Տիգրան Քեյան. «Շարժական սարքերի ներդրմամբ ՃՈ–ն ապացուցում է, որ արագաչափ սարքերը նպատակին չեն ծառայում»

«Փաստ» օրաթերթը գրում է 

 

Փետրվարի 8–ից շարժական լուսանկարահանող–արագաչափ սարք կկիրառվի: Այս մասին հայտարարել է Ճանապարհային ոստիկանությունը: Հայտարարության մեջ ընդգծվել է, որ սարքը կկիրառվի պատահարների նախականխման ուղղությամբ իրականացվող միջոցառումների շրջանակներում: Բացի այդ՝ հաշվի է առնվել այն, որ 2018 թ. Հայաստանում տեղի ունեցած ծանր հետևանքներով պատահարների հիմնական պատճառներից մեկն արագության ռեժիմի խախտումներն են:

«Վարորդի ընկեր» ԻՀԿ նախագահ Տիգրանը Քեյանի կարծիքով, եթե շարժական սարքեր նպատակային կիրառվեն, ապա այդ փաստը քաղաքացիներին որոշակի առումով կստիպի օրենքի պահանջներին համապատասխան երթևեկել:

«ՃՈ–ն այս ուղղությամբ ի սկզբանե պետք է մտածեր: Շուրջ 6 տարի անց իրենք նոր հասկացան, որ արագաչափերն անիմաստ էին և նպատակին չծառայեցին: Մենք բազմիցս ենք ասել, որ թե՛ Երևանում, թե՛ մարզերի որոշ հատվածներում տեղադրված արագաչափ սարքերն անիմաստ են: Արագաչափերը վարորդին չեն ստիպում երթևեկել կանոններով և զուտ խախտումներ արձանագրելու և գումարներ հավաքագրելու միջոց են:

Առհասարակ ՃՈ ոստիկաններն իրենց աշխատանքը կատարելուց պետք է շարժման մեջ լինեն, և ոչ թե կանգնած ծառայություն կատարեն: Վարորդները նրանց կանգնած տեղերն անգիր գիտեն: Բացի այդ՝ գիտեն, թե որտեղ են թաքնվում: Գալիս ու անցնում են այդ հատվածները և կրկին գերազանցում արագությունը: Իսկ եթե ծառայությունը շարժման մեջ իրականացվեր, դա վարորդներին կստիպեր չգերազանցել արագությունը, և վթարները կկանխվեին: Բայց եթե մեքենաները շարժման մեջ չեն կատարելու իրենց աշխատանքը, ոչինչ չի փոխվելու»,– «Փաստ»–ի հետ զրույցում ասաց Տիգրանը Քեյանը:

Նրա խոսքով՝ ՃՈ–ի վերոնշյալ հայտարարությունը փաստում է՝ հենց իրենք են ասում, որ արագաչափերը նպատակին չեն ծառայել և վթարները չեն կանխվել:

«Նախկինում ասում էին՝ արագաչափ սարքերը տեղադրվում են, որ վարորդներին ստիպեն չգերազանցել արագությունը և վթարներ չլինեն: Բազմիցս հայտարարել են, որ տեսանկարահանող սարքերի արդյունքում վթարների քանակը նվազել է, մահացու դեպքերը՝ ևս:

Բայց շարժական համակարգի ներդրմամբ ՃՈ–ն ապացուցում է, որ իրենց տեղադրած արագաչափ սարքերը նպատակին չեն ծառայում: Նոր են իրենք փորձում հոգ տանել անվտանգության մասին և այդ նպատակով նոր համակարգ են ներդնում: Եթե այն իրապես գործի, ես շատ գոհ կլինեմ»,– նշեց նա՝ ընդգծելով, որ շարժական սարքերը եվրոպական շատ երկրներում են կիրառվում, թեպետ արդյունքների մասին հստակ տվյալներ չունի:

«Ի սկզբանե ճիշտ կլիներ, որ ՃՈ–ն շրջիկ ծառայություն մատուցեր: Արագաչափ սարքերի դեպքում անձի հետ անմիջական շփում չկա: Շատ դեպքեր են եղել, երբ մարդը վատ վիճակում գտնվող ուղևոր է տեղափոխել բուժհաստատություն: Տվյալ դեպքում, եթե ՃՈ–ն նորմալ շրջիկ ծառայություն մատուցի, կտեսնի, որ անձը թեև գերազանցում է արագությունը, բայց դրա համար պատճառ ունի:

Կհասկանա իրավիճակը և կկարողանա նաև օգնել: Մենք նման շատ դեպքերի ենք ականատես եղել: Իսկ տվյալ պարագայում արագաչափերը չեն կարողանում գնահատել, թե անձն ինչու է գերազանցում արագությունը: Վարորդը ստիպված է լինելու տուգանք վճարել, կամ էլ բուժօգնությունից հետո վազվզել բուժհաստատություններով, որ տեղեկանք բերի ու ներկայացնի վարչական մարմին: Այստեղ նաև կոռուպցիոն ռիսկերն են շատանում: Այսինքն՝ շատ անձինք արագությունը գերազանցելուց կարող են չարաշահել այդ մոտեցումը: Հիմա ի՞նչ տարբերություն՝ ոստիկանական մեքենա՞ն է շարժի մեջ ֆիքսում արագությունը, թե այդ շարժական սարքերը:

ՃՈ համակարգն այսօր բավականին մեծ ռեսուրս ունի: ՃՈ տեսուչների թիվը բավական է, որ բոլոր ճանապարհները վերահսկեն: Ցանկացած անձ, ով տեսնում է իր դիմաց ոստիկանական մեքենա է երթևեկում, երբեք չի գերազանցի արագությունը»,– եզրափակեց մեր զրուցակիցը: