Նաիրա Զոհրաբյանը՝ «Ելքից» «կորած» ձայների մասին

Այսօր ԱԺ-ում տեղի ունեցավ Բարձրագույն դատական խորհրդի անդամների ընտրությունը: Եվ չնայած «Ելք» խմբակցությունը հայտարարել էր, որ իրենք դեմ են քվեարկելու Գագիկ Հարությունյանի թեկնածությանը, սակայն փակ, գաղտնի քվեարկությանը մասնակցած 98 պատգամավորներից միայն 2 պատգամավոր էր դեմ քվեարկել Գագիկ Հարությունյանին:

«Ելք»-ի պատգամավոր,  ՀՀ ԱԺ վերահսկիչ հանձնաժողովի անդամ Լենա Նազարյանը չէր բացառել վարկածը, թե ինչ-որ «դեմ» քվեաթերթիկները փոխարինել է «կողմ»-երով, որպեսզի պառակտում մտցնի իրենց խմբակցությունում, իսկ «Ելք» խմբակցության ղեկավար Նիկոլ Փաշինյանն էլ պաշտոնապես հայտարարել էր, որ այդ քվեարկությունը «ժուլիկության» հետևանք է:

«Քվեարկությանը մասնակցած «Ելք» խմբակցության բոլոր անդամները դեմ են քվեարկել, և մենք ընթացակարգերը պետք է նայենք, ոչ մի խոչընդոտ չկա: Թող քրեական գործ հարուցվի, և մեր խմբակցության անդամները վկայի կարգավիճակով հարցաքննվեն: Նրանք ցուցմունք կտան, որ դեմ են քվեարկել Գագիկ Հարությունյանին»,- ասել է Ն.Փաշինյանը:

«Ծառուկյան» դաշինքի պատգամավոր Նաիրա Զոհրաբյանը, ինչպես վարման կարգով ԱԺ-ում ելույթի ժամանակ էր նշել, Past.am-ի հետ զրույցում էլ ասաց, որ միայն տեղյակ է, թե ինչպես են քվեարկել «Ծառուկյան» խմբակցության անդամները, իսկ մյուս խմբակցությունների մասին նա տեղեկություն չունի:

«Հաշվիչ հանձնաժողովում ներկայացված «Ծառուկյան» դաշինքի անդամները հստակ հսկել են, որ հաշվարկը ճիշտ կատարվի: Վստահեցնում եմ, որ հաշվիչ հանձնաժողովի մեր խմբակցության որևէ անդամ չէր կարող որևէ մանիպուլիացիայի մասնակից լինել, կամ նրանց աչքից չէր կարող որևէ բան վրիպել: Իսկ թե ինչպես է պատահել, որ 7 «դեմ»-ի փոխարեն նշյալ թեկնածուն ընդամենը 2 «դեմ» է ստացել, չեմ կարող ասել: Ես կարծում եմ՝ այդ հարցը պարզելու համար պետք է քվեարկած քվեաթերթիկների վերահաշվարկ կատարել»,- ասաց Նաիրա Զոհրաբյանը:

Նա հորդորեց պարզ հարցը հայոց հարց չսարքել և ընդամենը վերահաշվարկի միջոցով պարզել, թե որն է խնդիրը:Նա նշեց, որ կան նաև տեսագրություններ, և ցանկության դեպքում կարելի է նաև դրանք վերծանելով պարզել, թե ով ինչպես է քվեարկել:
Խոսելով մարտի 1-ի զոհերի մասին Արամ Մանուկյանի կողմից հնչեցրած գնահատականի մասի՝ թե իշխանությունները կապիկություն են անում և ցանկության դեպքում տասը տարում կարող էին մեղավորներին բացահայտել, Ն. Զոհրաբյանն ասաց, որ «Ծառուկյան» դաշինքը հստակ «կողմ» է քվեարկել, որպեսզի «Ելք» խմբակցության իրենց գործընկերների ներկայացրած՝ «Մարտի 1-2-ի իրադարձությունների» վերաբերյալ հայտարարության նախագիծն օրակարգ ընդգրկվի:

«Ինչով հնարավոր է աջակցել, «Ծառուկյան» դաշինքը կաջակցի, մնացածը իրավապահների գործն է: Իսկ «կապիկ», «օրանգուտան» և այլ գնահատականներ հնչեցնելու մասին, անկախ նրանից, թե ում է դա վերաբերում, ես ձեռնպահ կմնամ կարծիք հայտնելուց»,- ասաց Ն. Զոհրաբյանը:

Նա նշեց նաև, որ իր կարծիքով ևս 10 տարում հնարավոր էր բացահայտել, թե ովքեր են եղել իրական մեղավորները, սակայն այդ հարցի հասցեատերը ինքը չէ:
«Այդ հարցի հասցեատերը իշխանությունն է, և ես պետք է ձեզ խնդրեմ, որ ոչ միայն այդ հարցը, այլև բոլոր հարցերը, որոնք իշխանություններին են առնչվում, նրանց ուղղել: Ես ո՛չ նրանց դատապաշտպանն եմ, ո՛չ նրանց փաստաբանն եմ, ո՛չ էլ դրա ցանկությունն ունեմ»,- ասաց  պատգամավորը:

Արմինե Գրիգորյան