Գուրգեն Հովհաննիսյան. «Հայաստանը պատերազմի մեջ ներքաշելու հավանականությունը շատ քիչ է»

Ըստ արևելյան ավանդության, փետրվարի 16-ից սկսվել է 2018 թվականը՝ հողե դեղին շան տարին և այն կշարունակվի մինչև 2019-ի փետրվարի 5-ը: Տարին համարվում է Մերկուրի մոլորակի տարի: Այս տարի ավելի երջանիկ և հաջողակ լինելու համար պետք է ավելի ռացիոնալ լինել որոշումներ ընդունելիս և հաշվարկներ կայացնելիս, իսկ նոր բացված ճանապարհներից մաքսիմալ դրական արդյունք ստանալու համար հարկավոր է դիվանագիտական առավելագույն ճկունություն ցուցաբերել:

Նկարիչ, աստղաբան, էզոթերիկ Գուրգեն Հովհաննիսյանը Past.am-ի հետ զրույցում նշեց, որ յուրաքանչյուր տարեմուտին աստղաբանները նոր կանխատեսումներ են ներկայացնում հաջորդ տարվա ընթացքում սպասվող իրադարձությունների մասին: Նրանք, ովքեր անցած տարիների խնդիրները, դժվարությունները, տառապանքը, ցավը չեն «ներմուծում» նոր տարի, ապա կարողանում են ավելի լայնորեն օգտվել նոր տարվա ընձեռած հնարավորություններից:

«Բոլոր գերտերություններն այսօր լայնորեն օգտագործում են փիլիսոփայական և էզոթերիկ յուրաքանչյուր գիտելիք, սակայն հայերիս համար դա համարվում է պարապ զբաղմունք: Հայերիս համար հարցերին փիլիսոփայության տեսանկյունից մոտենալը խորթ է դարձել վերջին 500-600 տարիների ընթացքում, որի պատճառով մենք բավականին հնարավորություններ ենք կորցրել և շարունակում ենք մինչ օրս կորցնել, իսկ Չինաստանը, մեր աչքի առաջ ընդամենը 50 տարվա ընթացքում կիրառելով իր հնամենի իմաստությունը՝ մետաֆիզիկան, կարողացավ իր հին ավանդույթները պահպանելով դառնալ բավականին հզոր և ազդեցիկ երկիր ողջ մոլորակի վրա»,- ասաց Գ. Հովհաննիսյանը:

Ինչ վերաբերում է Հայաստանին, ապա այս տարվա ընթացքում ծավալվող իրադարձությունները կպայմանավորեն հետագա 15-17 տարիները: Եվ քանի որ 2018-ին Հայաստանին բաժին ընկնող էներգիայի պաշարն անհամեմատ շատ է, ուստի դժվարությունները նույնպես շատ են, բայց ոչ անհաղթահարելի:

«Դժվարությունները հաղթահարելի են ճիշտ այնքան, ինչքան որ մենք ի վիճակի ենք հաղթահարել ու դրանով իսկ ուժեղանալ: Այս ամենի մասին գիտեն նաև Հայաստանի հանդեպ թշնամաբար տրամադրված երկրները: Հետևաբար իրենք էլ իրենց հերթին պետք է ճնշումն ուժեղացնեն, որպեսզի մենք հապաղենք մեր որոշումները կայացնելու ժամանակ, թուլանանք, ընկնենք ինքնախղճահարության մեջ: Տարիներ շարունակ այդ աշխատանքը տարվել է ոչ միայն թշնամաբար տրամադրված երկրների, այլև տգետ մարդկանց միջոցով: Սակայն պետք է իմանալ, որ բողոքելով ոչ մի խնդիր չի լուծվում, դա պարզ երևում է վերջին 25 տարիների վերլուծությունից»,- ասաց Գ. Հովհաննիսյանը:

Անդրադառնալով վերջին շրջանում քաղաքագետների կողմից Հայաստանը պատերազմական գործողությունների մեջ ներքաշելու մասին չդադարող խոսակցություններին, նա նշեց, որ դա հիմնականում պայմանավորված է ձմռան ամիսների ընթացքում մարդկանց մոտ կուտակված դեպրեսիոն տրամադրությունների և անցյալ տարվանից մնացած հին էնեգիան սպառելու անհրաժեշտության հետ:

«Ըստ կանխատեսման, 2018 թվականին Հայաստանը պատերազմական գործողությունների մեջ ներքաշելու հավանականությունը շատ քիչ է, իսկ պատերազմի մասին տագնապային տրամադրություններին տրվելն անիմաստ էներգիայի վատնում է: Ինչ վերաբերում է ընդհանրապես պատերազմելուն, որը նախկինում կարող էր էվոլյուցիոն թռիչք ապահովել, հիմա, նոր հասարակարգում ՝ Ջրհոսի դարաշրջանում, պատերազմի ու տառապանքի էներգիան շատ վտանգավոր է պետությունների համար: Ու թեև 2014 թվականից աշխարհը պատրաստվում է նաև 3-րդ համաշխարհային պատերազմի, բայց, ինչպես տեսնում ենք, այն տեղի չի ունեցել և չի էլ ունենա, քանի որ ողջ մարդկությունը բոլորովին այլ գաղափարական դաշտում է գտնվում»,- ասաց աստղաբան, էզոթերիկ Գ. Հովհաննիսյանը:

 

 

 

Արմինե Գրիգորյան