Օսկանյանին կարելի է «տեսնել» միայն Facebook-ում

Փետրվարյան հայտնի իրադարձություններից հետո ԲՀԿ-ն լքած պատգամավոր Վարդան Օսկանյանը, ինչպես նախկինում, այնպես էլ հիմա, պերճախոս չի գտնվում, նրա մտքերին կամ դիրքորոշումներին կարելի է ծանոթանալ միայն ֆեյսբուքյան իր պաշտոնական էջից: Հիշեցնենք, որ փետրվարյան իրադարձություններից անմիջապես հետո Օսկանյանը երկար ժամանակ լռեց: Մինչ Սահմանադրական փոփոխությունների նախագծի՝ Ազգային ժողով մտնելը նա ֆեյսբուքյան իր էջում վերջապես խախտեց երկարատև լռությունը և հայտարարեց, որ դեմ է այդ փոփոխություններին` վիճահարույց համարելով խորհրդարանական տիպի կառավարումը:

Օսկանյանն անգամ ներկայացրեց տասը պատճառ սահմանադրական փոփոխություններին «Ոչ» ասելու համար: Չնայած ժամանակ առ ժամանակ գրվող ֆեյսբուքյան նմանօրինակ գրառումներին` Օսկանյանն այդպես էլ չներկայացավ քվեարկությանը և չօգտվեց իր մանդատից իր իսկ կողմից այդքան քննադատվող նախագծին «դեմ» քվեարկելու համար: Նման խուսափողական քայլի դիմեցին նաև քոչարյանական թևի ներկայացուցիչներ համարվող ԲՀԿ-ական Ստեփան Մարգարյանը և Էլինար Վարդանյանը, ովքեր, թեև ստատուսներով չէին մերժել նախագիծը, սակայն Օսկանյանի պես նախընտրեցին քվեարկության օրը չգալ խորհրդարան, ինչպես ասում են` մնալով «շառից-փորձանքից հեռու»: Սակայն, ի տարբերություն Օսկանյանի, այդ երկու պատգամավորները չկարողացան խուսափել «շառից ու փորձանքից». ԲՀԿ-ն նրանց կարգազանցությամբ համար հանեց միջազգային կառույցներում հայաստանյան պատվիրակությունների կազմից: Այս քառօրյային, ահա, պատգամավորները վերադարձան իրենց օրենսդրական գործունեությանը, Օսկանյանն անգամ եկավ խորհրդարան, ինչը զարմացրեց լրագրողներին, քանի որ նրան փետրվարյան դեպքերից հետո տեսել էին ընդամենը մի քանի անգամ: Մենք էլ փորձեցինք Օսկանյանից տեղեկանալ, թե ուր էր նա քվեարկության օրը, ինչու խուսափեց գալ, սակայն Օսկանյանը նախընտրեց լռել: Պատասխանելով լրագրողներից մեկի հարցին, թե արդյոք պատրաստվում է կուսակցություն ստեղծել, Օսկանյանը խնդրեց չշտապել և պահել ինտրիգը: Որևէ այլ հարցի Օսկանյանը չցանկացավ պատասխանել:

Իսկ քառօրայից անմիջապես հետո նա, սովորության համաձայն, Facebook-ում անդրադարձավ սահմանադրական փոփոխություններին և ներկայացրեց վտանգները:

Նա մասնավորապես գրեց.

«Իմ՝ դեմ լինելու առանցքային պատճառն այն է, որ առաջարկվող սահմանադրությունը հետքայլ է Հայաստանում արդեն իսկ փխրուն ժողովրդավարությունից: Ժողովրդավարության աստիճանը որոշվում է նրանով, թե ինչքանով է ժողովուրդը մասնակից լինում որոշումների կայացմանը և կառավարմանը:

Ժողովրդավարության օրրան Աթենքում նույնիսկ կենցաղային հարցերին վերաբերող որոշումները կայացվում էին ամբողջ ժողովրդի մասնակցությամբ: Հետագայում, ելնելով կյանքի իրողություններից և գործնականությունից, այս մոտեցումը հարմարեցվեց և հասցվեց ներկայացուցչական ժողովրդավարության գաղափարին՝ հասնելով մեր օրերը:

Առաջարկվող սահմանադրությունը ժողովրդին էապես հեռացնում է և՛ քաղաքական, և՛ որոշումների կայացման գործընթացներից՝ ժողովրդի դերը հասցնելով նվազագույնի»: Բնականաբար ողջունելի է, որ քաղաքական գործիչն իր դիրքորոշումները հայտնում է սոցցանցերում, սակայն չպետք է մոռանալ, որ ի տարբերություն խորհրդարան չանցած բազմաթիվ քաղաքական գործիչների, որոնց միակ հարթակը մնում է Facebook-ը, Օսկանյանն ունի խորհրդարանական ամբիոնից իր մտքերn արտահայտելու բացառիկ հնարավորություն: Իսկ թե ինչու Օսկանյանը չօգտվեց սահմանադրական նախագծի վերաբերյալ Ազգային ժողովում տեսակետ հայտնելու, նախագծի հիմնական և հարակից զեկուցողներին հարցախեղդ անելու, հայտարարությամբ հանդես գալու և վերջապես քվեարկությամբ իր տեսակետը դակելու իրավունքից, մնում է չբացահայտված: Իսկ այս պահին մենք ունենք այն, ինչ ունենք, Օսկանյանը շարունակում է մենախոսել Facebook-յան իր էջում, չի շփվում լրագրողների հետ, իսկ եթե անգամ գալիս է Ազգային ժողով, նստում է դահլիճում, սակայն մի քանի ժամ անց սուսուփուս հեռանում` այդպես էլ ոչինչ չասելով:

Լիլիթ Լալայան