Միավորվել են Արթուր Բաղդասարյանենց հետ՝ երկրում մի բան փոխելու համար, բայց պարզվել է, որ չեն կարող նույն ձևով մտածել

«Փաստ» օրաթերթի փետրվարի 9-ին լույս տեսած թիվ 23 (275) համարում անդրադարձել էինք ՀՎԿ-ից 5 կուսակցությունների դուրս գալու մասին հայտարարությանը: Նշել էինք նաև, որ մեզ չէր հաջողվել կապ հաստատել այդ կուսակցությունների ղեկավարների հետ և այդ իսկ պատճառով էլ չէինք ներկայացրել նրանց տեսակետը:

Հոդվածի հրապարակումից հետո «Հայոց հայրենիք» կուսակցության նախագահ Անահիտ Եղոյանը արձագանքել էր «Փաստի» հոդվածին նշելով, որ իրենք կան, գոյություն ունեն, սակայն ՀՎԿ-ից դուրս գալուց հետո միայն կկարողանան որպես առանձին կուսակցություն հանդես գալ:

«Ինչպես «Կուսակցությունների մասին» ՀՀ օրենքի համաձայն վերակազմավորվել ենք և հիմնադրել ենք «Հայկական վերածնունդ կուսակցությունը», այնպես էլ վերակազմակերպման իրավունքով կարող ենք առանձնանալ: Այդ որոշումը մենք կայացրել ենք մեր կուսակցության կենտրոնական կոմիտեում, որից հետո մյուս կուսակցությունների հետ ենք հարցը քննարկել և ապա ՀՎԿ-ից դքուրս գալու մասին հայտարարություն ենք տարածել»,- past.am-ին ասաց Անահիտ Եղոյանը:

Փաստորեն, ընրություններից առաջ միավորվելու որոշում կայացրած կուսակցություններն արդեն հետընտրական պրոցեսում տեսնելով, որ իրենց ծրագրերը չեն կարողանում իրականացնել, որոշել են առանձնանալ, ինչը ճիշտ քայլ են համարում:  «Հայոց հայրենիք» կուսակցության ղեկավարը նշեց նաև, որ 5 կուսակցություններին ամենևին էլ ՀՎԿ-ի ֆիասկոն չի հիասթափեցրել, քանի որ ակտիվ աշխատանքի համար ամենևին էլ պարտադիր չէ պատգամավորի մանդատ ունենալ:

«Մեր կուսակցության հիմնական նպատակը խորհրդարան մտնելը չէր: Եթե այդպես լիներ, ապա ընտրություններից անմիջապես հետո կհայտարարեինք ՀՎԿ-ից դուրս գալու մասին, սակայն  հիմա ենք փորձում դուրս գտալ այդ ճահճից: Մենք կարող ենք մեր ծրագրերն իրականացնել խորհրդարանից դուրս: Եվ այնպես չէ, որ ՀՎԿ-ն դուրս մնաց խորհրդարանից,մ մենք դա համարեցինք պարտություն և դուրս եկանք: Պարզապես, ինչպես բոլոր կուսակցությունները, այնպես էլ մենք, ունենք մեր գործելաոճը, որով էլ ցանկանում ենք առաջ շարժվել»,- ասաց Ա. Եղոյանը:

Նա նաև տեղեկացրեց, որ բոլոր 5 կուսակցություններն էլ ցանկություն ունեն վերաբացվել, բայց առանձին-առանձին գործունեություն կծավալեն, ինչպես մինչ ՀՎԿ-ի հետ համագործակցելն է եղել:

Ի դեպ, նրանք այդ մասին տեղեկացրել են նաև ՀՎԿ առաջնորդ Արթուր Բաղդասարյանին և սպասում են նրա որոշմանն ու ՀՎԿ-ի կողմից համագումար անցկացնելուն, որպեսզի հենց համագումարում էլ պաշտոնապես հայտարարվի իրենց որոշման մասին: Իսկ Արթուր Բաղդասարյանի կողմից նման նախաձեռնություն չդրսևորելու դեպքում, կուսակցությունները ստիպված կլինեն դիմել դատարան:

«Միայն դատարանը կարող է իր որոշումով պարտադրել, որ ՀՎԿ առաջնորդը մեզ առանձնանալու հնարավորություն տա»,- ասաց Ա. Եղոյանը:

Նա նաև նշեց, որ կուսակցությունների վերակազմավորման ժամանակ բոլոր կուսակցություններն էլ տարբեր գաղափարախոսություն են ունեցել: Եվ թեև լիբերալները, ձախերն ու սոցիալիստները փորձել են մի կողմ թողնել իրենց գաղափարախոսական տարբերությունները, սակայն մեկ կաթսայում բոլորի գաղափարները «եփել» այդպես էլ չի հաջողվել:   

«Միավորվեցինք , որպեսզի կարողանանք երկրում մի բան փոխել, բայց հետո պարզվեց, որ չենք  կարող բոլորս նույն ձևով մտածել: Ներկա պայմաններում մեր կուսակցության ծրագիրը, կարծում եմ,  ոչ բոլորին դուր կգա, բայց մեր կողմից առաջարկվող կառավարման մոդելը գործում է Գերմանիայում, Մեծ Բրիտանիայում, Նիդերլանդների Թագավորությունում և կարող է երկիրը դուրս բերել ճգնաժամային իրավիճակից»,- ասաց Ա. Եղոյանը:  

Թե քանի անդամ ունի «Հայոց հայրենիքը», քաղաքական ուժի առաջնորդը դժվարացավ ասել, քանի որ ՀՎԿ-ից առանձնանալու հետ կապված բոլոր հարցերը լուծելուց հետո միայն կկարողանա այդ հարցին պատասխանել:

«ՀՎԿ-ի հետ միավորվելուց հետո որոշակի տարաձայնություններ կային մեր կուսակցության ներսում: Այնպես որ, առանձնանալուց և վերաբացվելուց հետո նոր կհայտարարենք մեր անդամների և գործունեության մասին: Եվ այդ ժամանակ ոչ թե լրագրողները կհայտարարեն, որ չեն կարողանում մեր գրասենյակը գտնել, այլ ամեն ինչ կլինի պարզ և թափանցիկ»,- ասաց Ա. Եղոյանը:

Արմինե Գրիգորյան