Փոքր և միջին ջերմոցային տնտեսությունները փակվում են. «Փաստ»

«Փաստ» օրաթերթը գրում է.

Փոքր և միջին ջերմոցային տնտեսությունները կամաց– կամաց մարում են: «Ջերմոցային ասոցիացիա» գյուղատնտեսական հ/ կ տնօրեն Պողոս Գևորգյանը վերջին դեպքերն է մտաբերում: Երկու տարի առաջ Արարատի մարզի Դարակերտ և հարակից համայնքներից մի քանի ֆերմեր ջերմատները քանդեցին և վաճառած մետաղի գումարով երկրից հեռանալու տոմսեր գնեցին: Փոքր և միջին ջերմատնային բիզնեսը ուշքի բերելու համար, Գևորգյանի կարծիքով, պետք է գազի գինը նվազեցնել:

«Մարդիկ ջերմոց չեն դնում գազի գնի պատճառով: Մեզ մոտ գազի գինը շատ բարձր է: Մոլդովայում սպառողը գազն օգտագործում է 220 դոլարով, մերը 300 դոլարի է հասնում»,– «Փաստ»–ի հետ զրույցում ասաց գյուղատնտեսական հ/կ տնօրենը:

Ֆերմեր Հենրիկ Եղիազարյանը նույնպես գազի սակագներից է բողոքում: Նրա խոսքով՝ ամբողջ տարին ինչ աշխատում, գազի համար է վճարում: ««Կռախ» վիճակ է: Հոկտեմբերից մինչև մայիս գազ ենք վառում, հենց բերքը պետք է շուկա հանենք, դրսից լոլիկ են բերում, ստիպված էժան ենք մեր ապրանքը վաճառում, չենք կարողանում գումար աշխատել՝ գազի փող տալու համար գնում, վարկ ենք վերցնում »,–նեղսրտեց հողագործը:

Պետությունը ջերմոցատերերի համար գազի գնի մասնակի սուբսիդավորում է կատարում: 5 ամիս նրանք սպառած կապույտ վառելիքի դիմաց էժան են վճարում: Պողոս Գևորգյանի պնդմամբ՝ այդ ժամանակաշրջանը քիչ է: Բացի այդ էլ գազի որակն է վատ, նախատեսված ջերմաստիճանն ապահովելու համար ստիպված ավել են վառում: 

«Նոյեմբերից մարտ սպառած գազի համար 107 դրամ են վճարում, բայց հոկտեմբեր և ապրիլ ամիսներին ևս վառում են ու խայտառակ բարձր գներով: Ժամանակը երկարաձգելու համար պատկան մարմիններին ենք դիմել»,– շարունակեց մեր զրուցակիցը: Մասնագետը մտահոգված է, որ հայկական գյուղմթերքն այդպես էլ չկարողացավ գրավել ԵԱՏՄ–ի շուկան:

«Հայկականի անվան տակ թուրքական լոլիկ են մեր երկրից ՌԴ տանում: Հայկական արտադրանքի համբավն այնտեղ ընկել է: Որոշ խոշոր ջերմոցատերեր անցյալ տարի Թուրքիայից լոլիկի սածիլ են բերել, աճեցրել և արտահանել: Տեղական շուկայում էլ են դրանք ցածր գներով վաճառվում, այս ամենի հետևանքով մեր ֆերմերները չեն կարողանում կատարած ծախսերի տակից դուրս գալ»,–դժգոհեց նա:

ՌԴ–ից Պողոս Գևորգյանից մեծ քանակությամբ լոլիկ են ուզել: Այդքան որակյալ բերք նա չի կարող ֆերմերներից հավաքել և ուղարկել: «Մենք այսօր լավ բերք չունենք:

Պետք է մեր տեղական սերմերով, մեր տնկանյութերով արտադրանք տանք: Լավ որակի լոլիկ արտադրելու հնարավորություն ունենք: Կառավարությունը մեզ պետք է այս հարցում օգնի, որ կարողանանք մեր բերքի որակը բարձրացնել և դրսի շուկայում տեղ գրավել»,–նկատեց Պողոս Գևորգյանը: 

Հայաստանը ջերմատնային ինդուստրիալ երկիր դարձնելու նպատակով ասոցիացիան պետությանն առաջարկում է սուբսիդավորված վարկեր տրամադրել: Ըստ նրա՝ նպատակն է ջերմատները զարգացնել հատկապես լեռնային գոտիներում, ինչը հնարավորություն կտա համայնքներում կրճատել գործազրկության մակարդակը: Գաղափարն իրագործելու համար մտադիր են արևի էներգիան օգտագործել: «Մենք այսօր հնարավորություն ունենք լեռնային գոտիներում՝ Տավուշ, Իջևան, Մեղրի, ջերմատներ սարքել, այնտեղ հողն ու ջուրը մաքուր է, ինչի շնորհիվ օրգանական գյուղմթերք կարող ենք արտահանել: Դա թանկ հաճույք է, բայց բարձր գնով էլ վաճառվում է: Իմացա, որ Մեղրիի գյուղերում մարդ չի մնացել, իսկ այդ տարածքը մեզ համար ստրատեգիական նշանակություն ունի»,–նշեց հ/կ նախագահը:

Շարունակությունը՝ «Փաստ» օրաթերթի այսօրվա համարում