Արմեն Մարտիրոսյան. «Եթե ապրիլի 9-ից ինչ-որ բան փոխվի, ուրեմն լավ կլինի»

«Լուսավոր Հայաստան» կուսակցության նախագահ, ԱԺ «Ելք» խմբակցության պատգամավոր Էդմոն Մարուքյանն իր հոդվածում տեսակետ է հայտնել, թե համոզված է, որ եթե իշխանությունը շարունակի անտեսել բերված փաստարկները, մերժել քաղաքական պայքարի քաղաքակիրթ մշակույթը, չլսել թե՛ իր, և թե՛ իր պես մտածող այլ քաղաքացիների ձայները, երկրի ներսում ավելի հաճախ են լսվելու կրակոցների ձայները, որոնք տասնամյակներով հետ են շպրտելու Հայաստանը՝ խորացնելով ժողովրդի հուսալքությունը, և խարխլելով պետության հիմքերը:

Ուշագրավ է, որ հոդվածի տակ ստորագրել է ոչ թե կուսակցությունը կամ այն խմբակցությունը, որի անդամ է Է. Մարուքյանը, այլ միայն ինքը, ինչը կարծես ավելի է ընդգծում, որ «Ելքի» ելքերը բավականին նվազել են:

«Ժառանգություն» կուսակցության նախագահ Արմեն Մարտիրոսյանը Past.am-ի հետ զրույցում նշեց, որ համաձայն է Է. Մարուքյանի այդ մտքի հետ, քանի որ ներկայացված փաստարկները իշխանությունը մշտապես անտեսել է:

«Ցավոք սրտի իշխանությունը Հայսատանում երբևիցե փաստարկները չի լսել: 1991 թվականի ընտրություններից հետո մենք այդպես էլ չունեցանք իշխանափոխություն: Բոլոր հաջորդ իշխանությունները եղել են նախորդ իշխանությունների շարունակողները: Այդ պատճառով էլ փաստարկներ չլսելը նորություն չէ: Եթե որևէ փաստարկ լսեր, ապա իշխանության չէր լինի: Դրա փոխարեն իշխանություններն իրենց ողջ ներուժն ուղղել են անընդհատ վերարտադրվելու համար, որպեսզի հանրային ռեսուրսներն ու դրանից ստացվող եկամուտն անընդհատ տնօրինեն»,- ասաց Ա. Մարտիրոսյանը:  

Նա նշեց նաև, որ «Հանուն Հայաստան պետության» ճակատն այլևս համախմբված միավոր է և եթե այլ միավոր լինի, որը ցանկություն հայտնի միասնական պայքար մղել, ապա ճակատը դրան դեմ չի լինի:

«Ոչ թե մեզ միանալ է պետք, այլ պետք է, որ բոլորը միանան: Եվ եթե այդ միացումը լինի, ապա հասարակությունը կարձագանքի, իսկ եթե ոչ՝ ապա հասարակությունը չի արձագանքի: Ինձ համար դա աքսիոմատիկ ճշմարտություն է: Ես ցանկություն ունեմ, որ այդպես լինի, մնացածն արդեն քաղաքական ուժերի և գործիչների քաղաքական որոշման հարցն է»,- ասաց Ա. Մարտիրոսյանը:
 
Նա նշեց, որ ճակատը ապրիլի 9-ից սկսվող պայքարին միանալու հարցով չի բանակցել ՕԵԿ-ի հետ, իսկ «Նոր ժամանակներ» կուսակցության մասով պատկերը մի փոքր այլ է:
«Արամ Կարապետյանը, որպես քաղաքացի է մասնակցում մեր հանրահավաքներին»,- ասաց Ա. Մարտիրոսյանը:

Նա չբացառեց նաև, որ իշխանությունները կարող է իրենց ուժերը ջլատելու համար կրկին փորձեն ինչ-որ տեղեկատվական ֆոն ստեղծել ու հետո պառակտել ընդդիմությանը:
«Քանի որ մենք իրավապահ մարմինների փոխարեն ունենք իշխանությունների կամակատարներ,  իսկ դատարանների փոխարեն ունենք իշխանությունների վճիռները կարդացողներ, ուստի ամեն ինչ էլ կարող է լինել: Ոչինչ չեմ բացառում: Այդ է պատճառը, որ այս վիճակում ենք: Ուրիշ երկրներում ընդդիմությունը կարողանում է նորմալ ֆինանսավորվել, ընդդիմադիր կուսակցությունները կարողանում են գործունեություն ծավալել, ընտրությունների միջոցով իշխանության գալ, կուսակցություններում լիդերների փոփոխություններ իրականացնել և այդպես շարունակել երկրի ղեկավարումը, բայց Հայաստանում դա չի լինում»,- ասաց Ա. Մարտիրոսյանը:

«Միջազգային և անվտանգության հարցերի հայկական ինստիտուտի» հիմնադիր նախագահ, քաղաքական հարցերով փորձագետ Ստյոպա Սաֆարյանի հնչեցրած միտքը, թե Սերժ Սարգսյանը ցանկալի արդյունքին հասնելու համար 5 տարի է պատրաստվում, իսկ ընդդիմությունը ուզում է 15 օրում հասնել իր ուզածին, «Ժառանգություն» կուսակցության առաջնորդը չցանկացավ մեկնաբանել:  Նա հրաժարվեց նաև պատասխանել հարցին, թե «Երկիր ծիրանի» կուսակցության հետ ճակատը բանակցություն վարել կամ վարո՞ւմ է: Բայց այս իրավիճակում, երբ ընդդիմադիր ուժերին ու գործիչներին իրականում կարելի է մատերի վրա հաշվել, «Ժառանգություն» կուսակցության առաջնորդը շարունակում է պնդել, որ եթե միասնական ընդդիմություն լինի, ապա քաղաքացիների աջակցությունը կլինի:

«Եթե միասնական ընդդիմություն չձևավորվի, լավ չի լինի: Եթե ապրիլի 9-ից ինչ-որ բան փոխվի, ուրեմն լավ կլինի»,- ասաց Ա. Մարտիրոսյանը:

Արմինե Գրիգորյան