Բնապահպանի կարծիքով Արմեն Սարգսյանը փորձեց հանրության աչքին թոզ փչել

Ազգային ժողովում Ամուլսարի ծրագրի վերաբերյալ ՀՀ  4-րդ նախագահին ուղղված «Ելք» խմբակցության պատգամավոր Լենա Նազարյանի՝ Արմեն Սարգսյանը դուրս է եկել տնօրենների խորհրդի կազմից, քանի որ վտանգավոր  է համարել այն ձևը, որով ընկերությունն իրականացնում է հանքարդյունահանությունը և արդյո՞ք նման բարձր պաշտոն զբաղեցնելուց հետո նա պատրաստվում է բարձրաձայնել Ամուլսարի ծրագրի վտանգավորության հարցին ՀՀ 4-րդ նախագահը պատասխանել էր:

«Ես ձեզ հաղորդել եմ իմ վերաբերմունքը, ասել եմ, որ դիմում եմ ներկայացրել խորհրդի նախագահին, որտեղ նշել եմ այդ ծրագրի նկատմամբ իմ վերաբերմունքը, իսկ դրական է դա, թե բացասական է, ես դա Ձեզ չեմ ասելու, այսօր էլ չեմ ասի, որովհետեւ դա հինգ տարի առաջվա իմ վերաբերմունքն է, իսկ այսօր այդ ընկերությունը տարբեր է»:

Ինչո՞ւ 5 տարի առաջվա իր վերաբերմունքի մասին ՀՀ նախագահը չցանկացավ ոչինչ ասել և ինչո՞ւ է հիմա նա այդ («Լիդիան Արմենիա» ընկերություն, խմբ.) ընկերության մասին այլ կարծիքի: Այս հարցերի պատասխանը ստանալու համար Past.am-ը դիմեց Հայկական բնապահպանական ճակատի անդամ Սիլվա Ադամյանին:

«Մեր ունեցած տվյալների համաձայն Արմեն Սարգսյանի հայտարարությունները չեն համապատասխանում իրականությանը, որովհետև Ամուլսարի ծրագիրը դրանից չի փոխվի: Տարածքը մնում է նույն Ջերմուկը, իսկ խնդիրները մնում են նույնը և այստեղ ոչինչ չի փոխվել: Ես խիստ կասկածում եմ, որ ժամանակին Արմեն Սարգսյանը չի իմացել այն խնդիրների մասին, որոնք այսօր կան: Բոլորն էլ գիտեն, որ Ջերմուկը ազգային հարստություն է և առաջին հերթին դրա մասին է պետք մտածել, որի մասին խոսում են նաև միջազգային փորձագետները: Ես հակված եմ մտածել, որ ՀՀ 4-րդ նախագահի դիրքորոշումը միշտ եղել է նույնը: Նա և՛ նախկինում, և՛ հիմա մտածում է, որ Ամուլսարի հանքը կարելի է շահագործել: Այդ պատճառով էլ նա չի ասում իր դիրքորոշումը, լավ իմանալով հանրության վերաբերմունքը այդ հարցի վերաբերյալ: Հակառակ դեպքում նա կհրապարակեր ինչ է մտածում»,- ասաց բնապահպանը:

Խոսելով ՀՀ նախագահի հնչեցրած այն տեսակետի մասին, թե այսուհետ օրենքները պետք է կոռուպցիոն և բնապահպանական թեստ անցնեն, Ս.Ադամյանն ասաց, որ օրենքները լավն են, պարզապես հարկավոր է դրանք չարհամարհել ու հաշվի առնել:

«Մենք ունենք բավականին լավ օրենսդրություն, բայց նախ հարկավոր է օրենքները կյանքի կոչել: Պետք է դրանից սկսել, ոչ թե նոր ընդունվելիք օրենքները բնապահպանական թեստ անցկացնել: Ի դեպ, օրենքով չի կարելի հանքարդյունաբերությամբ զբաղվել հատուկ պահպանվող տարածքներում: Բայց եթե տեսնեք, թե Սամվել Կարապետյանին պատկանող ընկերությունը նավթի ու գազի պաշարների շրջակա միջավայրի ուսումնասիրությունը քանի հատուկ պահպանվող տարածքներում է իրականացնում: Սա օրենքի խախտում չէ՞: Եթե իշխանություններն օրենքներն ի կատար չեն ածում, էլ ի՞նչ բնապահպանական թեստավորման մասին է խոսքը»,- ասաց Ս. Ադամյանը:

Բնապահպանը նշեց նաև, որ օրենքով սահմանված է, որ այն տարածքներում, որտեղ հայտնաբերվում են միջազգային կարմիր գրքում գրանցված կենդանիներ և բույսեր, ապա այդ տարածքներում որևէ գործունեություն իրականացնելն արգելվում է, բայց իրական պատկերը բոլորովին այլ է:

«Նույն Ամուլսարում և կենդանիների, և՛ թռչունների բազմաթիվ տեսակներ կան, բայց օրենքը շրջանցում են և անում են այն, ինչ իրենց պետք է: Եվ հիմա խոսել այն մասին, որ պետք է օրենքները բնապահպանական թեստ անցկացնել և դրանով կբարելավվի իրավիճակը, կարծում եմ լուրջ չէ, քանի որ իրավիճակը բոլորովին այլ  բանի մասին է խոսում: Այնպես որ Արմեն Սարգսյանը նման մտքեր արտահայտելով փորձում է հանրության աչքերին թոզ փչել, ուրիշ ոչինչ ես չեմ տեսնում»,- ասաց Ս. Ադամյանը:

Արմինե Գրիգորյան