Փխենյանը բարեկամական ձեռք է մեկնել Սեուլին

Հենրի Քիսինջերը, որը 2015 թվականին անցկացված հարցման համաձայն՝ ճանաչվել է ԱՄՆ վերջին 50 տարվա ամենաարդյունավետ պետքարտուղարը և, փաստորեն, միակը, որ արժանացել է Նոբելյան մրցանակի, բավական հետաքրքիր դիտարկմամբ է հանդես եկել՝ Հյուսիսային Կորեայի հետ կապված: Ավելի ճիշտ՝ մանրամասնել է, թե ինչ կպատահի աշխարհում, եթե ԱՄՆ ներկայիս վարչակազմին չհաջողվի խափանել Փխենյանի միջուկային ծրագիրը:

«Հարավային Կորեան երբեք չի համաձայնի, որպեսզի միայն հյուսիսը միջուկային զենք ունենա: Նույնը՝ Ճապոնիայի դեպքում կլինի: Իսկ եթե նաև նրանք դրան հասնեն՝ դա արդեն էսկալացիայի կհանգեցնի Չինաստանի և Ռուսաստանի հետ, որոնք իրենց սահմանի մոտ չեն հանդուրժի նման իրավիճակ: Նշանակում է՝ անհրաժեշտ է ուժեղացնել ճնշումը Հյուսիսային Կորեայի նկատմամբ, որպեսզի դա չպատահի: Հակառակ պարագայում՝ կձևավորվի նոր համաշխարհային դրություն, որի հետ վարչակազմը ստիպված կլինի գործ ունենալ»,–հայտարարել է Քիսինջերը, որի խոսքին ամբողջ աշխարհում են մեծ ուշադրությամբ հետևում:

Փխենյանում, սակայն, բոլորովին այլ տեսակետ ունեն խնդրո առարկայի վերաբերյալ: Հենց նույն օրը, երբ Քիսինջերը Թրամփին առաջարկում էր ուժեղացնել ճնշումը Փխենյանի նկատմամբ, վերջինիս առաջնորդ Կիմ Չեն Ինը միասնական կորեական ազգին ուղղված ելույթով հանդես եկավ, որում Սեուլին առաջարկեց ուժեղացնել խաղաղությանն ուղղված ջանքերը և միավորվել ընդդեմ ԱՄՆ–ի:

Մի երկրի, որը Ինի ներկայացմամբ՝ «միջուկային պատերազմ է սադրում, վտանգավոր կայծ բռնկում և տառապանք բերում Կորեական թերակղզի»:

«Մեր բոլոր հայրենակիցները պիտի վահան և մոնոլիտ ամբարտակ դառնան այս հողում՝ միասնական ազգի անվտանգության համար»,– հայտարարել է Հյուսիսային Կորեայի առաջնորդն՝ ընդգծելով, որ Փխենյանի միջուկային փորձարկումներն ամենևին ուղղված չեն Սեուլի դեմ և չեն կարող նույն ազգի 2 հատվածների միջև խաղաղության խոչընդոտ դառնալ:

Հետաքրքիր է, որ Կիմ Չեն Ինը, երկար դադարից հետո, խոսել է նաև երկու ժողովուրդների վերամիավորման մասին՝ առաջարկելով այդ գործընթացը կազմակերպել առանց արտաքին միջամտության և առաջնորդվել 2000 թ. հունիսի 15–ին Սեուլի և Փխենյանի միջև ստորագրված Հռչակագրով: Վերջինս, ի դեպ, ստորագրվել էր Փխենյանում՝ միջկորեական երկու համաժողովների անցկացման արդյունքում, և շատ կոնկրետ քայլեր էր նախատեսում, որոնց կյանքի կոչումն Կիմ Չեն Ինը խոստացել է հենց այս պահին ապահովել:

Ըստ այդմ՝ առաջարկվում է հումանիտար շփումներ հաստատել Փխենյանի և Սեուլի միջև, երկու երկրների քաղաքացիներին ցամաքային, ծովային և օդային ազատ փոխադրման հնարավորություն ընձեռել, ակտիվացնել քաղաքական, տնտեսական շփումները և այլն: Կիմ Չեն Ինն, այսպիսով, առաջարկում է չտրվել նոր սադրանքների, չտագնապել և ընդհանրապես՝ անել ամեն ինչ, որպեսզի 2018–ը խոշոր շրջադարձի, ահռելի իրադարձությունների տարի լինի: Տարի, որն առանձնահատուկ կփայլի միացյալ հայրենիքի տարեգրության մեջ:

Ի դեպ, Հյուսիսային Կորեայի առաջնորդի այս պաթետիկ և բաց տեքստով խոսքին Սեուլում դեռ չեն արձագանքել: Փորձագետները նշում են, թե լավ է, որ Ձմեռային օլիմպիական խաղերին՝ Փխենյանի հրավերն Սեուլն այս ելույթից առաջ էր արել, որովհետև Սպիտակ տունն այն անպայման որպես Կիմ Չեն Ինի ուղերձի պատասխան կընկալեր՝ խնդիրներ հարուցելով նաև Հարավային Կորեայի համար: Մյուս կողմից էլ՝ Սեուլն, իհարկե, չի կարող ժամանակն անվերջ ձգել` չպատասխանելով Փխենյանին, և բնական է, որ այս պահին բոլորն են հետաքրքրված դրա բովանդակությամբ:

 

Գոհար Սիմոնյան