Դանիել Իոննիսյան. «Ընտրական օրենսգրքի փոփոխությունները դեկորատիվ են»

Ազգային ժողովի  Պետական-իրավական և մարդու իրավունքների պաշտպանության հարցերի մշտական հանձնաժողովում երեկ քննարկվեց «ՀՀ ընտրական օրենսգիրք» սահմանադրական օրենքում փոփոխություններ և լրացումներ կատարելու մասին» նախագիծը, որը դրական եզրակացություն ստացավ:

Նախագիծը ներկայացվել էր  նախորդ տարվա հոկտեմբերին, որտեղ մասնավորապես առաջարկվում է արգելել նախընտրական քարոզչության նպատակով օգտագործել ծառայողական պարտականությունների իրականացման համար տրամադրված ֆինանսական, տեղեկատվական միջոցները, տարածքները, տրանսպորտային և կապի միջոցները, նյութական ու մարդկային ռեսուրսները: Արգելվում է դրանք օգտագործել հանրային ծառայողներին (բացառությամբ ԱԺ պատգամավորների), պետական և տեղական ինքնակառավարման մարմիններին, առողջապահական կամ բժշկական կազմակերպությունների, ուսումնական հաստատությունների, նախադպրոցական ուսումնական հաստատությունների աշխատողներին` իրենց լիազորություններն իրականացնելիս կամ ի պաշտոնե հանդես գալիս: Հիշյալ գործողությունների կատարումն արգելվել է նաև պետական հիմնարկների կամ կազմակերպությունների, համայնքային հիմնարկների կամ կազմակերպությունների, կանոնադրական կապիտալում պետական կամ տեղական ինքնակառավարման մարմինների 20 և ավելի տոկոս մասնակցությամբ կազմակերպությունների աշխատակիցներին՝ իրենց աշխատանքային պարտականությունները կատարելիս կամ ի պաշտոնե հանդես գալիս: Արգելվել է նաև դատավորներին, դատախազներին, քննչական կոմիտեի, հատուկ քննչական ծառայության ծառայողներին, ոստիկանությունում, ազգային անվտանգության, քրեակատարողական, դատական ակտերի հարկադիր կատարումն ապահովող ծառայություններում ծառայողներին, զինծառայողներին և ընտրական հանձնաժողովների անդամներին:

Նախագծում կարևորվում է հատկապես այն, որ ուսուցչիներին  ու բուժաշխատողներին կարգելվի  քարոզչություն իրականացնել ի պաշտոնե: Առաջարկվում է նաև քրեական պատասխանատվության ենթարկել ընտրակաշառքի միջնորդության համար: Այս դեպքում սահմանվում է 1- 5 տարվա ազատազրկում։ Իսկ վարչական ռեսուրսի օգտագործման համար կսահմանվի 3-ից մինչև 5 տարվա ազատազրկում:

«Իրազեկ քաղաքացիների միավորում» հասարակական կազմակերպության ծրագրերի համակարգող Դանիել Իոննիսյանի խոսքով, իհարկե, լավ է, որ օրենսդրական փոփոխությունները ընդգրկվել են նախագծում:

«Այդ փոփոխությունների անհրաժեշտությունն, իհարկե, կար: Բայց քանի դեռ  իրավապահ մարմինները չեն գործում, այդ փոփոխություններն, ըստ էության, դեկորատիվ են: Տեսեք, ընտրակաշառքը միշտ էլ քրեական հանցագործություն է եղել: Այստեղ երբեք տարակարծություն չի եղել, քանի որ ՀՀ քրեական օրենսգրքում ընտրակաշառքի մասին դրույթ կա: Բայց եղե՞լ է մի դեպք, որ Հայաստանի որևիցե իրավապահ մարմին ինքն իրենով գնա ու ֆիքսի ընտրակաշառքի դեպքը, չի եղել: Եղել են դեպքեր, որ քաղհասարակությունը կամ լրագրողները ֆիքսել են, ոստիկանությունը, սակայն, գործը  գեղեցիկ կոծկել, կամ, լավագույն դեպքում, վարչական պատասխանատվության է ենթարկել: Լավ, ենթադրենք արգելեցին վարչական ռեսուրսի օգտագործումը, մասամբ դարձրեցին քրեական, մասամբ էլ՝ վարչական իրավախախտում, բայց որքանո՞վ կգործի առանց անկախ իրավապահ համակարգի: Բոլորս էլ հասկանում ենք, որ համարյա չի գործի: Ուղղակի տարբերությունն այն կլինի, որ երբ մենք բացահայտենք այդ դեպքերը, արդեն ավելի լուրջ հետևանքների կսպասենք»,-Past.am-ի հետ զրույցում ասաց նա:

Դանիել Իոննիսյանի խոսքով՝ օրենքի խստությունն արդեն իսկ կա, բայց խնդիրն այլ է:
«Ամբողջ խնդիրն իմպլեմենտացիայի մեջ է: Այսինքն՝ խնդիրն այն է, որ այդ դրույթներն իսկապես պետք է գործեն: Իրավապահ համակարգը պետք է իրապես գործի, և ոչ թե այս ամենը մնա թղթի վրա: Ըստ էության, հիմնական թերությունը, որը մնացել է ՀՀ ընտրական օրենսգրքում, ընտրակարգն է: Բայց մնացած մասով թերություններն իմպլեմենտացիայի մեջ են: Երբ Հայաստանի հանրապետական կուսակցությունը չարաշահում է վարչական ռեսուրսը և Կենտրոնական ընտրական հանձնաժողովը որևիցե սանկցիա չի կիրառում կուսակցության դեմ, թեև Ընտրական օրենսգրքով դա նախատեսված է, այս պարագայում ի՞նչ տարբերություն, թե ինչ է գրված Ընտրական օրենսգրքում»,-եզրափակեց մեր զրուցակիցը:

Աննա Բադալյան