Նովրուզը Հայաստանում սկսվում է սահմանից

Այսօր իրանալեզու և թյուրքալեզու ժողովուրդները տոնում են Նովրուզը, որը եվրասիական մի շարք ժողովուրդների մոտ համարվում է Նոր տարվա տոն: Այն նաև խորհրդանշում է գարնան առաջին օրն ու բնության զարթոնքը:

Եվ ինչպես նախորդ տարիներին, այնպես էլ այս՝ հարևան իրանցիները նախընտրում են իրենց կարևորագույն տոնը՝ Նովրուզը, տոնել Հայաստանում:

Նովրուզը պարսկերենից թարգմանաբար նշանակում է նոր օր, այն համարվում է աշխարհի ամենահին տոներից մեկը, որը նշում էին դեռևս մ.թ.ա. 7-րդ դարում: Համարվում է, որ տոնն ունի հին իրանական ծագում՝ կապված Արևի պաշտանմունքի և Զարատուշտրա մարգարեի անվան հետ: 

2017 թ. Հայաստան է այցելել 220 հազար իրանցի զբոսաշրջիկ, ինչը 2016թ-ի համեմատ 16 %-ով ավելի է: Անցած տարի Իրանի չորս քաղաքներում կազմակերպել են միջոցառումներ, իսկ դեկտեմբերին Իրանում կայացած զբոսաշրջային ցուցահանդեսին մասնակցել են հայկական 6 տուրօպերատորներ՝ ներկայացնելով Հայաստանի զբոսաշրջային հնարավորությունները:

2018 թ. Նովրուզի տոնակատարության շրջանակներում իրանցի զբոսաշրջիկների՝ Հայաստան այցելությունների առավել հարմարավետությունն ապահովելու նպատակով մշակվել և իրականացվում են մի շարք միջոցառումներ:

Ինչպես Past.am-ին տեղեկացրեց ՀՀ տնտեսական զարգացման և ներդրումների նախարարության զբոսաշրջության պետական կոմիտեի նախագահի մամուլի քարտուղար Լիլիթ Խաչատուրյանը՝ Իրան-Հայաստան սահմանային անցակետում, Մեղրի ԱՏԳ-ում գործող տեղեկատվական կենտրոնում իրանցի զբոսաշրջիկներին կտրամադրվեն Հայաստանի զբոսաշրջային գրավչություններն ու ներուժը ներկայացնող պարսկերեն բրոշյուրներ, քարտեզներ, թռուցիկներ, տեղեկատվական թերթիկներ:

Այս բոլոր աշխատանքներն իրականացվում են   համագործակցելով Հայաստանի զբոսաշրջության զարգացման հիմնադրամի հետ: Վերջինիս կողմից էլ հենց տպվում են բրոշյուրները:

Լիլիթ Խաչատուրյանի փոխանցմամբ՝ Իրանից Հայաստան տանող մայրուղիներին կտեղադրվեն հայերեն և պարսկերեն տեղեկատվական, ինչպես նաև Նովրուզի շնորհավորական գրառումներ պարունակող պաստառներ։ Պաստառները Նովրուզի նախօրեից սկսած մեկ ամիս շարունակ տեղադրած կլինեն մայրուղիներին։

«Նովրուզի ողջ ընթացքում Հայաստանում կգործի 24 ժամյա թեժ գիծ՝ 095 118 118 պարսկալեզու մասնագետների ներգրավմամբ՝ շահագրգիռ մարմինների հետ սերտ համագործակցությամբ: Նովրուզի օրերին Հայաստան ժամանող իրանցի զբոսաշրջիկների համար փորձել ենք ապահովել նպաստավոր պայմաններ՝ Մեղրի-Երևան ճանապարհին ոստիկանության հերթապահության, շտապօգնության, ճանապարհային փրկարարական ծառայության պատշաճ կազմակերպման, ինչպես նաև Մեղրիի անցակետում ուղևորափոխադրող ավտոմեքենաների և ավտոբուսների երթևեկությունը դյուրացնելու միջոցով։ Այսպիսով կփորձենք ապահովել իրանցի զբոսաշրջիկների անվտանգությունը և ահրաժեշտության դեպքում հրատապ լուծում տալ հնարավոր խնդիրներին»,- նշեց նա։

Հարցին, թե ինչպես է, որ իրանցիները սիրում են նշել Նովրուզը Հայաստանում և ոչ մեկ այլ երկրում, թեկուզև՝ մահմեդական, Խաչատուրյանը պատասխանեց, որ հայերը շատ հյուրընկալ են ու իրանցիների համար մեր երկրում այս օրերին բազմաթիվ տոնական միջոցառումներ են իրականացվում:

«Ցանկացած անձ, ընդ որում նաև հայերը, սիրում են Նոր տարին և առհասարակ բոլոր տոները դրսում անցկացնել: Բայց այստեղ մեկ բան կա՝ հայերը շատ հյուրընկալ են ու հյուրասեր: Իրանցիներն իրենց այստեղ ընդունված ու լավ են զգում, նրանց բարձրակարգ ծառայություններ են մատուցվում ու միջոցառումներ կազմակերպվում, այդ թվում՝ Երևանի քաղաքապետարանի կողմից: Եվ հետո իրանցիները ավտոմեքենայով են ճանապարհորդում և իրենց համար շատ հարմար է Հայաստան գալը»,- հավելեց նա:

 

 

 

ՔՐԻՍՏԻՆԱ ՏԵՐ-ՄԱԹԵՎՈՍՅԱՆ