«Առաջնայինը մարդկանց կենսամակարդակի բարձրացումը պետք է լինի». «Փաստ»

 

«Փաստ» օրաթերթը գրում է.

ՀՀ ԱԺ «Ծառուկյան դաշինք» խմբակցության պատգամավոր, նախկին ցոցապնախարար  Գևորգ Պետրոսյանը պատասխանել է «Փաստ»–ի հարցերին:

– Պարո՛ն Պետրոսյան, կառանձնացնե՞ք այն կարևոր ու առաջնահերթ խնդիրները, որոնք նոր կառավարության համար օրա­ կարգային պետք է լինեն:

– Հիմնական հարցերը պետք է երկու մասի բաժանել՝ առաջինն արտաքին խնդիրներն են, երկրորդը՝ ներքին: Արտաքինի մասին խոսելն ավելորդ է, բոլորս գիտենք, որ մեր սահմաններն այսօր հանգիստ չեն: Ունենք չլուծված խնդիր, որը պետք է հնարավորինս շուտ ու խաղաղ ճանապարհով լուծում ստանա: Իսկ ներքին խնդիրները բազմաթիվ են: Առաջնայինը մարդկանց կենսամակարդակի բարձրացումը պետք է լինի: Տարիներ շարունակ տարբեր, այդ թվում՝ առաջին անհրաժեշտության իրերի, ապրանքների ու ծառայությունների սրընթաց գնաճ տեղի ունեցավ: Բայց չի կատարվել այդ վիճակին համարժեք աշխատավարձի ու կենսաթոշակների ինդեքսացիա: Առաջնային է նաև նպաստների խնդիրը: Ունենք նաև աշխատողների իրավունքների պաշտպանության խնդիր հատկապես մասնավոր սեկտորում մարդիկ ստրկական պայմաններում են աշխատում: Նրանք չեն մտածում իրենց իրավունքները պաշտպանելու մասին, որովհետև դեռ չունենք անկախ դատարան, չունենք արհմիություններ, որոնք մարդկանց աշխատանքային իրավունքները կպաշտպանեն: Բացի այդ, տնտեսության մեջ պետք է մրցակցային դաշտ ստեղծվի: Պետք է այնպես անել, որ ընտրանքային սկզբունքը վերանա. չպետք է աչք փակել իշխանությունների հետ սերտաճածի ապօրինությունների վրա, կամ թույլ տալ, որ մեկ կամ մի քանի ապրանքի մենաշնորհ ունենա  և անհավասար վիճակ ստեղծի մյուս մրցակիցների համար: Խոշորներն այսօր խժռում են փոքր ու միջին բիզնեսին: «Ծառուկյան» դաշինքը դեռ նախընտրական շրջանում էր ներկայացրել մի դրույթ՝ առաջարկելով մանր ու միջին բիզնեսը ժամանակավոր ազատել հարկերից: Ուզում եմ վստահել կառավարության կազմին Վստահ եմ՝ տեսանելի ապագայում կանեն թեկուզև մանր, բայց շոշափելի քայլեր, որպեսզի հասարակությունը ևս վստահի:

– Երիտասարդ նախարարների նշանա­ կումները միանշանակ չընդունվեցին: Հաշ­ վի առնելով, որ գործադիրում աշխատելու փորձ ունեք, ի՞նչ դիրքորոշում ունեք այդ նշանակումների մասին 

–Քաղաքական ոլորտում տարիների փորձը պետք է: Միայն տեսական գիտելիքներով դժվար է: Բայց երիտասարդությունը կապիտալ է, երիտասարդ լինելը՝ ևս: Երիտասարդները պետք է խոհեմ գտնվեն, հաշվի առնեն աշխատանքային գործընկերների, փորձառու մարդկանց կարծիքը: Կարծում եմ՝ կկարողանան  հաղթահարել: Միայն երիտասարդ լինելու հանգամանքը հաշվի առնելը դեռ բավարար չէ նրանց աշխատանքային հաջողությունները կասկածի տակ դնելու համար: Ես դեմ եմ այդ ծայրահեղ մոտեցմանը: Մենք տեսել ենք շատ  տարեց փորձառուների, ովքեր այդ փորձառություն չեն օգտագործել ի շահ պետականության ու հասարակությանը հուզող խնդիրների լուծման: Փորձենք վստահել, փորձենք աջակցել:  Երիտասարդ կադրը, երբ տեսնի, որ իր նկատմամբ հավատ կա, ժողովուրդն իրենից սպասելիք ունի, իր լիազորությունները կատարելու մեջ զգոն ու հաշվենկատ կլինի: Ես հավատով եմ տրամադրված: 

Այն քաղաքական ուժերը, որոնք կսխալվեն իրենց կատարած կադրային ընտրության մեջ, ոչինչ նրանց չի խանգարի վերանայել այդ որոշումը:  

– «Ծառուկյան» դաշինքը ԱԺ–ում բազ­ միցս է բարձրաձայնել նախկին կառավա­ րության մերժողական կեցվածքի մասին, երբ խոսքը, մասնավորապես, տնտեսական նախագծերի ու առաջարկների մասին էր:

Փոխհամագործակցության ի՞նչ ուղի եք տեսնում նոր կառավարության հետ:

–«Ծառուկյան» դաշինքի պատգամավորները միշտ էլ ամենօրյա աշխատանք են տարել թե՛ ժողովրդի շրջանում, թե՛ ԱԺ–ում և թե՛ պետական մարմինների հետ փոխհարաբերություններում:  Առիթը բաց չեն թողել օրենքի հիմնավորմամբ քննադատություն հնչեցնելու պետական կառավարման ոլորտում ներգրավված անփառունակ պաշտոնյաների հասցեին: Քննադատելով հանդերձ մենք առաջարկել ենք նաև լուծումը: Ինքնանպատակ քննադատություններով չենք զբաղվել ժողովրդի մոտ դիվիդենտներ շահելու նկատառումով:  Հիմա կառավարությանը մաս կազմելու հանգամանքը չի նշանակում, որ դաշինքի պատգամավորները նախկինում ունեցած վերոնշյալ մոտեցումը չպետք է կիրառեն բոլորովին: Նախկինում առաջարկած բոլոր խնդիրները, որոնք լուծում չեն ստացել, նույն ջանասիրությամբ պետք է առաջարկենք նաև գործող կառավարությանը: Մեր խորհրդարանական առաքելությունը ամբողջությամբ իրականացվելու է այնպես, ինչպես նախկինում: Անկախ նրանից, թե վատի կամ լավի հեղինակն ով է, մենք օբյեկտիվ ենք լինելու՝ լավին լավ ենք ասելու, վատին՝ վատ: Իսկ եթե դաշինքի կողմից գործուղված նախարարն ինչ-որ հարցում ձախողի, բնական է, մենք խորհրդարանական գործիչներով ու իրավական միջոցներով կփորձենք շտկել դա: Բայց այն անձը,  ով շարունակաբար կձախողի ոլորտը, բնական է, նրան գործուղած քաղաքական ուժը կվերանայի նրա պաշտոնավարման երկարաձգումը:

Շարունակությունը՝ «Փաստ» օրաթերթի այսօրվա համարում