Երևանի քաղաքապետարանը գործում է սոցիալապես անապահով խմբի շահերից ելնելով

«Փաստ» օրաթերթը գրում է

 

Տարիներ շարունակ երաժշտական ու արվեստի դպրոցների ոլորտը կանոնակարգված չի եղել: Տարբեր դպրոցներ սահմանել են տարբեր վարձավճարներ: Շատ դեպքերում դրանք աշխատել են նույն ծրագրերով, սակայն ինչ–որ գործոններ դնելով հիմքում, սահմանել են տարբեր գներ:

Արդյունքում, դաշտն ուսումնասիրելուց հետո սահմանվել է միջին խելամիտ գին: Արդյունքում, մի շարք դպրոցներում վարձավճարն էժանացել է, որոշներում՝ կանոնակարգվել: Սակայն սրանով քաղաքապետարանը չի սահմանափակվել ու հայտարարել է, որ մինչև 1000 երեխայի՝ սոցիալապես անապահով խմբերից, պատրաստ է աջակցել:

Մարդու աշխարհայացքը ձևավորվում է մի քանի բաղադրիչներից։ Դրանցից առավել կարևորներից է մարդու՝ երեխայի համաչափ զարգացումը և ներդաշնակ ապրելակերպը։ Այդ ներդաշնակության համար խիստ անհրաժեշտ է մշակութային դաստիարակությունը և կրթությունը։ Մշակույթ բառն ունի մի քանի իմաստներ ու ընկալումներ։ Դրա կարևոր ընկալումներից մեկն էլ հումանիտար կամ հոգևոր ասպեկտն է։ Երբ մենք ասում ենք հոգևոր, այն երբեմն շփոթում ենք կրոնական կրթության հետ։ Սակայն իրականում, կրոնականը սոսկ բաղադրիչ է։

Հոգևոր կրթության հիմնական մասերից են արվեստը, երաժշտությունը, մշակութաբանությունը և այլն։ Սրանք օգնում են երեխային ձևավորել համամարդկային արժեքային դաշտ ու մտածողություն, ծանոթանալ իրական արժեքային հենքերի հետ՝ ինչպես ազգային, այնպես էլ համաշխարհային մշակույթի ասպեկտներում։

«Տեղական տուրքերի և վճարների մասին» ՀՀ օրենքի փոփոխություններից հետո Երևանի ավագանին որոշել էր մայրաքաղաքի երաժշտական և արվեստի դպրոցներում միասնական վարձավճար սահմանել՝ 8 հազար դրամ։ Մի քանի երեխա ունեցող ծնողների համար բավականին շոշափելի էր դառնում ամսավճարը։

Հետագայում, քաղաքապետ Տարոն Մարգարյանը, հաշվի առնելով, որ դա լրացուցիչ բեռ կարող է առաջացնել վերոնշյալ հաստատություններ հաճախող երեխաների ծնողների համար, վստահեցրել էր, որ քաղաքապետարանը պատրաստ է շուրջ 1000 աշակերտի համար սահմանել վարձավճարի արտոնություն, իսկ անհրաժեշտության դեպքում նաև կրկնապատկել այդ թիվը: Նախօրեին աշխատանքային խորհրդակցության ժամանակ Տարոն Մարգարյանին զեկուցել են, որ 510 դիմող արդեն ստացել է վարձավճարի արտոնություն:

Ոմանք անտեղյակությունից փորձեցին արհեստական աղմուկ բարձրացնել, բայց քաղաքապետարանի թիմը հրապարակային բացատրեց, թե ինչին են միտված այս բարեփոխումները:

Կային մարդիկ, որ պնդում էին, թե մեծ ալիք է բարձրանալու, հազարավոր մարդիկ են դիմելու այս օգնությունից օգտվելու համար: Փաստը մնում է այն, որ դիմել է ընդամենը 510 քաղաքացի: Այսինքն ստացվում է, որ ոմանք փորձում էին խաղաղ ծովում փոթորիկ տեսնել:

Մոտ ապագայում, թերևս, այս թիվը փոքր–ինչ կավելանա։ Որոշումը խստիվ կառուցողական է մի քանի առումներով։ Նախ այն օգնության ձեռք է մեկնում մի քանի երեխա ունեցող ընտանիքներին։ Նմանատիպ ընտանիքը հասկանում է, որ իր երեխաների համաչափ զարգացումը միայն իր խնդիրը չէ և համայնքային իշխանությունը ևս անմասն չէ։

Մյուս կողմից, սոցիալական ծանր վիճակը խոչընդոտ չի հանդիսանում ընտանիքների համար, որպեսզի նրանց երեխաները, իրենց հասակակիցների հետ համատեղ, ստանան իրական կրթություն՝ բավարարելով իրենց հումանիտար պահանջմունքները։ Հաստատապես համոզված ենք, որ այս ծրագիրը և օգնությունը կլինեն շարունակական։

 

Արամ Սիմոնյան