարությամբ, որից պարզ դարձավ, որ Թրամփը ոչ միայն ԴԱԿԱ–ի հարցում չի պատրաստվում զիջել, այլև, չնայած հարևան Մեքսիկան «ամենավտանգավոր երկիրը» որակելու իր հայտարարությանն ու այդ երկրի հետ պատ կառուցելու նախընտրական խոստմանը, այլևս չի կամենում այդ մի գործն էլ գլուխ բերել:

«Թրամփը ժամանակին չի ըմբռնել այդ պատը կառուցելու հետ կապված իրականությունը»,– հայտարարեց Քելլին, որից հետո Թրամփն ինքը հանդես եկավ թվիթով, իբր՝ «պատը պատ է մնում, և դրա անհրաժեշտությունը չի վերացել»:

Այս հակասական հայտարարություններից հետո հանրապետականներն իրենք նպաստեցին դեմոկրատների «հաղթանակին»՝ որոշելով, որ կխափանեն քվեարկությունը թե՛ փախստականների, թե՛ երկրի սահմանները պաշտպանելու օրինագծերի հետ կապված, և այդպես կշարունակվի այնքան ժամանակ, քանի դեռ Թրամփը հստակ չի ասել, թե ինչ է ուզում:

Սրանից ավելի ոգևորվելով՝ դեմոկրատները հայտարարություն տարածեցին, թե՝ Հանրապետական կուսակցությունն ու ներկայի վարչակազմն անկարող են երկիրը կառավարել: Եվ եթե հաշվի առնենք նաև այն փաստը, որ չնայած կառավարության ֆինանսավորման դադարին՝ իր աշխատանքն է շարունակում նաև հատուկ դատախազ Ռոբերտ Մյուլլերի հետաքննող հանձնաժողովը (որն, ի դեպ, դեռևս որևէ արդյունք չարձանագրած իր աշխատանքի դիմաց արդեն իսկ 7 մլն միլիոն դոլար է ծախսել և ֆինանսավորվում է անկախ ամեն ինչից), ստացվում է, որ 2018 թվականը Թրամփի համար ավելի բարդ տարի է լինելու, քան անցած 2017–ը:

 

Գոհար Սիմոնյան