Իմ մեծագույն ցանկությունն է, որպեսզի համայնքի բնակչության մտածողության մեջ ամրապնդվի համախմբվածության և սրտացավության գաղափարն իրենց բնակավայրի հանդեպ

Ճշտապահություն, կարգ ու կանոն, հարգանք ու առաջընթացի կամք: Երկու տարի առաջ աշխարհայացքի և կյանքի այսպիսի ռիթմ որդեգրեց Արաբկիր վարչական շրջանի նորընտիր ղեկավարի՝ Հովհաննես Վարդանյանի ղեկավարությամբ:

Արցախյան ազատամարտի բովում ձևավորված ուրույն կենսագրությունը, ուժային կառույցներում ունեցած փորձը, բնական է՝ կուռ ու հստակ ուղի կանխատեսեցին Արաբկիրի համար՝ հետընթացը դարձնելով չկիրառվող հասկացություն, իսկ առաջընթացն ու համաչափ զարգացումը՝ գործունեության նպատակ: Ներկայիս Արաբկիրի մշակութային, սոցիալական և վերականգնողական բուռն ընթացքը հուշում է՝ գաղափարից դեպի իրականություն տանող ճանապարհը կամքն է, խոսքի և աշխատանքի համարժեքությունը:

ՎԱՐԿԱՆԻՇ թեմատիկ ամսագրի զրուցակիցն է Արաբկիր վարչական շրջանի ղեկավար Հովհաննես Վարդանյանը:

-Պարո՛ն Վարդանյան, ղեկավարում եք Արաբկիրը՝ Երևանի ամենախոշոր ու ամենից ավելի ուշադրության կենտրոնում գտնվող համայնքներից մեկը: Նախ խոսենք համայնքում առկա խնդիրների և ապագա ծրագրերի մասին:

-Արաբկիր համայնքի զարգացմանն ուղղված ծրագրերը շատ են. դրանց մի մասն ընթացքի մեջ է, մյուսները՝ նախապատրաստական փուլում: Յուրաքանչյուր արաբկիրցու խնդիրն իմ խնդիրն է: Մենք կարևորում ենք հետևողական աշխատանքը, որպեսզի համայնքին ու բնակչին անհանգստացնող հարցերը չլուծված չմնան: Ես այն մարդկանցից եմ, ում համար համայնքի խնդիրներով զբաղվելը ոչ թե աշխատանք է, այլ հաճելի գործընթաց: Հենց սա է մեր հաջողության գրավականը: Մենք սիրում ենք Արաբկիրը և պատրաստ ենք ամեն բան անել, որպեսզի արաբկիրցին իրեն ապահով, հարմարավետ ու լավ զգա:

-Վերջերս Դուք ճանաչվել եք լավագույն վարչական շրջանի ղեկավար: Ո՞րն է Ձեր հաջողության գրավականը և ինչո՞վ է պայմանավորված բնակիչների սերն առ Ձեզ:

-Պարզապես սիրով եմ կատարում իմ պարտականությունները, իմ առօրյա աշխատանքը, իսկ գնահատում են բնակիչները: Արաբկիրն իմ տունն է, իսկ արաբկիրցին՝ իմ ընտանիքը: Իմ և թիմիս այս աշխարհայացքի շնորհիվ է ձևավորվել ժողովրդի սերը, հարգանքը մեր կատարած աշխատանքի նկատմամբ:

-Վայելելով արաբկիրցիների սերը և հարգանքը՝ արդյո՞ք կցանկանայիք հետագայում Ձեզ տեսնել այլ պաշտոնում:

-Տարբեր պաշտոններ եմ զբաղեցրել՝ բազում գործառույթներով: Հիմա, երբ երկու տարի է, ինչ զբաղեցնում եմ Արաբկիր վարչական շրջանի ղեկավարի պաշտոնը, ցանկանում եմ անել ամեն բան, որպեսզի կարողանամ հնարավորինս արդարացնել բնակիչների և, ինչու ոչ, նաև իմ սպասելիքները: Չափազանց պահանջկոտ եմ իմ աշխատանքի նկատմամբ և չեմ ցանկանում, որպեսզի որևէ գործ կամ ծրագիր ինքնանպատակ լինի: Թիմային աշխատանքով ջանում ենք հասնել այն բանին, որ մարդկանց սպասելիքները չանտեսվեն:

-Երկու տարի է արդեն՝ ղեկավարում եք Արաբկիր համայնքը: Ի՞նչ փոփոխություններ են եղել այս ժամանակահատվածում, և արդյո՞ք Ձեզ գոհացնում է այժմյան Արաբկիրը:

-Իմ ղեկավարման տարիների ընթացքում կյանքի են կոչվել բազում ծրագրեր, լուծվել են բազմաթիվ խնդիրներ՝ կանաչապատում, այգիների կառուցում, բակային տարածքների վերանորոգում: Կարող եմ երկար թվել, սակայն դրանից կարևոր է արաբկիրցիների գնահատականը և սերը: Երկու տարին մեծ ժամանակահատված չէ, սակայն մեր աշխատանքների շնորհիվ Արաբկիրը նոր շունչ է ստացել: Փորձել ենք այս ընթացքում այն ավելի հարմարավետ դարձնել: Դեռ շատ ծրագրեր ունենք, սակայն դրանց մասին վաղ է խոսել: Կատարած աշխատանքների մասին պետք է խոսեն արդյունքները:

-Ո՞րն եք համարում ամենամեծ ձեռքբերումը և ամենամեծ բացթողումը Ձեր պաշտոնավարման օրոք:

-Այս ընթացքում լուծվել են բազմաթիվ խնդիրներ, սակայն չենք կարողացել խուսափել նաև բացթողումներից: Այդ իսկ պատճառով շատ ավելի մեծ պատասխանատվությամբ և պատրաստակամությամբ սկսեցի աշխատել, որպեսզի շտկեմ բոլոր թերությունները: Երբ համայնքի բնակիչը տեսնում է, որ ղեկավարը սրտացավորեն և մեծագույն նվիրումով է աշխատում, ինքն էլ է փորձում լումա ունենալ համայնքի կայացման մեջ: Իմ մեծագույն ցանկությունն է, որպեսզի համայնքի բնակչության մտածողության մեջ ամրապնդվի համախմբվածության, հավատքի և սրտացավության գաղափարն իրենց բնակավայրի հանդեպ:

-Յուրաքանչյուր ղեկավար՝ ունի ոճի կարևորագույն տարրեր, արտաքին և ներքին առանձնահատկություններ, անցյալից դրվագներ, ծագում: Ո՞րն է է Ձեր ուժի գաղտնիքը:

-Բնութագրելով ինքս ինձ՝ պետք է ասեմ, որ արտաքուստ թափանցիկ, ներքուստ՝ համբերատար մարդ եմ:

Համբերատարության շնորհիվ միայն կարելի է աշխատել մարդկանց հետ, թիմային աշխատանքում հաջողության հասնել: Կարծում եմ՝ իմ մասին այդպես կարտահայտվեն հարազատներս ու մտերիմներս, մարդիկ, ովքեր վաղուց կամ նոր են ինձ ճանաչում:

-Քաղաքական-հասարակական հայտնի գործիչները Ձեզ բնութագրում են որպես հավաքական հատկանիշների կրող, պատասխանատու, հավատարիմ ու լուրջ անհատ: Հերոս, փրկիչ, իմաստուն. ղեկավարին բնորոշ այս կերպարներից ո՞րն է Ձեզ առավել հոգեհարազատ:

-Եթե ղեկավարվել, ապա միայն իմաստուն մարդու կողմից: Ինքնագովություն չէ, սակայն թվարկված բնորոշումներից ինձ հատկապես իմաստուն հատկանիշն է հոգեհարազատ:

-Արաբկիրը Երևանի կենսագործունեությունն ապահովող ամենակենսունակ և բազմամարդ վարչական շրջանն է: Հաճախ Ձեր խոսքում նշում եք «իմ արաբկիրցի»: Ո՞րն է արաբկիրցու ու առհասարակ հայի առանձնահատկությունը Ձեզ համար:

-Ապրել եմ, ապրում եմ և շարունակելու եմ ապրել Արաբկիրում: Այն Երևանի իմ ամենահարազատ վայրն է: Արաբկիրում նաև իմ երեխաներն են ապրում, «իմ արաբկիրցիները»: Ջանում եմ այնպես ապրել, ղեկավարել ու արարել, որպեսզի նրանք երբեք գլուխ չխոնարհեն իմ քայլերի համար:

-Արցախյան պատերազմի բովով թրծված, ուժային կառույցներում կենսագրական ուրույն ուղի անցած գնդապետ, քաղաքական գործիչ եք: Սկզբունքներ, կանոններ, որոնք ինքներդ եք այս ընթացքում սահմանել Ձեզ համար՝ և' որպես ղեկավար, և' որպես անհատ:

-Թե' որպես ղեկավար, թե' որպես քաղաքացի սկզբունքը մեկն է՝ լինել պատվախնդիր, արդար ու անդավաճան:

-Որպես Արաբկիր վարչական շրջանի ղեկավար՝ աչքի եք ընկնում բնակիչների հետ երկխոսությամբ, սոցիալական ծրագրերի իրականացմամբ, հնի ու նորի համադրական մոտեցմամբ: Արդյունքը գոհացնո՞ւմ է:

-Իմ գործունեության ընթացքում գրանցված արդյունքները բավարար են, սակայն լավագույնին, առավելագույնին հասնելու համար անելիքները շատ են: 2018թ.-ին իրագործելու բազմաթիվ ծրագրեր ունենք, որոնք կյանքի են կոչվելու ամբողջությամբ: Արժանավայել լուծում են գտելու բոլոր այն ծրագրերը, որոնք առաջ են քաշվել քաղաքապետի գլխավորությամբ և քաղաքական թիմի՝ ՀՅԴ կուսակցության կողմից: Մինչև 2020 թվականը մեր առջև դրված բոլոր ծրագրերը իրագործվելու են պատշաճ կերպով:

-Ամենաարժեքավոր պարգևները նրանք են, որոնք տալիս են պատիվ: Վերջերս Ձեզ շնորհվեց «Տարվա լավագույն վարչական շրջանի ղեկավար» մրցանակը, ի՞նչ զգացողություն ունեցաք:

-Ուրախ եմ «Տարվա լավագույն վարչական շրջանի ղեկավար» կոչմանն արժանանալու համար: Իմ խորին շնորհակալությունն եմ հայտնում International Media Holding-ին և նրա նախագահ Արման Վարդանյանին: Այդ գնահատականը ձևավորվել է սոցիոլոգիական հարցումների հիման վրա, ինչը ես անչափ կարևորում եմ: Իսկապես հաճելի անակնկալ էր. բոլոր պարգևատրումներն էլ, մրցանակներն էլ ոգևորող են, քանի որ դրանք խոսում են արածդ աշխատանքը գնահատելու մասին: Լավագույն թաղապետի կոչումը որքան հաճելի է, այնքան էլ պարտավորեցնող:

-Ձեր երազանքը՝ Արաբկիրը տեսնել...

-Ապագայի Արաբկիրը պետք է լինի ավելի բարեկարգ, իսկ արաբկիրցին՝ համախմբված ու բարեկիրթ: Այսպիսին է իմ ցանկությունն ու նպատակը:

-Ո՞րն է Ձեր «աքիլլեսյան գարշապարը»...

-(Ժպտում է,-խմբ) Ինձ հարիր չէ թուլություն ցուցաբերել:

-Սիրելի գիրք, որը հաճախ եք վերընթերցում:

-Ամենաիմաստուն ու բժշկող Սուրբ գիրքը՝ Գ. Նարեկացու «Մատյան ողբերգության» ստեղծագործությունը կամ ինչպես ժողովուրդն է ասում՝ «Նարեկը»:

-Մասնագիտությամբ լինելով իրավագետ՝ ի՞նչ բացթողումներ կան վարչական կառույցների ղեկավարման համակարգում:

-Աշխատող ղեկավարի աշխատակազմում բացթողումներ գրեթե չպետք է լինեն: