Արգինայում կարկուտ է տեղացել, սակայն ԱԻՆ-ի մեկնաբանությամբ՝ դա նորմալ կարկուտ չէ

Այսօր Հայաստանի մի քանի համայնքներում կարկուտ է տեղացել: Քաղաքացի Հովսեփ Ղազարյանը, ով Արմավիրի մարզի Արգինա համայնքում ծիրանի ծառերի այգի ունի, նույնպես տուժել է այդ կարկուտից: Past.am-ի հետ զրույցում նա նշեց, թե կարկուտը տեղացել է ընդամենը 15 րոպե, սակայն համաձայն իր նախնական հաշվարկների՝ այգուն հասցված վնասը կազմում է մոտավորապես 50-60%: Ղազարյանի խոսքով՝ համայնքում հակակարկտային կայաններ կան, սակայն ստացվում է, որ դրանց առկայությունը, ըստ էության, ոչինչ չի փոխել:

«Այգիները հիմնականում ցանցապատված չեն: Հիմա միայն ծիրանն էր ծաղկած, միայն ծիրանի ծառերն են վնասվել: Բերքի 50-60%-ը երևի վնասվել է: Բայց ռեալ վնասը մի քանի օր անց միայն կերևա»,- հայտնել էր նա:

ԱԻՆ մամուլի խոսնակ Նանա Գնդոյանի խոսքով՝ իրենց մոտ կարկուտ է գրանցվել Արագածոտնի մարզի Արտենի համայնքում: Մեր հարցին, թե վնասների մասին այս պահին տեղեկություն կա՞, վերջինս պատասխանեց, թե իրենք վնասների չափի մասին ոչինչ չեն կարող ասել, որովհետև դա ԱԻՆ-ը չի հաշվարկում: Վնասները պետք է հաշվարկի համապատասխան մարզի գյուղապետարանը և մարզպետարանը:

Նրա խոսքով՝ տեղացած կարկուտը կարկուտ չի կարելի անվանել, այն կարկտանման տեղում է, քանի որ իր բաղադրությամբ բավական փափուկ է և 0,5 սմ-ից էլ փոքր տրամաչափ ունի: Ըստ Գնդոյանի՝ այն չի կարող հասցնել այն վնասները, որոնք, որպես կանոն, կարկուտն է հասցնում գյուղատնտեսությանը:

Մեր այն դիտարկմանը, թե մի քաղաքացի նկար է հրապարակել և նշել, որ տուժել է կարկուտից, ԱԻՆ մամուլի խոսնակը պատասխանեց, որ տեսել է այդ նկարը, սակայն շեշտեց, որ դա այն վնասը չէ, որն իսկական, մեծ տրամաչափի կարկուտը կարող է հասցնել: «Բացի այդ, այն շրջաններում, որտեղ այդ թեթև կարկուտը եղել է, այնտեղ երկու տարբերակ ունենք՝ մի մասում այն ընդհանրապես պաշտպանված չէ, հակակարկտային կայանների սպեկտրը ընդամենը հանրապետության 9%-ն է պաշտպանում: Այն տեղերում, որտեղ տեղում է եղել, պահպանված չէ, և կան հատվածներ, որտեղ մասնավոր կարկտակայաններ են տեղադրված, որոնց տեխնիկական սպասարկումը ԱԻՆ-ը չի իրականացնում: Բոլոր այն տեղերում, որտեղ մեր կայաններն են տեղադրված, կարկտանման տեղումներ չեն գրանցվել»,- ասաց նա:

Ի՞նչ չափի պետք է լինի կարկուտը, որպեսզի նորմալ կարկուտ համարենք: Գնդոյանի խոսքով, նորմալ տրամաչափի կարկուտները համարյա 2 սմ-ից ավել են լինում, իսկ սա 0,5 սմ-ից էլ փոքր է: Կարկուտն ավելի խիտ և ծանր է լինում, իսկ այս դեպքում բաղադրությունն ավելի փափուկ էր:

Եթե մարդը ենթադրում է, որ իր բերքը վնասվել է 50-60%-ով, դա արդեն մե՞ծ վնաս է, թե՝ ոչ, հարցին էլ պատասխանեց, որ ինքներս ենք ասում, թե դա ենթադրություն է:

«Պետք է այնտեղ ավելի հստակ հետազոտություն արվի համապատասխան հանձնաժողովի կողմից, որը նման դեպքերում հետազոտություն է իրականացնում և հստակ մասնագիտական հաշվառում իրականացնում: Ես հասկանում եմ, որ ցանկացած տնտեսվարողի համար յուրաքանչյուր կորուստն էլ կարող է շատ երևալ: Դա նորմալ է: Մարդկային այդ հոգեբանությունը բնական է: Բայց կարծում եմ, որ ավելի ճիշտ և օբյեկտիվ է համապատասխան մարմինները հաշվառումն անեն, ներկայացնեն և այդ թվերով շարժվենք»,- հավելեց նա:

ՔՐԻՍՏԻՆԱ ՏԵՐ-ՄԱԹԵՎՈՍՅԱՆ

Past.am