Էլեկտրոնային առողջապահության համակարգը գուցեև հուսալի է, բայց՝ թանկ

Էլեկտրոնային առողջապահության համակարգի ներդրման շուրջ վերջին շրջանում ակտիվ բողոքում էին Գյումրու մի խումբ ատամնաբույժներ: Վերջինների բարձրացված հարցերին անգամ պարզաբանում էր տրվել հենց ՀՀ առողջապահության պաշտոնական կայքում՝ նշելով, որ այն միանգամայն հուսալի է, իսկ համակարգում քաղաքացու անձնական տվյալները՝ պաշտպանված:

Համակարգը գուցեև հուսալի է, բայց միևնույն ժամանակ՝ թանկ: Թանկ է այն առումով, որ բուժհիմնարկների՝ այդ համակարգին միանալու համար հատուկ վճարներ կան և դրանց փոխհատուցման համար նախարարությանը պետք է պետբյուջեից վճարվի 200 միլիոն դրամից ավելի գումար:

Այս մասին նախագիծ է ներառված վաղը կայանալիք կառավարության հերթական նիստի օրակարգում, ուր նշված է, որ որոշումն ուժի մեջ կմտնի պաշտոնական հրապարակմանը հաջորդող օրը:

Պետության կողմից երաշխավորված անվճար և արտոնյալ պայմաններով բժշկական օգնություն և սպասարկում իրականացնող կազմակերպությունների էլեկտրոնային առողջապահության համակարգին միացման վճարները փոխհատուցելու նպատակով ՀՀ առողջապահության նախարարությանը 2018թ. պետական բյուջեով նախատեսված կառավարության պահուստային ֆոնդից այս տարի պետք է հատկացվի 203 միլիոն 116 հազար դրամ: Ընդ որում առաջին եռամսյակում 81 միլիոն 246 հազար դրամ, իսկ մինչ հունիս արդեն պետք է վճարվի ամբողջ գումարը:

Նախագծում ասված է, որ որոշման անհրաժեշտությունը պայմանավորված է 2018թ. ընթացքում բժշկական օգնություն և սպասարկում իրականացնող կազմակերպությունների էլեկտրոնային առողջապահության համակարգին միացման վճարները սուբսիդավորման միջոցով մասնակի կամ ամբողջությամբ փոխհատուցելու հանգամանքով:

Սուբսիդավորումը նախատեսվում է կատարել հետևյալ համամասնություններով՝ Երևան քաղաքի 100 միլիոն դրամը գերազանցող շրջանառություն ունեցող բոլոր հիվանդանոցներին` 50%-ով, իսկ 100 միլիոնը չգերազանցող շրջանառություն ունեցող և մարզային բոլոր հիվանդանոցներին` 70%-ով, սահմանամերձ և սահմանապահ հիվանդանոցներին, Երևանի և մարզային պոլիկլինիկակներին և գյուղական ամբուլատորիաներին` 100%-ով:

2018թ. սուբսիդավորման ենթակա ընդհանուր գումարը կազմում է 487 միլիոն 479 հազար դրամ, որի առաջին 5 ամիսների համար անհրաժեշտ գումարը կազմում է 203 միլիոն 116 ահզար դրամ: Առողջապահական կազմակերպություններին նշված գումարը սուբսիդավորելու նպատակով անհրաժեշտություն է առաջացել կատարել 2018թ. պետական բյուջեի «Առողջապահություն» բաժնի ծրագրերի վերաբաշխում:

Այսպես, նախարարությունը “Լե Լաբորատուաղ Սեղվիե” ֆրանսիական կազմակերպության հետ 2015թ. կնքել է 5 տարվա պայմանագիր Դիաբետոն 60 ՄՌ դեղի համար: 2018թ. նախարարությունը նշված կազմակերպությունից ստացել է նոր գնային առաջարկ` 1 դեղահատի համար 0,041 եվրո նախկին 0,06 եվրոյի փոխարեն, որի արդյունքում 2018թ. համար ի հայտ է եկել մոտ 155 միլոն դրամի տնտեսում: Այդ պատճառով առաջարկվել է ծրագրի ընդհանուր գումարը 153 միլիոն 991 հազար դրամով նվազեցնել: Մյուս կողմից էլ, ԱՆ «Տուբերկուլյոզի դեմ պայքարի ազգային կենտրոն» ՊՈԱԿ-ի եկամուտների և ծախսերի հաստատված նախահաշվի համաձայն վերջինիս 2018թ. պայմանագրային գումարները նվազեցվել են` պահպանման ծախսերի կրճատման և 2017թ. ավարտին իրականացված օպտիմալացման ծրագրի շնորհիվ: Սրանով պայմանավորված՝ առաջարկվել է նշված ծրագրերի գումարները նվազեցնել համապատասխանաբար 32 միլիոն 164 հազար և 16 միլոին 959 հազար դրամ գումարներով:

ՔՐԻՍՏԻՆԱ ՏԵՐ-ՄԱԹԵՎՈՍՅԱՆ

Past.am