Հաստատվել է ասպիրանտուրա ու դոկտորանտուրա ընդունելության տեղերի քանակը

Հաստատվել է Հայաստանի Հանրապետության 2018/2019 ուսումնական տարվա առկա ուսուցմամբ ասպիրանտուրա ու դոկտորանտուրա ընդունելության տեղերի բաշխումը:

ՀՀ կրթության և գիտության նախարարությունը նախատեսում է 2018/2019 ուսումնական տարվա համար կառավարության հաստատմանը ներկայացնել 379 տեղ ասպիրանտական կրթական ծրագրով ուսումնառությունը կազմակերպելու նպատակով, որից՝ 140 տեղ առկա ուսուցմամբ, 239 տեղ՝ հեռակա ուսուցմամբ, 95 տեղ՝ օրդինատուրայի կրթական ծրագրով, 12 տեղ՝ ինտերնի կրթական ծրագրով, իսկ ևս 13 տեղ՝ դոկտորանտուրայի կրթական ծրագրով:

Ասպիրանտական կրթական ծրագրով իրենց հայտերն են ներկայացրել 12 կառույց ու մի շարք բուհեր, այդ թվում նախարարություններ, Գիտությունների ազգային ակադեմիան, «ՔԵՆԴԼ» սինքրոտրոնային հետազոտությունների ինստիտուտ հիմնադրամը, «ՍԻՆՈՓՍԻՍ ԱՐՄԵՆԻԱ» ՓԲԸ և «Մատենադարան» Մեսրոպ Մաշտոցի անվան հին ձեռագրերի գիտահետազոտական ինստիտուտ» հիմնադրամը և այլն:

Օրդինատուրայի կրթական ծրագրով իրենց հայտերն են ներկայացրել   ՀՀ պաշտպանության, առողջապահության նախարարությունները, «Երևանի Մխիթար Հերացու անվան պետական բժշկական համալսարան» հիմնադրամը:

Դոկտորանտական կրթական ծրագրով հայտեր են ներկայացրել Պետական կառավարման ակադեմիան, Գիտությունների ազգային ակադեմիան, ԵՊՀ-ն, Ճարտարապետության և շինարարության Հայաստանի ազգային, Երևանի Վ. Բրյուսովի անվան լեզվահասարակագիտական և Խ. Աբովյանի անվան հայկական պետական մանկավարժական համալսարանները:

Յուրաքանչյուր տարի գերատեսչություններից ստացված հայտերի հիման վրա ՀՀ կրթության և գիտության նախարարությունն ըստ մասնագիտությունների կառավարության հաստատմանն է ներկայացնում պետական բարձրագույն ուսումնական հաստատությունների և գիտական կազմակերպությունների պետության կողմից պետական կրթաթոշակով, նպաստի ձևով ուսման վճարի փոխհատուցմամբ /անվճար/, առկա ուսուցմամբ ասպիրանտական և դոկտորանտական կրթական ծրագրով տեղերը:

Նախագծի ընդունումը նպատակ ունի կանոնակարգել ՀՀ պետական բարձրագույն ուսումնական հաստատությունների ասպիրանտուրայի և դոկտորանտուրայի ընդունելությունը և կարգավորել իրավական դաշտը տվյալ բնագավառում: Միաժամանակ՝ ասպիրանտական, դոկտորանտական և օրդինատուրայի կրթական ծրագրով բարձրագույն ուսումնական հաստատություններին և գիտական կազմակերպություններին ուսումնառության անվճար` առանց տարկետման և տարկետման իրավունքով տեղերի հատկացումը:

2018/2019 ուսումնական տարվա ասպիրանտուրա ընդունելության տեղերը պետական կրթաթոշակով, նպաստի ձևով ուսման վճարի փոխհատուցմամբ, առկա ուսուցմամբ կլինեն 140 տեղ, նպաստի ձևով ուսման վճարի փոխհատուցմամբ, հեռակա ուսուցմամբ՝ 239 տեղ, իսկ պետական կրթաթոշակով, նպաստի ձևով ուսման վճարի փոխհատուցմամբ, միջպետական համաձայնագրերով` 24 տեղ:

Պետական կրթաթոշակով, նպաստի ձևով ուսման վճարի փոխհատուցմամբ օրդինատուրա ընդունելության տեղերը 95 են: ՀՀ պաշտպանության նախարարության համար նախատեսված ինտերնատուրա ընդունելության տեղերը՝ պետական կրթաթոշակով, նպաստի ձևով ուսման վճարի փոխհատուցմամբ կլինեն 12-ը: Դոկտորանտուրա ընդունելության տեղերն ընդամենը 13-ն են՝ պետական կրթաթոշակով, նպաստի ձևով ուսման վճարի փոխհատուցմամբ:

 

ՔՐԻՍՏԻՆԱ ՏԵՐ-ՄԱԹԵՎՈՍՅԱՆ
Past.am