«Եթե քսան թեկնածու էլ լիներ, մեծամասնության համար ամենաընդունելին Սերժ Սարգսյանը կլիներ»

«Փաստ» օրաթերթի զրուցակիցն է Հանրապետական կուսակցության պատգամավոր Մարգարիտ Եսայանը:

- Ըստ Freedom House միջազգային կազմակերպության՝ Հայաստանը կանգնած է ավտորիտար դառնալու վտանգի առաջ: Իշխանությանը մտահոգո՞ւմ են նման գնահատականները:

-Իշխանության, ընդդիմության և հասարակության այլ ներկայացուցիչների համար միջազգային հանրության գնահատականները շատ կարևոր են, որովհետև մենք գնում ենք ավելի ժողովրդավարական պետություն դառնալու ճանապարհով: Բնական է, որ տարբեր կառույցներ ունենում են իրենց մոնիթորինգները, օբյեկտիվ կամ սուբյեկտիվ տեսլականը: Միայն Freedom House կազմակերպությունը չէ: Բազմաթիվ միջազգային զեկույցներում նշված է, որ Հայաստանը գնում է ժողովրդավարական ճանապարհով, չկան ավտորիտարիզմի նշույլներ: ԵԱՀԿ ԺՀՄԻԳ-ը, օրինակ, շատ բարձր է գնահատել 2017-ի ԱԺ ընտրությունները: Կրկնում եմ՝ տարբեր մոնիթորինգներ կարող են լինել, բայց դա չի նշանակում, որ բոլորն անկողմնակալ են:

-Էդուարդ Շարմազանովն ասում է, որ Սերժ Սարգսյանի թեկնածությունն ընդունվել է միաձայն, կուսակցությունում չեն եղել այլ կարծիքներ:Դավիթ Հարությունյանի խոսքով՝ քննարկումներ,այլ անուններ, այնուամենայնիվ, եղել են: Որքանո՞վ է ժողովրդավար, երբ կուսակցական քննարկմանը վարչապետի միայն մեկ թեկնածուի անուն է հնչում:

-Էդուարդ Շարմազանովի ասածը վերաբերում է կուսակցության գործադիր մարմնի նիստի քննարկումներին: Եթե նրան հարցնեին՝ ի՞նչ անուններ են շրջանառվել նախքան նիստը, ինչպիսի՞ ներքին քննարկումներ են եղել, ապա նա կասեր, որ քննարկվել են բազմաթիվ տարբերակներ, քանի որ Հանրապետականը հզոր ուժ է և ունի կադրային մեծ բազա: Եթե քսան թեկնածու էլ լիներ, մեծամասնության համար ամենաընդունելին Սերժ Սարգսյանը կլիներ: Դավիթ Հարությունյանը նկատի է ունեցել, որ մենք ժողովրդավար ուժ ենք և լսում ենք տարբեր կարծիքներ:

-Որքանո՞վ եք ականջալուր լինում հարցումներին: Մոտ մեկ շաբաթ առաջ հրապարակվեցին GALLUP International association-ի Հայաստանում լիիրավ անդամ Էմ-Փի-ՋԻ ՍՊԸ-ի հարցումների տվյալները: Կարեն Կարապետյանին ավելի շատ մարդ է տեսնում վարչապետի պաշտոնում, քան Սերժ Սարգսյանին:

-Ծանոթ եմ այդ տվյալներին: Ուրախ եմ, որ ձայների մեծամասնությունը տրվել է մեր կուսակցության երկու ներկայացուցչի՝ ՀՀԿ նախագահին և առաջին փոխնախագահին:

-Այնտեղ Գագիկ Ծառուկյանի անունն էլ կա: Նա նույնպես Սերժ Սարգսյանից շատ տոկոս է ստացել:

-Ես մեր կուսակցությունը նկատի ունեմ:

-Ձեզ հետաքրքիր չէ՞ ձայների հարաբերակցությունը:

-Ցանկացած հարցման մեջ մեծ տեղ ունի սուբյեկտիվիզմը: Մեծ վերապահում ունեմ ցանկացած թվի հանդեպ:

-Ֆորս-մաժոր կարո՞ղ է լինել՝ հաշվի առնելով Նիկոլ Փաշինյանի գործունեությունը:

-Աստված չանի: Հույս ունեմ, որ «Ելք» դաշինքի այդ փոքրիկ հատվածը, որն այսօր փողոցներում է, կսթափվի և կգա տրամաբանական դաշտ: Նրանք էլ շատ լավ հասկանում են, որ այդ ճանապարհը ոչ մի տեղ չի տանում: Հանրապետական կուսակցությունը ստացել է մեծամասնություն, Սահմանադրությունը պարտադրում է, որ հենց մեծամասնությունն առաջադրի վարչապետի թեկնածու: Չեմ հասկանում՝ ի՞նչ փոթորիկ է առաջացել մեկ բաժակ ջրում: Գուցե ընդդիմության այդ փոքրիկ հատվածն ուզում է հիշեցնել իր մասին, գուցե ընդդիմությունը պատրաստվում է 2022 թվականի խորհրդարանական ընտրություններին, գուցե նրանք հասկանում են, որ ընդդիմադիր դիմագիծ են կորցրել: Բայց հասարակությունը շատ ավելի իրատես է: Նույն Նիկոլ Փաշինյանը ժամանակին հայտարարեց, որ փողոցում հարցեր չեն լուծվում և վերցրեց մանդատը: Ինքն իրեն հակասող բաներ է անում: Հուսամ՝ սթափ մոտեցումը կգերակշռի: Մեզ ֆորս-մաժոր պետք չէ:

-Հանրապետականներն ասում են, որ իրենց որոշելիքն է վարչապետի հարցը, քանի որ ունեն մոտ 800 հազար քվե: Բայց նույն այդ մեծամասնությունը կարող է Աժ բերել օրինագիծ, որը փողոց կհանի ինչ-որ X խմբի: Բնականաբար, իշխող ուժը խնդիր չունի օրենքն անցկացնելու, բայց կարող է հաշվի առնել բողոքավոր մարդկանց կարծիքը և չեղարկել դա: Այս զուգահեռը տրամաբանակա՞ն է:

-Բնականաբար, Դուք ճիշտ եք: Եթե քաղաքացիների X խմբի կողմից քաղաքական մեծամասնության բոլոր օրենդրական նախաձեռնությունները լինեին բացարձակ ընդունելի, ապա դա կնշանակեր, որ խորհրդարանական մեծամասնությունը հարյուր տոկոսանոց մեծամասնություն է: Բայց մենք հավաքել ենք հիսուն և մի քիչ: Տարբեր կարծիքներ գոյության իրավունք ունեն: Դուք չեք ուզում, չէ՞ միատարր հասարակություն: Մենք ավտորիտար հասարակություն չենք: Այն իրադարձությունները, որոնք կատարվում են մեր երկրում, Ձեր հարցազրույցը հերքում են Freedom House կազմակերպության գնահատականը:

Լևոն Փանոսյան
Past.am