Չմոռանանք, թե ինչի համար ենք հավաքվել

«Ժառանգություն» կուսակցության ղեկավար Արմեն Մարտիրոսյանը ներկա անցումային ժամանակահատվածում երկիրը «սպասարկելու» նպատակով ձևավորված կառավարության կազմը նորմալ է գնահատում և այս պահին նրանց գործունեությունից որևէ դժգոհություն չունի:

«Ձևավորված կառավարության ներկայի խնդիրը օպերատիվ կառավարումն իրականացնելն ու արտահերթ ընտրություններին պատրաստվելն է: Եվ այս պահին խոսել ինչ-ինչ ծրագրերի, դրանց կատարման, չկատարման կամ այլ մոտեցումների մասին, ես կարծում եմ, որ արդարացի չէ: Բացի այդ, նոր կառավարությանը չի կարելի մեղադրել տարատեսակ խնդիրների համար: Պետք է իմանալ, որ այս պահին իրենք այլ լիազորություններ ունեն, և ներկա փուլում անհրաժեշտ է հնարավորինս շուտ պատրաստվել արտահերթ ընտրությունների, որպեսզի երկիրը այս իրավիճակից շուտ դուրս գա»,- ասաց Ա. Մարտիրոսյանը: Թավշյա հեղափոխության տրամաբանական ավարտից հետո անցյալից կուտակված հարցերի մասին բարձրաձայնելու համար զանազան խմբեր իրենց վրա ուշադրություն հրավիրելու համար շարունակում են փողոցներ փակել: «Ժառանգություն» կուսակցության ղեկավարն այս երևույթին նորմալ է վերաբերվում, բայցև կարծում է, որ նախորդ կառավարության կողմից կուտակած սխալների համար ներկա կառավարությունը չպետք է պատասխանատվություն կրի:

«Ես կոչ եմ անում նման բողոքի ակցիաներին նորմալ վերաբերվել, քանի որ մարդիկ տարիներ շարունակ ունեցել են այդ խնդիրները, բայց դրանց այդպես էլ որևէ լուծում չի տրվել: Եվ հիմա փորձում են իրենց խնդիրների վրա ուշադրություն հրավիրել: Ու քանի որ իշխանափոխություն է տեղի ունեցել, հասարակությունը հույս ունի, որ նոր կառավարությունն իրենց խնդիրները շատ արագ կլուծի: Պետք է մեկ բան հիշել, որ այդ սոցիալ-տնտեսական խնդիրները մեկ օրում չեն ստեղծվել, իսկ դրանց լուծման համար իսկապես ժամանակ է հարկավոր: Պետք է այս ամենը հաշվի առնել, տարանջատված վերաբերմունք դրսևորել և նոր կառավարությունից չպահանջել այնպիսի բաներ, որոնք դուրս են կարճ ժամանակահատվածում լուծելու տրամաբանությունից»,- ասաց Ա. Մարտիրոսյանը:

Քաղաքական գործչի համոզմամբ, եթե այս կառավարությունն այնուամենայնիվ կարողանա նախկինից կուտակված որոշ հարցեր լուծել, շատ լավ կլինի, իսկ եթե որևէ հարց չկարողանա մինչև վերջ ավարտին հասցնել, ապա հասարակությունը չպետք է դժգոհի նրանցից:

Խոսելով քաղբանտարկյալների և «Սասնա ծռերի» անդամների խափանման միջոցը չփոխելու մասին, նա նշեց, որ որևէ կասկած չի կարող լինել, որ քաղբանտարկյալները օր առաջ պետք է ազատ արձակվեն և այստեղ նույնպես երկրորդ կարծիք լինել չի կարող:

«Ի տարբերություն սոցիալ-տնտեսական խնդիրների, այս հարցերի լուծման համար այդքան մեծ ժամանակ չի պահանջվում: Ես ոչ թե խոսում եմ քաղբանտարկյալների գործերը կարճելու, այլ չեղյալ հայտարարելու մասին: Ինչ վերաբերում է «Սասնա ծռերին», ապա իմ կարծիքով, դատարանը պետք է փոխի խափանման միջոցը և դատական պրոցեսը պետք է շարունակվի նրանց ազատության մեջ գտնվելու պայմաններում: Այսինքն, ակնհայտ է, այս հարցերի լուծումը շատ ժամանակ չի պահանջում և հնարավորինս սեղմ ժամկետներում և՛ Շանթ Հարությունյանն իր ընկերներով, և՛ Սամվել Բաբայանը, և՛ մյուսները պետք է ազատ արձակվեն»,- ասաց Ա. Մարտիրոսյանը:

Արմինե Գրիգորյան