Լևոն Շիրինյան. «Արևմուտքն ընդառաջ է գալիս». ի՞նչ պետք է հետևի կոնգրեսականների կոչին

Հայաստանին և Արցախին  օժանդակելու հարցը ԱՄՆ Կոնգրեսի ուշադրության կենտրոնում է հայտնվել ու դարձել նաև քննարկման առարկա: Այս մասին Կոնգրեսի արտաքին հարաբերությունների հանձնաժողովի լսումների ժամանակ հայտարարել է կոնգրեսական Բրեդ Շերմանը:

37 կոնգրեսականներ մասնավորապես կոչ են արել Հայաստանին հատկացնել 30 միլիոն դոլարի տնտեսական, 10 միլիոն դոլարի ռազմական օգնություն: Բացի այդ՝ կոչ են արել 20 միլիոն դոլար տրամադրել ՀՀ-ում օթևան ստացած Մերձավոր Արևելքի հայ փախստականներին: Կոնգրեսականները կոչ են արել նաև դադարեցնել Ադրբեջանին տրվող ցանկացած օգնություն և փոխարենը 10 միլիոն դոլարի օգնություն տրամադրել Արցախին, որը կուղղվի ականազերծման աշխատանքներին և զինադադարի խախտումները գրանցող սարքավորումներ տեղադրելուն: Պատահակա՞ն էր, որ նման կոչ եղավ հենց այս ժամանակահատվածում. աշխարհաքաղաքական, տարածաշրջանային կարևոր իրադարձություններ, ինչպես նաև այցեր, հաջորդող հայտարարություններ, որոնց էլ հետևում են Ադրբեջանին զսպելու անհրաժեշտության մասին կոչերը:
Քաղաքագետ Լևոն Շիրինյանի խոսքով՝ ոչ մի պատահականություն չկա:  

«Երբ մեր ժողովուրդը ապրիլյան պատերազմի ժամանակ անմնացորդ կանգնեց պետականության պաշտպանության գործին, Ադրբեջանի և Ռուսաստանի դավադրության դեմ այդ հակազդեցությունը բերեց Արևմուտքի քաղաքականության փոփոխությանը: Եվրոպան այդ քայլն արդեն կատարել է, երկրորդն էլ վերոնշյալն է: Սա նշանակում է, որ արևմտյան քաղաքական շրջանակներում Հայաստանն առանձնացվում է: Այս ամենի արդյունքում Արևմուտքի համար հետագա  հեռանկարների առումով Հայաստանը, հավանաբար, բարեկամ երկիր է դիտվում»,-անդրադառնալով ԱՄՆ կոնգրեսականների որոշմանը՝ Past.am-ի հետ զրույցում ասաց քաղաքագետը:

Լևոն Շիրինյանը չի բացառում՝ այստեղ  կա նաև հայկական լոբբիի աշխատանքը:
«Բայց դա չէր լինի, եթե չլիներ ապրիլյան պատերազմը: Սա մեր ժողովրդի հաղթանակի արդյունքն է: Արևմուտքն ընդառաջ է գալիս մեր անկախության, պետության ամրապնդմանը: Կա նաև երկրորդ հանգամանքը: Ադրբեջանա-թուրքական դաշինքը կարող է հզորանալ, Ամերիկայի հետ հակադրությունն այս առումով կարող է մեծանալ՝ հաշվի առնելով նաև այն, որ Ադրբեջանն ունի «պուտինյան» Ռուսաստանի աջակցությունը:  Եթե մենք մեր ազգային շահերից ելնելով քաղաքականություն վարենք, ապա մեզ համար կրկին դրական արդյունքներ կլինեն: Այս ամբողջի համատեքստում է դիտարկվում նաև Արցախի նախագահ Բակո Սահակյանի այցը ԱՄՆ, որի ընթացքը ես փայլուն եմ գնահատում»,-շեշտեց քաղաքագետը:

Իսկ թե ԱՄՆ կոնգրեսականների կոչից հետո որքանո՞վ կարելի է գործնական քայլերի սպասել, Լ. Շիրինյանն ընդգծեց. «Դա կապված է հայաստանյան կլանների շահերից: Եթե կոռուպցիա չլինի, եթե մաքսային ծառայությունը «մաքրվի», Հայաստանը կստանա թե՛ վերոնշյալը և թե՛ շատ ու շատ այլ ներդրումներ: Հայաստանը պետք է նորմալ պետություն լինի, որ բոլորը հարաբերություններ հաստատեն: Եթե կոռուպցիան, ժողովրդավարության ինստիտուտի խեղաթյուրումները շարունակական բնույթ կրեն, ապա ոչ մի առաջընթաց չի լինի: Չեն կարող լուրջ հարաբերությունների մեջ մտնել մի երկրի հետ, որտեղ նորմալ օրենսդրություն և օրենքի կիրառում չկա: Ամեն ինչ «բլեֆներով» չէ, իրավիճակը տեսանելի է»:

Նրա խոսքով՝ պետական շահի հիմքում քաղաքական ու տնտեսական զարգացման շահագրգռվածությունը պետք է լինի. «Մաքրեք երկիրը՝ կստանաք շատ բան»:
Լևոն Շիրինյանը չի բացառում, որ ԱՄՆ կոնգրեսականների նման կոչից հետո Ադրբեջանում հիստերիայի նոր ալիք բարձրանա:  

«Կլինեն նման դրսևորումներ: Բայց կարևորը մեր քայլերն են: Գիգանտն իր քայլը արել է, մնում է՝ փոքրն իր ընդառաջ քայլն անի: Եղեք քաղաքակիրթ, ձեզ հետ հարաբերություններ կհաստատեն, չեք լինի, կամ ձեր քայլերն իմիտացիոն բնույթ կկրեն, այս ամենը զուտ անիմաստ քարոզչության կվերածվի»,-եզրափակեց քաղաքագետը: