Հայաստանը կանցնի առավելապես կենսավառելիքի օգտագործմանը

Հայաստանում կխթանվի ածխաջրածնային շարժիչային վառելիքներին այլընտրանք հանդիսացող էներգակիրների կիրառումը: Նախատեսվում է մինչև 2040 թ. Հայաստանում ածխաջրածնային շարժիչային վառելիքների նվազագույն կիրառման համար, իսկ դրանց այլընտրանք հանդիսացող էներգակիրների՝ կենսաէթանոլ, կենսադիզել, կենսագազ, ջրածին և էլեկտրական էներգիա, առավելագույն մրցունակ կիրառման համար համապատասխան պայմանների ստեղծում:

Այդ պայմանները իրենցից չեն ենթադրելու պետական բյուջեի միջոցներով ենթակառուցվածքների ստեղծում` դրանք ուղղված են լինելու մասնավոր հատվածի և/կամ տեղական ինքնակառավարման մարմինների կողմից ներդրումներ իրականացնելու համար նպաստավոր պայմանների ստեղծմանը:

Կարգավորումներն ուղղվելու են էներգետիկ անկախության, էներգետիկ համակարգի հուսալիության և անվտանգության աստիճանի բարձրացմանը և էներգիայով ապահովման ծախսերի օպտիմալացմանը:

Բանն այն է, որ 100 կմ վազքի հաշվարկով բենզին է ծախսվում մոտ 4800 դրամի, բնական գազ` մոտ 2000 դրամի, իսկ համարժեք հզորությամբ էլեկտրական մեքենաները ծախսում են մինչև 1000 դրամի էլեկտրաէներգիա:

Նախագծի համաձայն՝ մինչև 2019 թ. 2-րդ եռամսյակ Եվրասիական տնտեսական միության լիազոր մարմնին առաջարկություն կներկայացվի կենսավառելիքների, ինչպես նաև էլեկտրական սնուցմամբ տրանսպորտային միջոցների ներկրման համար մաքսային արտոնություններ սահմանելու վերաբերյալ:

Միջոցառումների ցանկի ընդունմամբ ակնկալվում է, որ պատասխանատու գերատեսչությունները իրենց գործառույթների շրջանակներում հետագա տարիներին ՀՀ կառավարության քննարկմանը կներկայացնեն համապատասխան իրավական ակտերի նախագծեր, որոնք կյանքի կոչելով կապահովվի այլընտրանքային էներգակիրների շուկայահանման համար մրցունակությունը: Մասնավորապես՝ հնարավորություն կստեղծվի էթիլային սպիրտի և բուսական յուղի զգալի ծավալներով արտադրության և ներկրման, դրանց բնափոխման, ինչպես նաև դրանց և էլեկտրական էներգիայի իրացումը տրանսպորտի ոլորտում ապահովելու նպատակով ենթակառուցվածքների զարգացում:

Միաժամանակ, հաշվի առնելով այն, որ էթիլային սպիրտի ու էթիլային սպիրտի հիմքով պատրաստված ալկոհոլային խմիչքների և բուսական յուղի արտադրության ու ներկրման ծավալները ուղիղ համեմատական են դրանց պատրաստման համար անհրաժեշտ մշակաբույսերի ծավալների հետ, անհրաժեշտության կլինի կրկնապատկելու դրանց արտադրության ու ներկրման ծավալները: Սա էլ իր հերթին կարող է զգալի թափ հաղորդել ոչ միայն գյուղատնտեսական մշակաբույսերի վերամշակման ուղղությանը, այլև՝ գյուղատնտեսական մշակաբույսերի բուն աճեցման գործընթացին` այդ թվում պարապուրդի մատնված և անջրդի հողատարածքների օգտագործման համար նոր հնարավորությունների ստեղծմամբ:

Նախագծի հեղինակների համար առավել քան իրատեսական է երկարաժամկետ հեռանկարում արձանագրել տրանսպորտի ոլորտում կենսաէթանոլի, կենսադիզելի և էլեկտրական էներգիայի 20% սպառման համամասնություն` բենզինի, դիզելային վառելիքի և բնական գազի նկատմամբ: Ընդ որում, փոխարինելով ներկրվող ածխաջրածնային վառելիքները կանխատեսվում է, որ զգալիորեն և համամասնորեն կավելանան էլեկտրաէներգիայի շուկայահանման ծավալները, այդ թվում սեփական վերականգնվող էներգետիկ ռեսուրսների կիրառմամբ արտադրված` դրանով իսկ ստեղծելով լրացուցիչ հնարավորություններ ՀՀ էլեկտրաէներգետիկ համակարգում արտադրական հզորությունների անխափան և հուսալի աշխատանքը հավասարակշռելու համար:

Օրինակ, տարեկան 5000 ՏՋ (2016 թվականին տրանսպորտի ոլորտում սպառված վառելիքի մոտ 20%-ը) ածխաջրածնային վառելիքները համարժեք են մոտ 1,4 միլիարդ կՎտժ էլեկտրական էներգիայի սեփական արտադրանքին, որը կկազմի Հայաստանում սպառված ամբողջ էներգիայի մոտ 6%-ը:

 

ՔՐԻՍՏԻՆԱ ՏԵՐ-ՄԱԹԵՎՈՍՅԱՆ
Past.am