Քրեական ռեժիմի դեմ պայքարը լուծված է, անցնում են կուսակցություն հիմնելուն. «Փաստ»

«Փաստ» օրաթերթը գրում է.

«Ոտքի Հայաստան» քաղաքացիական շարժումը որոշել է կուսակցություն հիմնել: Ո՞րն է լինելու կուսակցության գաղափարախոսությունը, ինչո՞ւ հիմա ի վերջո միս ու արյուն ստացավ կուսակցություն ստեղծելու գաղափարը: Այս հարցերի պատասխանը փորձեցինք պարզել շարժման ղեկավար, վերջերս բանտից ազատ արձակված Անդրիաս Ղուկասյանից: «Ոտքի Հայաստան» շարժումը որոշում կայացրեց նոր կուսակցություն հիմնադրել: Անվանումն այս պահի դրությամբ Հայ կառուցողական կուսակցություն է, գաղափարախոսությունը՝ տոտալ–լիբերալիզմ: Մոտակա շաբաթներում՝ հունիս ամսվա ընթացքում պլանավորում ենք մեր տեսլականն ու պետական կառավարման հայեցակարգը ներկայացնել հանրության լայն զանգվածին և անցկացնել համապատասխան միջոցառումներ՝ հիմնադիր համագումար և գրանցման գործընթացի մեկնարկ»,– «Փաստի» հետ զրույցում ասաց Ղուկասյանը: Քանի որ վերջինս ընդամենը մի քանի օր է ազատության մեջ, հետաքրքիր էր իմանալ՝ կուսակցություն ստեղծելու գաղափարը մինչ ազատազրկո՞ւմն է եղել, թե՞ դրանից հետո կամ ընթացքում: «Կուսակցություն ստեղծելու գաղափարն էապես կախված է այսօր առկա իրավիճակից: Քաղաքական առումով մեր հանրությունը մտնում է նոր փուլ: «Ոտքի Հայաստան» քաղաքացիական շարժումը քաղաքացիների միավորում է, որը ստեղծվել էր քրեական ռեժիմի դեմ պայքարելու համար: Այդ խնդիրն արդեն լուծված է: Դրա համար նոր փուլին համապատասխան նոր կառույց է անհրաժեշտ: Մենք տեսնում ենք, որ հանրությունը կարիք ունի կառուցողական առաջարկների, նոր հայեցակարգերի: Մենք փորձելու ենք օգտակար լինել հանրությանը այս ոլորտում նույնպես՝ հանդես գալով մեր առաջարկներով: Նախկինում ունեինք այդ տեսլականը: Վաղ թե ուշ շարժումը պետք է վերածվեր քաղաքական կուսակցության: Բայց դա ընդհանուր ռազմավարական տեսլական էր, իսկ հիմա, երբ Հայաստանում տեղի ունեցավ թավշյա հեղափոխություն, բնական է, որ պետք է շարժումը վերաձևավորվի և նոր պայմաններին համապատասխան գործի»,–նշեց Անդրիաս Ղուկասյանը: Հարցին, թե կուսակցությունառատ մեր երկրում իրենց կուսակցությունը Հայաստանում գոյություն ունեցող այլ կուսակցություններից ինչո՞վ է տարբերվելու, Ղուկասյանն ասաց. «Մենք կփորձենք լինել այդ դաշտում մրցունակ: Այսօր ունենք բավական վստահության պաշար, քաղաքացիների կողմից աջակցության պոտենցիալ ենք տեսնում, փորձելու ենք դա կապիտալացնել՝ ներկայացնելով հանրությանը հստակ, պարզ, կառուցողական ծրագրեր, որոնք հնարավորություն կտան Հայաստանին դուրս գալ տնտեսական այս ճգնաժամային իրավիճակից»: Ղուկասյանը համոզմունք ունի, որ կկարողանան բոլոր կուսակցաշինական աշխատանքները տանել այնպես, որպեսզի արտահերթ ընտրությունների ժամանակ պատրաստ լինեն մասնակցելու դրանց: Արդյո՞ք ներկայիս իշխանությունների վարած քաղաքականությունն ու գործողությունները դրական ու բավարար է համարում: «Սա անցումային փուլ է: Կառավարության գլխավոր խնդիրն է երկրում պայմաններ ստեղծել արտահերթ խորհրդարանական ընտրություններ անցկացնելու համար: Մեծ հաշվով՝ այո՛, այն, ինչն այսօր կատարվում է, դրական ենք գնահատում: Իհարկե տեսնում ենք, որ անցումային փուլին բնորոշ այս ժամանակահատվածում ռիսկեր կան՝ հակահեղափոխական ուժերը կարող են գլուխ բարձրացնել: Գտնում ենք, որ անհրաժեշտ է բոլոր ժողովրդավարական ուժերին լինել զգոն և նման տեսակի հնարավորությունների համար հիմք չստեղծել, շարունակել պահպանել հանրային սոլիդարությունը, որպեսզի հեղափոխության արդյունքները պաշտպանվեն և կապիտալիզացվեն, նոր հնարավորություններ ստեղծվեն բոլորի համար»,– ասաց մեր զրուցակիցը:

Շարունակությունը՝ «Փաստ» օրաթերթի այսօրվա համարում