«Այդ ամենը առաջին դեմքի՝ Սերժ Սարգսյանի ուղիղ հովանու ներքո էր գտնվում». «Փաստ»

«Փաստ» օրաթերթը գրում է.

Գուրգեն Եղիազարյանը, ով մոտ 15 տարի գործունեություն է ծավալում ընդդիմադիր դաշտում, կարծում է, որ բավականին թշնամիներ ունի իշխանական նախկին վերնախավում, որոնք միլիոնավոր դոլարներ ունեն: «Փաստ»-ի հետ զրույցում նա ասաց, որ այդ է պատճառը, որ ամեն վայրկյան էլ կարող են նրան վարկաբեկելու համար այս կամ այն բլոգերին վճարել, որպեսզի իր ասածները քննադատեն: Խոսելով ԱԱԾ-ի պետի՝ իրեն ու Ն. Փաշինյանին թիրախավորելու հայտարարության մասին իր հայտնած տեսակետի մասին, նա նշեց, որ ինքը ընդամենը մեկնաբանել է այն:

«Ես ընդամենը փակագծերն եմ բացել՝ ասելով, որ, այո՛, այդ երկու պաշտոնյայի դեմ պայքարելու դիմաց շուրջ 50 միլիարդ դոլար է դրած: Եվ պարզ է, որ այդ մարդիկ չեն ցանկանում ամեն ինչից զրկվել»,- ասաց Գ. Եղիազարյանը:

Խոսելով ԱԺ պատգամավոր Արթուր Գևորգյանի այն հայտարարության մասին, որ եթե Մանվել Գրիգորյանի թալանածը համեմատենք մյուսների հետ, ապա առաջին 100-յակում նա չի հայտնվի, Գ. Եղիազարյանն ասաց. «Հայաստանը թալանի առումով իսկական Կլոդայքն է: Թալանչիներին և միլիարդավոր դոլարներ հայտնաբերելու անսահման հնարավորություններ կան»,- ասաց Գ. Եղիազարյանը:

Խոսելով «Յանս» ակումբում մոտ 2 մլն դոլար գումար հայտնաբերելու մասին, ԱԱԾ նախկին պետի տեղակալն ասաց, որ այդքան «քյաշ» գումար հայտնաբերելու հարցը պետք է պարոն Վ. Օսիպյանին ուղղել, բայց կարելի է նաև մտածել, թե ինչ են վաճառել, որ այդքան գումար է եղել:

«Մի քիչ տրամաբանությունը լարեք ու մտածեք, թե այդ ինչ պետք է վաճառեն ակումբում, որ 2 մլն-ին մոտ «քյաշ» գումար լինի՝ երեք բան»,- ասաց Գ. Եղիազարյանը:

Հարցին՝ թմրանյութե՞ր, զե՞նք, կանա՞յք, ԱԱԾ նախկին պետն ասաց. «Դա դուք ասացիք: Հիմա տրամաբանեք, թե դրանցից որը կլինի: Եթե երեք անգամ գնաք ակումբ, առանց օպերատիվ փորձի կիմանաք, թե այդ 3-ից որն է այնտեղ վաճառվել»,- ասաց Գ. Եղիազարյանը: Խոսելով հերոսի անվան տակ սեփական «հերոսություններն» անելու մասին՝ նա նշեց, որ նման մարդիկ ոչ թե հերոսներ են եղել, այլ հակահերոսներ, որոնք, ցավոք, հերոսացվել են ինչ-ինչ մարդկանց կողմից: 

«Պետք է վերլուծել, թե ում էր պետք Մանվել Գրիգորյանին հերոսացնել և անձեռնմխելի դարձնել: Ո՞ւմ պատվերն էին նրանք կատարում, ինչո՞ւ: Չէ՞ որ այդ չակերտավոր հերոսները կամ հակահերոսները հիմնականում զբաղվում էին ընտրություններով, որպեսզի ՀՀԿ-ն հերթական ընտրությունների ժամանակ վախի, ստորացման, հաշվեհարդարի ազդեցության տակ ձայն հավաքի: Այդ ամենը կբացահայտվի, և դա սարսափների սարսափն է, որը մինչև այսօր իրենից դեռ շատ լուրջ վտանգ է ներկայացնում»,- ասաց Գ. Եղիազարյանը:

Նրա կարծիքով, երկրին դեռևս պերմանենտ հեղափոխություն է սպառնում, որովհետև հակահեղափոխական ալիքը մշտապես զուգահեռ մեր իրականության հետ է ընթանալու: 

«Մենք դրանից դեռ երկար ժամանակ չենք կարողանալու ձերբազատվել: Այդ իսկ պատճառով ուժերի գերագույն լարում է հարկավոր: Եվ Աստված չանի, որ երկրապահները դեռ ձայներ բերելու հնարավորություն ունենան: Երկիրը կկործանեն: Հատկապես վերջին 10 տարին մեր երկիրը տոտալ թալանի է ենթարկվել, որի արդյունքում եղել են դիակներ, վիրավորներ, առևանգվածներ, բանտախցերում հանիրավի հայտնվածներ և այլն: Իսկ հիմա ոչ միայն քարերը հավաքելու, այլև նետելու ժամանակն է»,- ասաց Գ. Եղիազարյանը:

Խոսելով այն մասին, թե ինչու է ինքը պաշտպանում Դոն Պիպոյին, նախկին ԱԱԾականն ասաց, որ Արթուր Ասատրյանը հանցագործ չէ, այդ պատճառով: Ինչ վերաբերում է մամուլում տարածված տեսակետին, թե թավշյա հեղափոխությունից հետո Էջմիածնում տեղի էր ունենում կրիմինալ հեղափոխություն, ապա ըստ Եղիազարյանի, դա հատուկ մտածված քայլ էր երեխաների ծանրոցները յուրացնող անձանց ապահովագրելու համար, ինչի դեմ էլ դուրս էր եկել Դոն Պիպոն: Հարցին, թե այդ դեպքում, ինչո՞ւ ոստիկանությանը դիմելու փոխարեն նա որոշել էր իր առանձնատանը նման քանակի զենքզինամթերք կուտակել, Գ.Եղիազարյանը պատասխանեց.

«Եթե դուք իմանաք, որ թիրախավորված եք և գիշերը հարձակման եք ենթարկվելու, ինչ կանեիք, այն դեպքում, երբ 10 տարի շարունակ Էջմիածնի բնակչությունը օրը 15-20 անգամ դիմել է իրավապահ մարմիններին, բայց ով դիմել է, նա էլ պատժվել է, նստել է: Այդպիսին է Էջմիածին քաղաքում տիրող իրականությունը: Եվ Վլադիմիր Գասպարյանը չլիներ, 50 հատ էլ Վլադիմիր Գասպարյան լիներ, եթե այդ ամենը առաջին դեմքի՝ Սերժ Սարգսյանի ուղիղ հովանու ներքո էր գտնվում, այդ պարագայում ի՞նչ Վլադիմիր Գասպարյան, ի՞նչ անվտանգություն, ի՞նչ պաշտպանության նախարարություն: Նրա ցանկացած հանցագործ միտումի տանիքը նա էր, նա էլ նրա համար հին բոլշևիկ էր: Այդքան բան»,- ասաց Գ.Եղիազարյանը:

Շարունակությունը՝ «Փաստ» օրաթերթի այսօրվա համարում