Քաղաքագետ. «Լավագույն բանը, որ կարող են անել, նոր կուսակցություն ստեղծելն է». «Փաստ»

 

«Փաստ» օրաթերթը գրում է.

Արդարադատության նախկին նախարար Դավիթ Հարությունյանը ՀՀԿ ԳՄ նիստից հետո հայտարարել է, որ ՀՀԿ–ն պատրաստ է քաղաքական ուժերի հետ քննարկել թե՛ Ընտ­ րական օրենսգրքի փոփոխությունները, թե՛ արտահերթ ընտրությունների անցկացումը: Մի քանի օր առաջ էլ ԱԺ ՀՀԿ խմբակցության ղեկավար Վահրամ Բաղդասարյանը նշել էր, որ իրենք պատրաստ են ԱԺ–ում փոքրամասնություն լինելու սցենարին: Քաղաքագետ Միքայել Զոլ յանը հայտարարությունների առումով երկու գործոն  է առանձնացնում: «Մի կողմից ՀՀԿ–ն հասկանում է, որ ընտրություններում կրելու է ջախջախիչ պարտություն և զրկվելու է ԱԺ–ում տեղերի մեծամասնությունից, եթե, իհարկե, կարողանա այնտեղ հայտնվել: Մարդիկ չեն ուզում զրկվել պատգամավորական մանդատներից, առավել ևս, որ շատերի դեպքում դա նրանց պաշտպանում է քրեական հետապնդումից: Մյուս կողմից՝ կա հանրության ճնշումը, որ ընտրությունները հնարավորինս շուտ կայանան: Այդ պատճառով էլ ՀՀԿ–ն մանևրելու է, փորձելու է շատ կոպիտ ձևով չհակադրվել հանրությանը, բայց բոլոր հնարավոր ձևերով հետաձգելու է ընտրությունների անցկացումը, քանի որ, իրենց կարծիքով, ժամանակն աշխատում է իրենց օգտին»,– «Փաստ»–ի հետ զրույցում ասաց քաղաքագետը: Դիտարկմանը, թե, այնուամենայնիվ, դեռ խոսվում է հակահեղափոխության վտանգի մասին ու հարցին, թե նման հնարավորություն այս պահին քաղաքագետը տեսնո՞ւմ է, նա պատասխանեց. «Ես չեմ կարծում, որ ՀՀԿ–ն կարող է հետ գալ իշխանության: ՀՀԿ–ն այնքան վարկաբեկված է, որ կարող է իշխանության գալ միայն որևէ օտար ուժի տանկերով, ընդ որում՝ դա էլ քիչ հավանական է: Բայց ՀՀԿ–ն կարող է լուրջ խնդիրներ ստեղծել, սաբոտաժի ենթարկել նոր կառավարության գործունեությունը: Իհարկե, արդյունքում նրանք էլ փլատակների տակ կմնան, բայց մեզ դրանից քիչ սփոփանք կլինի: Բացի այդ, այս պայքարից կարող են օգտվել երրորդ ուժերը՝ թե՛ երկրի ներսում, թե՛ դրսում: Կարծում եմ՝ այսօրվա իրավիճակում լավագույն բանը, որ կարող են անել ՀՀԿ–ում դեռ մնացած նորմալ մարդիկ՝ ՀՀԿ–ից դուրս գալն ու նոր կուսակցություն ստեղծելն է, որը կներկայացնի պահպանողական–ազգայնական բևեռը: Այդ ճանապարհով նրանք կազատվեն կիսաքրեական այն ցանցից, որի շահերն այսօր, փաստորեն, սպասարկում է ՀՀԿ–ն»: Նրա խոսքով՝ այդկերպ նրանք գոնե մի քանի տարի անց մարդկանց վստահությունը հետ բերելու շանս կստանան: Ինչ վերաբերում է նոր իշխանությանը, ապա, Միքայել Զոլ յանի դիտարկմամբ, թե՛ ներսում և թե՛ դրսում նրանց համար բազմաթիվ խոչընդոտներ կան: «Ընդ որում՝ այդ խոչընդոտները միմյանց հետ կապված են: Այսօր ամենամեծ խոչընդոտն այն է, ինչը կարելի է անվանել «խորքային պետություն»: Այսինքն՝ այն ոչ ֆորմալ, կիսամաֆիոզ կառույցը, որը ստեղծվել էր նախկին իշխանության տարիներին՝ պետական մարմիններին զուգահեռ և պետական մարմինների ներսում: Այդ կիսաքրեական կառույցի քաղաքական թևն է խորհրդարանի ՀՀԿ ֆրակցիան, որն իրականացնում է այդ քրեական ցանցի պաշտպանությունը քաղաքական քողի տակ: Սրա վառ օրինակն էր այն, որ ՀՀԿ–ական որոշ պատգամավորներ ստորագրություններ են հավաքում՝ կոնկրետ քրեական գործերով ձերբակալվածներին ազատելու համար: Բացի այդ, խորքային պետության շատ ներկայացուցիչներ դեռ մնում են ուժային նախարարություններում, դատախազությունում, դատական մարմիններում, շարունակում են վերահսկել տնտեսության զգալի մասը, մեծ ռեսուրսներ ունեն տեղեկատվական դաշտում: Այնպես որ՝ հեշտ չի լինելու: Դրսում ևս մենք ունենք խնդիր, որ որոշ ուժեր փորձում են վարկաբեկել նոր իշխանությանը թե՛ Արևմուտքում, թե՛ Ռուսաստանում: Ընդ որում՝ վերջինն առավել վտանգավոր է՝ հաշվի առնելով Ռուսաստանի ազդեցությունը: Այս ամենն առավել վտանգավոր է այն դեպքում, երբ այս հարցում համընկնում են նախկին իշխանության լոբբիստների և ադրբեջանական լոբբիստների շահերը. նրանք մոտավորապես նույն մեսիջներն են ուղարկում»:

Շարունակությունը՝ «Փաստ» օրաթերթի այսօրվա համարում