Կարինե Նալչաջյան. «Սերժ Սարգսյանը պետք է շատ սթափ նայի իր շուրջը և վերլուծի, թե ինչ է տեղի ունենում»

Հոգեբան Կարինե Նալչաջյանն անդրադառնալով վերջին օրերին հանրապետության ողջ տարածքում տեղի ունեցող բողոքի աննախադեպ ալիքին, Past.am-ի հետ զրույցում նշեց, որ հասարակության բազմությունից հստակ տեսանելի է, թե դժգոհություններն ինչ աստիճանի կուտակում կա մարդկանց մեջ: Եվ այդ դժգոhությունների պատճառով ժամանակ առ ժամանակ, ցանկացած պատեհ պահի դեպքում, պոռթկում է տեղի ունենում:

«Հիմա մենք գործ ունենք հերթական պոռթկման հետ և չի կարելի հաշվի չառնել ժողովրդի տրամադրությունները: Մեր ժողովուրդն արդարացիորեն է դժգոհում: Դժգոհության պոտենցիալը բավականին վտանգավոր երևույթ է և դրան մատերի արաnքով չի կարելի նայել: Այն կարող է այնպիսի պոռթկման հանգեցնել, որ ցնցի ամեն ինչ»,- ասաց Կ. Նալչաջյանը:

Նա որպես հոգեբան շատ անհանգստացած է, քանի որ նման մեծաքանակ մարդկային հոսքի ժամանակ շարժման առաջնորդներն ինչքան էլ որ անկեղծորեն ուզում են, հորդորում են, որ ակցիաները խաղաղ անցնեն, սակայն էմոցիաների նման կուտակումներն ամեն պահի կարող են վտանգավոր իրավիճակի առաջացման պատճառ դառնալ՝ սկսվեն մանր կոնֆլիկտներից և վերածվեն մեծ բռնկման:

«Նման դեպքերում մարդիկ էմոցիոնալ են դառնում և բավականին զգայուն՝ սադրանքների նկատմամբ: Ուստի մի փոքր կայծից ամեն վայրկյան հրդեհի բռնկման վտանգ կա օդում կախված: Բացի այդ, նման պարագաներում շատ են լինում խառնակիչներ, Աստված գիտի ինչ ուժերին ծառայողներ, և նման իրավիճակում շատ դժվար է տարբերակելը, թե ով՝ որ շերտից է»,- ասաց Կ. Նալչաջյանը:

Բողոքի ակցիաներին հիմնականում երիտասարդների մասնակցությունն, ըստ հոգեբանի, խոսում է այն մասին, որ տարեցներն իրենց կյանքի ընթացքում նմանատիպ շատ ակցիաներ են տեսել: Բացի այդ, պետք չէ մոռանալ նաև, որ նման երևույթները իրենց մեջ նաև ռոմանտիզմ են պարունակում, բայց այն, ինչ վերևներում է կատարվում շատ է մտահոգում մասնագետին:

«Իներցիաներին տրվել չի կարելի և հարկավոր է ձեռքը զարկերակի վրա ու մարդկանց տրամադրությունների վրա պահել: Եվ ասել, թե նման բողոքի ակցիաներ իրականացնելը նորմալ երևույթ է, բոլոր երկրներում էլ իրականացվում են՝ սխալ է: Ես իշխանությունների նման մոտեցումը ճիշտ չեմ համարում, քանի որ ամեն մի դեպք յուրահատուկ է, ամեն մի երկիր սպեցիֆիկ է և այստեղ անպայման պետք է հաշվի առնել մարդկանց տրամադրությունները և հասկանալ, թե  դժգոհության առանցքը որն է»,- ասաց Կ.Նալչաջյանը:

Նա նշեց նաև, որ միշտ էլ դեմ է եղել հեղափոխություններին, հատկապես՝ գունավոր, որոնք ամբողջ աշխարհը քար ու քանդ են անում: Երկրի ղեկավարները պետք է այս ամենից ցնցվեն, սթափվեն ու զգոն դառնան ու դադարեն կարծրատիպերով մտածել:

«Մեր երկրի ղեկավարությունը պետք է հասկանա, որ այստեղ շատ լուրջ փոփոխություններ են  կատարվում: Եվ քանի որ ժողովուրդը նման ձևով դուրս է եկել փողոց, ուրեմն պատճառները շատ լուրջ են: Իշխանությունները պետք է այդ պատճառները հաշվի առնեն և հասկանան, թե ուր ենք գնում: Այս արագ փոփոխվող աշխարհում երկրի առանցքը պետք է ամուր լինի, բայց հիմա մենք տեսնում ենք, որ մեր երկրի ներսում ուժեղ ցնցում է: Դա ամենևին էլ ցանկալի չէ, ինչին կառավարող վերնախավը պետք է շատ լուրջ մոտենա և իրատեսակական հետևություններ անի: Ես կարծում եմ, որ այս պահին գնդակը իշխանությունների դարպասում է և այս պարագայում քաղաքական վերնախավը և իշխանական լծակներ ունեցող մարդիկ պետք է անպայման իրենց խոսքն ասեն»,- ասաց Կ. Նալչաջյանը:

Նախկինում տեղի ունեցած բողոքի ակցիաները համեմատելով այս օրերին տեղի ունեցող իրադարձությունների հետ, նշեց, որ այս անգամ իրեն ուրախացնում է նաև այն, որ սովորաբար շարժման առաջնորդները ոստիկաններին են թիրախավորում, սակայն այս անգամ ամեն ինչ այլ է:

«Գունավոր հեղափոխությունների տեխնոլոգիաներից ամենաառաջինն ինչ արվում է, սեփական ուժային կառույցների հանդեպ ատելություն սերմանելն է, որովհետև նրանց վրա է հիմնված պետության անվտանգությունը: Հիմա ես տեսնում եմ, որ ցույցի կազմակերպիչները  ժամանակ առ ժամանակ ցուցարարներին հորդորում են ոստիկանների հանդեպ ագրեսիվություն չցուցաբերել: Պետք է նաև հասկանալ, որ այնուամենայնիվ, ոստիկանությունն այսպիսի օրերին խոցելի է նաև այն իմաստով, որ նրանց վրա է դրված անվտանգության պահպանումը: Այսինքն, նրանք նույնպես պետք է կոռեկտություն դրսևորեն, ինչը որ անում են և ես լիահույս եմ, որ ամեն ինչ առանց որևէ բախման կամ կորստի կավարտվի »,- ասաց Կ.Նալչաջյանը:

Խոսելով ԱԺ ամբիոնից Սերժ Սարգսյանի «Ելք» խմբակցության անդամներին ուղղված հորդորի մասին, որ ընդդիմադիր պատգամավորներն իրենց ընկերոջն Ազգային ժողով վերադարձնեն, հոգեբանը նշեց, որ դա մակերեսային քայլ էր, որն արեց նորընտիր վարչապետը:

«Ամեն ինչ կախված է թե՛ Սերժ Սարգսյանից և թե՛ իշխող վերնախավից: Իմ կարծիքով Սերժ Սարգսյանը պետք է շատ սթափ ձևով իր շուրջը նայի և վերլուծի, թե ինչ է տեղի ունենում: Եվ հիմա, երբ երկրի կառավարման բոլոր լծակները կրկին իր ձեռքում են, պետք է այնպիսի քայլեր ձեռնարկի, որ այս վտանգավոր ու բարդ աշխարհում և տարածաշրջանում չգնանք փորձությունների ճանապարհով: Հիմա մենք գտնվում ենք շատ բարդ իրավիճակում և պետք է ամեն ինչ անել, որպեսզի առանց որևէ մեկին վնաս պատճառելու կարգավորվի իրավիճակը: Անպայման պետք է սրտացավ քայլեր ձեռնարկել և թույլ չտալ, որ հասարակական պրոցեսները էլ ավելի սրվեն: Ամենաչնչին դրական քայլից անգամ, մարդիկ կլիցքաթափվեն և հարկավոր է հավատ ներշնչող դրական ներարկումներ իրականացնել, ինչը կլիցքաթափի հասարակությանը»,- ասաց Կ. Նալչաջյանը:                                      

Արմինե Գրիգորյան