Թուրքիայում կշարունակվի ԱԶԿ-ի միանձնյա կառավարման շրջանը

 Թուրքիայի արտահերթ խորհրդարանական ընտրություններում ընտրատեղամասերի մեծ մասում հաշվարկներն արդեն արված են: Ընտրատեղամասերի 99,58 տոկոսի արդյունքներով՝ ձայների գերակշիռ մեծամասնությունը՝ 49,41 տոկոսը ստացել է վարչապետ Ահմեդ Դավութօղլուի գլխավորած «Արդարություն և զարգացում» կուսակցությունը (ԱԶԿ), որը նախկինում ղեկավÕ �րել է նախագահ Ռեջեփ Թայիփ Էրդողանը: Այս մասին տեղեկացնում է «Անադոլու» գործակալությունը:

ԱԶԿ-ն, այսպիսով, ապահովել է իր համար ցանկալի 316 պատգամավորական մանդատը, որը թույլ կտա կազմել միակուսակցական կառավարություն և ինչպես նախորդող 12 տարիներին, այնպես էլ առաջիկա տարիներին երկրի համար կարևոր որոշումներն ընդունել միայնակ: Միաժամանակ սա թույլ կտա Էրդողանին կատարել իր համար այդքան ցանկալի սահմանադրական փոփոխությունները, որով կընդլայնվեն երկրի նախագահի լիազորությունները:

Ընդդիմադիր քեմալական Հանրապետական ժողովրդական կուսակցությունը (ՀԺԿ) ստացել է ձայների 25,38 տոկոսը (134 պատգամավոր), «Ազգայնական շարժում» կուսակցությունը (ԱՇԿ)՝ 11,93 տոկոսը (41 պատգամավոր) և քրդամետ Ժողովուրդների դեմոկրատական կուսակցությունը (ԺԴԿ)՝ 10,70 տոկոսը (59 պատգամավոր):

Նախորդ ընտրությունների համեմատ ԱԶԿ-ին հաջողվել է ավելի քան 9 տոկոսով ավելացնել նախորդ՝ հունիսի 7-ի ընտրություններում ստացած ձայների քանակը: Պատգամավորական մանդատների թիվն ավելացել է նաև ՀԺԿ-ի մոտ՝ 132-ից հասնելով 134-ի: Փոխարենն ամենամեծ կորուստն ունեցել են ազգայնականները. ԱՇԿ-ն 80-ի փոխարեն այս ընտրություններից հետո մեջլիսում կունանա ընդամենը 41 պատգամավոր, իսկ ձախակողմյան ԺԴԿ-ն՝ նախկին 80-ի փոխարեն 59-ը: Սակայն վերջինս կարողացել է առաջին անգամ ընտրությունների արդյունքներով դառնալ Թուրքիայի 3-րդ կուսակցությունը՝ առաջ անցնելով երկրի քաղաք ական կյանքում իր ավանդական տեղն ունեցող ԱՇԿ-ից:

Ընտրությունների նախնական արդյունքների հրապարակումից հետո արդեն իսկ նախագահն ու կուսակցությունների ղեկավարները հանդես են եկել ելույթներով: Էրդողանը շնորհավորել է Դավութօղլուին և ԱԶԿ-ին՝ նշելով, որ նման արդյունքները «հզոր ուղերձ են անջատողական ահաբեկչական կազմակերպություններին»:

Դավութօղլուն համակիրների առջև ունեցած ելույթում նշել է. «Դուք այդ քվեատուփերում թաղել եք ոչ միայն հին Թուրքիայի կուսակցությունները, այլև հին Թուրքիայի մտածելակերպը, քաոսը, բռնությունը, ահաբեկչությունը, անկայունությունը»:

Քեմալական ՀԺԿ-ի առաջնորդ Քեմալ Քըլըչդարօղլուն էլ նշել է, որ թեպետ իրենց մանդատներն ավելացել են, սակայն իրենք ընտրությունների արդյունքներից գոհ չեն:

ԺԴԿ համանախագահներ Սելահաթթին Դեմիրթաշը և Ֆիգեն Յուքսեքդաղը ևս կիսվել են ընտրություններից հետո իրենց տեսլականներով: Յուքսեքդաղն ընդգծել է, որ նման բարդ պայքարում ստացած ձայներն իրենք մեծ հաղթանակ են համարում: «Ճանապարհներ ունենք, որ միասին և վճռականությամբ ենք անցնելու: Ի հեճուկս ամենի՝ խաղաղություն ենք ցանկանում»,- նշել է Յուքսեքդաղը: Դեմիրթաշը ևս շնորհակալություն է հայտնել ընտրողներին ԺԴԿ-ին Թուրքիայի 3-րդ կուսակցությունը դարձնելու համար: «Մեկ միլիոն ձայն կորցրինք, սակայն մենք մի կուսակցություն ենք, որին հաջողվել է ֆաշիÕ �մի դեմ ամուր կանգնել: Թող ոչ ոք չվախենա, մենք կանք  և շարունակելու ենք միասին դիմադրել»,- ասել է Դեմիրթաշը:

Ազգայնական ԱՇԿ-ի ղեկավար Դևլեթ Բահչելին ընտրությունների նախնական արդյունքների հրապարակումից հետո արտակարգ ժողով է հրավիրել: Տարածված տեղեկություններն այն մասին, թե նա հրաժարական է տալիս, հերքվել են, սակայն  հայտնի է դարձել, որ կուսակցությունում կան արդեն առաջին հրաժարականները: