Կայացավ «Նովա» անսամբլի համերգային երեկոն

Հունիսի 13-ի երեկոյան Կոմիտասի անվան կամերային երաժշտության տունը լեփ-լեցուն էր մարդկանցով: Երևանի հիմնադրման 2800-ամյակին նվիրված համերգային ծրագրով հանդես եկավ «Նարեկացի» արվեստի միության «Նովա» ժողովրդական նվագարանների անսամբլը գեղարվեստական ղեկավար ՀՀ մշակույթի վաստակավոր գործիչ Հովիկ Սահակյանի գլխավորությամբ: 

Համերգը մեկնարկվեց հայկական ժողովրդական շուրջպարով, որից հետո նվագախմբին միացան մեներգիչներ Նարե Ավագյանը, Արման Առաքելյանը, Յանա Թևանյանը, Լուսինե Աղաջանյանը: 

Համերգային երեկոյի ընթացքում «Նովա» անսամբլին իրենց կատարումներով ողջունեցին «Քնար» հոգևոր և ժողովրդական երգերի խումբը (գեղարվեստական ղեկավար՝ Լուսինե Աղաջանյան), Եղվարդի արվեստի դպրոցի դուդուկի դասարանի սաները (ղեկավար՝ Գևորգ Կազազյան), թառահար Ալեքսանդր Սահակյանը և երգիչ Արամ Մովսիսյանը:

Ողջույնի խոսքով հանդես եկավ նաև «Նարեկացի» արվեստի միության հիմնադիր Նարեկ Հարությունյանը:

- Մեր զինվորները պաշտպանում են մեր սահմանները, իսկ մեր արվեստագետները, մեր երաժիշտները պաշտպանում են մեր մշակույթը, մեր երգերը, մեր ժառանգությունը, մեր ազգային արժանապատվությունը: Այդ առումով իրենցից ամեն մեկն էլ մի հերոս է, մի դեսպան մեր մշակույթի պահպանման գործում…  

«Նարեկացի» արվեստի միությունն իր շնորհակալական խոսքն է ցանկանում հղել առաջին հերթին Տիրոջը, որովհետև մենք ծառայում ենք Աստծուն:

Հատուկ շնորհակալություն ծնողներին, որ դաստիարակել են այսպիսի երեխաներ:

Շնորհակալություն բոլոր նրանց, ովքեր հավատացել և հավատում են: Շնորհակալություն մենակատարներին, ովքեր սիրահոժար մասնակցեցին այսօրվա համերգին, շնորհակալություն բոլորիդ, որ այսօր այստեղ եք:

Ամենաուժեղ բանակը կորած է առանց իր առաջնորդի, ամենալավ անսամբլն՝ առանց իր գեղարվեստական ղեկավարի: Շնորհակալություն պարոն Սահակյանին՝ այսքան մեծ աշխատանք իրականացնելու և 14 տարի միության հետ լինելու համար,-իր խոսքն այսպես եզրափակեց միության հիմնադիրը:

Հանդիսատեսի շարքերում էին Ռուբեն Ալթունյանը, Ստեփան Շաքարյանը, Դանիել Երաժիշտը, Ծովինար Հովհաննիսյանը և շատ այլ արվեստագետներ:

-«Նարեկացի» արվեստի միությունը շարունակում է իր որդեգրած ազգանվեր գործունեությունը՝ բազմաթիվ միջոցառումների, ծրագրերի և նախագծերի միջոցով նպաստելով հայկական մշակույթի ժառանգության պահպանմանն ու զարգացմանը: Ես չեմ ճանաչում որևէ այլ մարդու, ով այսքան նվիրված լինի հայկական մշակույթին և դրա զարգացմանն ու տարածմանը, որքան Նարեկ Հարությունյանը: Շնորհակալ ենք նրան՝ երիտասարդներին նման հնարավորություններ ընձեռելու և իրականացնելու համար,- իր խոսքում նշեց Հովիկ Սահակյանը: 
Միջոցառմանը հնչեցին հայ կոմպոզիտորների ստեղծագործություններ, հայկական ժողովրդական երգեր և պարեղանակներ: 

«Նարեկացի» արվեստի միությունն իր խորին երախտագիտությունն է հայտնում  ՀՀ մշակույթի նախարար Լիլիթ Մակունցին՝ միության խնդրանքին արձագանքելու և Կոմիտասի անվան կամերային երաժշտության տունն անհատույց տրամադրելու համար: