«Հիմա էլ Հանրապետականից գնում են այն կուսակցություն, որը եկել է իշխանության». «Փաստ»

ИНТЕРВЬЮ 30 Июнь, 2018 7:12

«Փաստ» օրաթերթը գրում է.

ՀՀԿ–ի հիմքերին մոտ կանգնած ԱԺ պատգամավոր Սուքիաս Ավետիսյանը նորմալ է վերաբերվում այն երևույթին, որ թավշյա հեղափոխությունից հետո շատերը լքում են ՀՀԿ–ն: Այդ փաստը նրա համար մտահոգիչ չի կարող լինել, քանի որ եթե մի օր եկել են կուսակցություն, ապա մի օր էլ կարող են գնալ:

«Ինձ համար հասկանալի չէ, երբ մտածում են, որ ՀՀԿ–ից դուրս գալով՝ իրենց մոտ ինչ– որ բան կփոխվի: Կուսակցություն մտնել– դուրս գալուց առաջ պետք չէ կուսակցական շահի սկզբունքով առաջնորդվել: Ստացվում է, որ այսօրվա կուսակցությունը լքողները նման սկզբունքով են առաջնորդվել»,–ասաց Ս. Ավետիսյանը:

Սեփական շահից «դրդված»՝ կուսակցությունը լքողների մասին նա այնքան ինֆորմացիա ունի, որքան յուրաքանչյուր մարդ: Ավելին, նրան առանձնապես չի հետաքրքրում, թե ով է գնում իրենց շարքերից: Եվ չնայած նա այս պահին արդեն մոտ 2500–ի չափով կուսակիցների «արտահոսքը» նորմալ է համարում, սակայն չի կարծում, որ այդ միտումը գնալով կաճի:

«Ըստ իս, ինչքան շուտ ինքնամաքրումը տեղի ունենա, այնքան լավ: Ես 20 տարուց ավելի հանրապետական եմ և երբևիցե ճիշտ չեմ համարել, երբ միայն շահ փնտրողներն են եկել հանրապետական: Բայց դուրս գալու տենդենցը հիմա այլևս մասսայական չէ, թեև մեկ ամիս առաջ նման պոռթկում կար: Հիմա կարելի է շատ հատուկենտ մարդկանց մասին խոսել»,–ասաց Ս. Ավետիսյանը:

Ինչ վերաբերում է իրեն, ապա նա սկզբում պատգամավոր է եղել, հետո է Հանրապետական կուսակցության շարքերն անցել: Այն էլ՝ որոշակի սկզբունքներից ելնելով, ոչ թե շահից դրդված: Ինչ վերաբերում է սխալներին, ապա պատգամավորի կարծիքով, պետք է ընդունել դրանք ու առաջ գնալ:

«Հանրապետականը խորտակվող նավ չէ: Պետք է փորձենք ընդունել սխալները և ապագայի մասին մտածենք: Բոլոր կուսակցություններում էլ լավն էլ կա, վատն էլ: Պարզապես հարկավոր է այդ ամեն ինչը մեկ անգամ սթափ վերլուծել և վերջակետ դնել»,–ասաց պատգամավորը:

Խոսելով ՀՀԿ–ի արդիականացման ծրագրի մասին՝ նա ասաց, որ ինքը ծանոթ չէ ծրագրին, բայց խոստացավ, որ երբ հրապարակվի, այն ժամանակ էլ իր կարծիքը կհայտնի: Դեպի կուսակցություն ներհոսքի մասին էլ պատգամավորն ասաց, որ իրենց շարքերը համալրողներ էլ կան: Ու թեև նրանք քիչ են, քանի որ հանրապետականն այլևս իշխանություն չէ, բայց դա չէ կարևորը:

«Եթե իշխանություն լիներ, կուսակցության շարքերը համալրողների թիվը, ինչպես միշտ, շատ կլիներ: Քիչ չէին մարդիկ, որ երբ հանրապետականն իշխանություն էր, ուրիշ կուսակցություններից դուրս եկան ու եկան հանրապետական: Հիմա էլ հանրապետականից գնում են այն կուսակցություն, որը եկել է իշխանության: Ես կարծում եմ, որ կուսակցությունները պետք է սկզբունքայնություն ցուցաբերեն և նման մարդկանց չընդունեն իրենց շարքերը: Նման մարդիկ ո՞ւմ են պետք: Ավելի լավ է՝ մնան անկուսակցական: Այն ժամանակ էլ պետք չէր նման մարդկանց ընդունել Հանրապետական կուսակցություն, բայց դա նույնպես պրոցես էր, որով մենք անցանք»,– ասաց Ս. Ավետիսյանը:

Ամեն դեպքում նա խորհուրդ է տալիս նման երևույթների մեջ որևէ արտառոց բան չտեսնել, քանի որ ցանկացած մարդ ինքն է իր որոշումը կայացնում: Ինչ վերաբերում է այդ պատճառով միջանձնային հարաբերությունները վատացնելուն, ապա պատգամավորի կարծիքով, ամեն դեպքում պետք չէ մեկը մյուսով պայմանավորել:

«Եթե մարդուն հանդուրժում ենք, պետք է բոլոր առումներով հանդուրժենք»,– ասաց Ս. Ավետիսյանը:

Խոսելով Ընտրական օրենսգրքում առաջարկվող փոփոխությունների մասին՝ նա ասաց, որ դեռ ծանոթ չէ առաջարկություններին, քանի որ ներկայում այդ ուղղությամբ երկու հանձնախումբ է աշխատում: Մեկը՝ կառավարությունում, մյուսը՝ ԱԺ–ում: Եվ, երբ բոլոր առաջարկությունները ամբողջանան, այդ ժամանակ էլ նա իր կարծիքը կհայտնի: Ինչ վերաբերում է ռեյտինգային համակարգին, ապա Ս. Ավետիսյանը կողմ է դրա որոշ տարրերի պահպանմանը:

«Փորձը ցույց է տալիս, որ մեզ մոտ իրավիճակն այնպիսին չէ, որ մարդիկ կարողանան քաղաքական հայացքներից ելնելով՝ ընտրություն կատարել: Այդպես մտածող կարող են ընդամենը եզակի քաղաքական գործիչներ լինել: Այդ պատճառով էլ մարզերում ու համայնքներում հատկապես ճանաչում են այն մարդկանց, որոնք ավելի շատ են իրենց հետ առնչվում, նրանց դարդ ու ցավով զբաղվում: Ուստի կարծում եմ, որ որոշակի ռեյտինգային տարրեր պետք է մնան, բայց առաջարկություններն ինչպիսին կլինեն, չեմ կարող ասել: Ինչ վերաբերում է նախկին մոդելին, ապա այդ ժամանակ պայքարը ոչ թե քաղաքական ուժերի միջև էր, այլև՝ նույն կուսակցության ներսում, որը շատ դեպքերում նույնիսկ խանգարում էր: Այնպես որ, իմ կարծիքով, ռեյտինգային համակարգը կարող է մնալ, բայց թե ինչ ձևով, դա է կարևորը»,–ասաց Ս. Ավետիսյանը:

Շարունակությունը՝ «Փաստ» օրաթերթի այսօրվա համարում