Վրաստանի ներքաղաքական լարվածության արմատներն ու հետագա խորացումները՝ ըստ վրացագետ Ալիկ Էրոյանցի

МЕЖДУНАРОДНОЕ 31 Октябрь, 2015 23:15

Մեկնաբանելով Վրաստանի ներքաղաքական լարվածությունը՝ վրացագետ Ալիկ Էրոյանցը Past.am-ի hետ զրույցում նշեց, որ նախագահ Մարգելաշվիլիի և վարչապետ Ղարիբաշվիլիի հակասությունները տարիների պատմություն ունեն:

Ըստ վրացագետի՝ նախագահն ու վարչապետը նույնիսկ անձնական շփում չունեն, հանդիպումների ժամանակ չեն էլ բարևում:

«Այդ հակասությունները գալիս են նախընտրական շրջանից: Քարոզարշավի ժամանակահատվածում Մարգվելաշվիլին հայտարարում էր, որ Հավլաբարում գտնվող նախագահական նստավայր չի տեղափոխվելու, այն օգտագործվելու է կրթության նախարարության կարիքների համար: Նախագահ դառնալուց հետո նա մտափոխվեց»,- նշում է Ալիկ Էրոյանցը:

Էրոյանցի խոսքով՝ հակասության պատճառ է նաև այն, որ Մարգելաշվիլին իր խորհրդական նշանակեց նախկին իշխանության ներկայացուցիչներից մեկի եղբորը, ինչի պատճառով քննադատության արժանացավ հենց իր թիմում՝ «Վրացական երազանք» կոալիցիայում, հատկապես Բիձինա Իվանիշվիլիի կողմից, ով հայտարարել է, թե Մարգելաշվիլին ընտրություններից հետո և առաջ տարբեր մարդ է: Ալիկ Էրոյանցը հավելեց, որ Բիձինա Իվանիշվիլիի տրամադրությունները փոխանցվել են նաև «Վրացական երազանքի» մյուս անդամներին:

«Կարծում եմ՝ օբյեկտիվ են այդ քննադատությունները, որովհետև հայտարարություններ կան, որոնք հնչել են Մարգելաշվիլիի կողմից, որոնցից հետո նա ցույց է տվել իր անսկզբունքային լինելը: Գործող նախագահի և վարչապետի հակասություններն արտահայտվում են գրեթե բոլոր իրավիճակներում» ,- փաստում է մեր զրուցակիցը:

Ա. Էրոյանցի կարծիքով՝ Մարգելաշվիլի- Ղարիաբաշվիլի հակասություն դեռ կխորանա, այն կարող է ձգվել մինչև նրանցից մեկի պաշտոնաթողությունը: Էրոյանցի համոզմամբ՝ Վրաստանի նախագահը մեկուսացել է այն թիմից, որը նրան բերեց իշխանության: Անդրադառնալով «Ռուսթավի-2» հեռուստաընկերության հետ կապված իրավիճակին՝ Վրաստանի հարցերով փորձագետն ասաց, որ այդ հեռուստաընկերության հետ կապված դատական քաշքշուկը նույնպես քաղաքական լարվածության պատճառ է:

Հիշեցնենք, որ հեռուստաընկերության նախկին սեփականատեր Կիբար Խալվաշին դատարան է դիմել՝ հեռուստաընկերության իր բաժնեմասերը վերականգնելու պահանջով:

«Ինչպես գիտենք, «Ռուսթավի-2»-ը համարվում է Վրաստանի նախկին նախագահ Միխայիլ Սաակաշվիլիի «Միացյալ ազգային շարժում» կուսակցության խոսափողը: Բնական է, որ «Միացյալ ազգային շարժման» անդամները հայտարարում են, որ այս կերպ իշխանությունները փորձում են իրենց ճնշումների ենթարկել:

Հավելեմ, որ երկրի բոլոր քաղաքական ուժերն ու հասարակական կազմակերպությունները հայտնել են իրենց մոտեցումները հարցի շուրջ: Միջազգային արձագանք ևս կա: Անգամ ԱՄՆ Պետդեպի ներկայացուցիչն է արձագանքել՝ կոչ անելով անել ամեն բան, որ դատական վճիռը լինի արդար:

Այնուամենայնիվ, դատարանի վճռով հեռուստաընկերությունը պետք է փակվի, իսկ Սաակաշվիլին պնդում է, սա Իվանիշվիլիի անձնական նախաձեռնությունն է՝ ուղղված իր դեմ»,- մեկնաբանում է վրացագետը՝ ավելացնելով, որ այս լարվածությունը պայմանավորված է 2016-ի խորհրդարանական ընտրություններով:

Լևոն Փանոսյան