Վերանորոգման համար գումար ստանում են և պնդում, թե վերանորոգումն իրենց գործառույթը չէ. «Փաստ»

ОБЩЕСТВО 27 Июнь, 2018 8:37

«Փաստ» օրաթերթը գրում է.

Նախորդ շաբաթ օրը Էրեբունի վարչական շրջանի Գ. Մահարի 39 հասցեում գտնվող շենքի բակի խաղադաշտում ֆուտբոլի դարպասի վերևի ձողն ընկել էր ութ տարեկան տղայի գլխին, ում շտապ օգնության մեքենայով տեղափոխել էին «Սուրբ Աստվածամայր» բժշկական կենտրոն: Այնտեղ արվել է սոնոգրաֆիա ու KT հետազոտություն: Պարզվել է, որ երեխան ստացել էր ուղեղի ցնցում: Երեխայի տատիկը՝ տիկին Ռուզաննան, «Փաստ»–ի հետ զրույցում նախ նշեց, որ հիվանդանոցում երեխային մատուցված առաջին օգնությունը, որպես այդպիսին, անմիջապես չի արվել: Իրենք երկար սպասել են միջանցքում, մինչ մի բարեխիղճ բուժքույր սենյակ է տրամադրել: Սակայն տուժած երեխայի հարազատների համար բժշկական կենտրոնի աշխատակիցների վերաբերմունքն այդքան սարսափելի չէ, որքան խաղահրապարակում ստուգումներ չիրականացրած պատկան մարմինների անտարբերությունը տեղի ունեցածի նկատմամբ:

Մինչ այս դեպքը «Հանրային իրազեկման և մոնիթորինգի կենտրոն» ՀԿ–ի՝ մի քանի ամիս տևած ուսումնասիրությունների արդյունքում պարզ էր դարձել, որ երևանյան խաղահրապարակների մեծ մասն անվտանգ չէ: Այստեղ հայտնաբերվել էին հողի մեջ պարունակող քրոմի ու կապարի բարձր ցուցանիշներ, ինչպես նաև անզեն աչքով տեսանելի էր որոշ խաղահրապարակների՝ այս կամ այն սարքավորումների անսարքությունը կամ վտանգավոր լինելը: Կոտրած ճոճանակներ, խաղահրապարակի անմիջապես հարևանությամբ գտնվող գազատար և այլն: Սակայն չկրկնենք, այս մասին արդեն գրել ենք, տեղեկացրել: Թվում էր, թե այդ հրապարակումներին պետք է հաջորդեին պատկան մարմինների կողմից համապատասխան գործողություններ, ստուգումներ, անսարքությունների վերացում:

Բայց ինչպես և նախկինում էր, այս անգամ էլ նրանք, ովքեր իրավասու էին խաղահրապարակների անվտանգության ու պահպանման համար, ոչինչ չեն արել: Եվ որոշ մարդկանց ամենաթողության հետևանքով այսօր երեխան հայտնվում է հիվանդանոցում՝ բարեբախտաբար առանց լուրջ հետևանքների: Բայց դա այս անգամ: Իսկ հաջո՞րդ:

Ութամյա Էրիկի տատիկը պատմեց, որ դեպքից երկու օր անց՝ երկուշաբթի օրը, իրենց են այցելել քաղաքապետարանից կամ թաղապետարանից: Համենայն դեպս, նա այդպես է հասկացել: Վերջինները հարցրել են երեխայի որպիսությունից, իմացել, որ արդեն լավ է ու հեռացել: Ֆուտբոլի դաշտում վայր ընկած խողովակն էլ երեք օր գետնին մնալուց հետո բակի շենքի մի բնակիչ է ամրացրել՝ զոդել:

Երբ մենք զանգահարեցինք Էրեբունի վարչական շրջանի թեժ գիծ, աշխատակցուհին, տեղեկանալով դեպքի մասին, նշեց, որ խաղահրապարակների վերահսկողությունը համատիրության իրավասությունների ներքո է: Փոխանցեց մեզ այդ համատիրության կառավարչի՝ ոմն Հայկի հեռախոսահամարը: Զանգեցինք, վերջինս պատասխանեց, որ իրենց գործառույթների մեջ է մտնում միայն բազմաբնակարան շենքերի կառավարումն ու սպասարկումը:

Մինչդեռ մինչ այս դեպքը, դեռ երեք ամիս առաջ վերոնշյալ հ/կ–ին քաղաքապետարանից տեղեկացրել էին, որ բակային տարածքներում կառուցված մանկական խաղահրապարակները գտնվում են քաղաքապետարանի հաշվեկշռում, որոնք պահպանվում և վերանորոգվում են վարչական շրջանների ղեկավարների և համատիրությունների միջոցով: Ավելին, հ/կ–ի կողմից կատարված ուսումնասիրության ամփոփման ու համատիրությունների ու վարչական շրջանների աշխատակիցների հետ հանդիպման ժամանակ, որը տեղի էր ունեցել երկուսուկես ամիս առաջ, Արաբկիր վարչական շրջանի կոմունալ բաժնի պետի տեղակալի՝ Արթուր Ավագյանի կողմից ասվել էր, որ համատիրությունները քաղաքապետարանի կողմից ստանում են սուբսիդիաներ, և այդ գումարները ծախսվում են խաղահրապարակների վերականգնման ու վերանորոգման աշխատանքների վրա: Հավանաբար, Էրեբունի վարչական շրջանի համատիրության կառավարիչն այս մասին չգիտի, կամ գիտի և մտածում է, թե միայն ինքը գիտի:

Շարունակությունը՝ «Փաստ» օրաթերթի այսօրվա համարում