Շո­ու­նե­րի մշա­կույթն ու հայ­կա­կան նոր իրո­ղու­թյուն­նե­րը. «Փաստ»

«Փաստ» օրաթերթը գրում է.

Նկատե՞լ եք, թե ինչ հետաքրքիր իրադարձություններ են տեղի ունենում մեր երկրում վերջին մեկ ամսվա ընթացքում։ Տպավորություն է, որ մենք բոլորս գտել ու բացել ենք Պանդորայի արկղիկը և հիմա չգիտենք՝ ինչ անենք դրա հետ։ Ցույցերն ու դրանց միջոցով ինչ-որ հարցեր լուծելու փորձերը տարածվել են ամբողջ երկրով մեկ, անգամ ակադեմիական ոլորտում ենք ուզում բարեփոխումների հասնել, հանել ԵՊՀ ռեկտորին, ով ոչ մի կերպ հաշվետու չէ հանրությանը ու ով գիտական բուրգի մի մասն է։ Ինչևէ, հետաքրքիր իրողություն է, որն անդադար տրանսֆորմացվում և էվոլյուցիայի է ենթարկվում։ Սրա վառ ապացույցն է երեկ Երևանի քաղաքապետարանի դիմաց տեղի ունեցած ակցիան։ Դժվար էր իհարկե հասկանալ, թե ով, ումից ու ինչ էր պահանջում, ում էին մերժում և ինչ էր կատարվում։ Բայց մի բան ակնհայտ էր. հսկայական տրանսֆորմացիա էր տեղի ունեցել մի քանի օրվա ընթացքում։ Մի քանի օր առաջ ականատես եղանք ցույցի ընդդեմ քաղաքապետի և նույն պահին տեղի ունեցող աջակից ցույցի։ Ընդ որում՝ հանրային դիսկուրսն այն էր, որ քաղաքապետարանում հավաքվել էին ՀՀԿական դեմքեր, որոնց ստիպել էին գալ, ինչ-որ մի բան անել ի պաշտպանություն վերջին օղակի։ Տեղի ունեցավ այն, ինչ կարելի էր անվանել սովորական մի հավաք։ Երեկ արդեն պատկերը բավականին հետաքրքիր էր։ Քաղաքապետարանի դիմաց հավաքված էին միայն երիտասարդներ, ովքեր պնդում էին, որ ոչ մի քաղաքական ուժ չեն ներկայացնում, ուղղակի դեմ են քաղաքական շոուներին և եկել են դրանցից հերթականը դիտելու։ Արդեն կային կրեատիվ, հավես մոտեցումներով կոչեր և մտածված ընթացք։ Արդյոք կարելի՞ է ենթադրել, որ սկսվում է մի նոր շրջան, որն անցնելու է սոցիալական ցանցերի լայվերի, հետաքրքիր ակցիաների և կրեատիվ գաղափարների իրականացմամբ։ Այս պահին դժվար է ասել, բայց հանրային էյֆորիան, որն արդեն պետք է մարեր, դեռ շարունակվում է։ Մնում է հուսալ, որ այս շոուների հետևում, իրոք, կա գաղափար. հակառակ դեպքում կունենանք մի շատ դասական ու ցավալի սցենար՝ հին հռոմեական կործանարար մոտեցում, երբ մարդկանց տալիս էին «տեսարան ու ուտելիք», բայց հստակ քայլերով տանում դեպի հասարակության կործանում։ 

Շարունակությունը՝ «Փաստ» օրաթերթի այսօրվա համարում