Գեղարքունիքի մարզի Ակունք համայնքի, համայնքի ղեկավարի, աշխատակազմի և ավագանու անդամների ուղերձը ԱԺ պատգամավորներին

ОБЩЕСТВО 5 Май, 2018 21:12

Ակունք համայնքը տասնամյակներ շարունակ աչքի է ընկել իր աշխատասիրությամբ և ըմբոստ ու անաչառ վարքագծով: Մեզ միշտ ասում են , թե մենք բարդ ժողովուրդ ենք: Այո՛, բարդ ենք, բայց բարդ ենք մեր պարզության ու ազնվության մեջ:

Աշխատանքի ընթացքում մենք առաջնորդվում ենք համայնքի ժքողովրդին ծառայելու սկզբունքով, լինելով միշտ լիբերալ և հանդուրժող՝ հարգելով համայնքի բնակիչների կարծիքը և շահերը:

Ինչպես Հայրենական պատերազմում, այնպես էլ Արցախյան գոյամարտի պայքարում, համայնքի հարյուրավոր քաջորդիներ իրենց անձնազոհ մասնակցությունն են ունեցել բոլոր մարտական գործողություններում՝ լինելով ամենաթեժ կետերում:

Այսօր էլ մեր շատ ու շատ համագյուղացիներ իրենց մարտական հերթապահությունն են անցկացնում Հայաստանի և Արցախի սահմաններում՝ պաշտպանելով հայրենիքի անվտանգությունը:

Ապրիլյան քառօրյա պատերազմում մենք ոչ միայն նյութապես ու ֆինանսապես, այնպես էլ ֆիզիկապես կանգնած ենք եղել մեր նորօրյա հերոս զավակների կողքին: Եվ այսօր այդ հերոսների կողմից բարձրացված համազգային զարթոնքի օրերին ևս մեր համայնքի բնակիչները , և հատկապես ՝ երիտասարդները, եղել են շարժման մեջ և ազատ արտահայտել իրենց կամքը ՝ միանալով իրենց բազմահազար քույր ու եղբայրներին:

Ակունք համայնքի ղեկավարությունը, ավագանին և համայնքի բնակիչները կոչ են անում ազգային ժողովի բոլոր պատգամավորներին, հատկապես հանրապետական պատգամավորներին և հատկապես Գեղարքունյաց աշխարհից ծնված մեր հայրենակից պատգամավորներին և հորդորում են՝ չկոտրել մեր որդիների պատերազմում թրծված կամքը և հավատը: Անսալ հարյուր հազարավոր մեր հայրենակիցների պահանջը և միաձայն, ոչ թե կեսով կամ մեկ երրորդով, այլ հարյուր տոկոսով ձայն տալ ժողովրդի կողմից վարչապետի թեկնածու առաջադրված Նիկոլ Փաշինյանի օգտին:

Դրանով դուք և ամբողջ հայ ժողովուրդը կերտած կլինենք մի նոր մայիսյան հաղթանակի օր:

Միշտ հիշենք դարերի իմաստությունը՝ մինչև չկայունացնենք մեր տան խաղաղությունը, մենք չենք կարող պահպանել մեր հազարավոր հայորդիների կյանքի և արյան գնով ձեռք բերված խաղաղությունը:

Այսուհետ մենք թո՛ղ ունենանք անկուսակցական համակարգ և պետություն: Թող դա կոչվի միաբանության և հանդուրժողականության հայրենիք, այնպիսի միաբանություն, որն ամեն օր կերտում են մեր զինվոր զավակները սահմանի վրա:

Հարգանքներով՝

Ակունք համայնքի ղեկավար Արծրուն Ղարիբյան և ավագանու անդամներ