Ասֆալտը շարունակ քանդվում է, բայց վերանորոգման պատասխանատուն հայտնի չէ. «Փաստ»

«Փաստ» օրաթերթը գրում է.

Արաբկիր վարչական շրջանի Ադոնց–Ազատություն խաչմերուկի մի հատվածում ասֆալտը նստվածք է տվել ու իջել: Սա առաջին անգամը չէ: Ասֆալտի այս խնդիրը արդեն երրորդ անգամ է կրկնվում: Երկու անգամ վերանորոգում է իրականացվել Երևանի Ջրօգտագործողների միության կողմից: Բայց խնդիրը կրկնվել է, և տարածքով անցնող ավտոմեքենաների վարորդները ի հայտ եկած փոսի հետևանքով ստիպված են լինում լրացուցիչ գումարներ ծախսել մեքենաների վերանորոգման համար:

Խնդրով մտահոգ քաղաքացիները ահազանգել են «Փաստ»–ի խմբագրություն: Փորձեցինք հասկանալ, թե կրկնվող նստվածքի պատճառն ինչը կարող է լինել: 

Արաբկիր վարչական շրջանի ղեկավարի աշխատակազմի աշխատակիցը մեզ հետ զրույցում նշեց, որ խնդրին տեղյակ է: Վերջինս կոորդինացնում է ասֆալտապատման աշխատանքները: Նրա խոսքով՝ նստվածքի ուղղումը Երևանի Ջրօգտագործողների միության խնդիրն է, քանի որ այնտեղ իրենց խողովակաշարն է գտնվում: Հարցին, թե Ջրօգտագործողների միության հետ խոսե՞լ են՝ հասկանալու համար, թե երբ են վերանորոգելու, պատասխանեց, որ այդ հարցերով զբաղվում են քաղաքապետարանի կանաչապատման կամ բնապահպանության վարչությունները: Այս խնդրով կանաչապատման վարչությունը դիմել է Երևանի ՋՕ, որպեսզի վերջինները ուսումնասիրեն փոսի առաջացման պատճառները և համապատասխան միջոցներ ձեռնարկեն:

Երբ նշված հատվածում նստվածք էր առաջացել, 1–2 տարի առաջ վթարավերականգնողական աշխատանքներ էին իրականացվել: Նշում է, որ այնտեղ բավական խորը խողովակաշար է գնում: ՋՕ–ն ժամանակին արել է ասֆալտապատում, բայց հիմա այդ ասֆալտը նստվածք է տվել, և իրենք մոտ մեկ ամիս առաջ խնդրել են կրկնակի ասֆալտապատում կատարել, քանի որ նստվածքը խորանում է: Թաղապետարանի աշխատակիցը համոզված է, որ ՋՕ միության կողմից պետք է լուրջ ուսումնասիրություն իրականացվի, վթարը վերացվի ու ասֆալտապատում կատարվի:

Երևանի ՋՕ–ի ինժեներ Քոչար Մարտիրոսյանն էլ «Փաստ»–ի հետ զրույցում պարզաբանեց, որ նշված հատվածի տեղամասի պետը գնացել, տեղում ուսումնասիրել է ու պարզել, որ այնտեղ հին, չգործող ջրագիծ կա, որը, սակայն, իրենց կողմից չի շահագործվում ու օգտագործվում: Նրա խոսքով, Արաբկիրի կանաչապատման ծառայությունն այնտեղ խողովակներ ունի, որով շրջակա տարածքներն է ջրում: Այդ խողովակները միացված են իրենց ջրագծին, ջուրը բարձրանում է վերև և կարող է վթար լինել, եթե իրենք փականը չփակեն, ջուրը հանգիստ կարտահոսի: Մարտիրոսյանը նաև նշեց, թե որքանով տեղյակ է, նախորդ տարվա աշնանը այդ հատվածի մոտակայքում անցկացվել է խմելու ջրագիծ: Վերջինս չի բացառում, որ հնարավոր պատճառը նաև դա է: 

«Լսել եմ, որ նախորդ տարի նշված վայրից մի փոքր հեռու՝ 60–70 սմ այն կողմ, խմելու ջրագիծ են անցկացրել, կփորձենք հասկանալ՝ ինչ է»,–ասաց նա: 

Հարցին, թե ՋՕ իրավասությունների մեջ մտնո՞ւմ է խնդրի լուծումը, զրուցակիցս պատասխանեց, որ իրենք այդ ջրագիծը չեն օգտագործում և դրանով ջուր չեն մատակարարում. «Մենք մատակարարում ենք այլ ջրագծով, որտեղից միացում են կատարել կանաչապատման ծառայությունները: Նրանք գիծը միացրել են, բերել են իրենց հին ցանցի հետ համատեղել են, միացրել չգործողին, դրա համա էլ այդպիսի խնդիր  է առաջացել»: 

Ի վերջո, խնդիրն ո՞վ պետք է լուծի: Այս հարցին ի պատասխան Մարտիրոսյանը նշում է, թե պատրաստվում են հանձնաժողով ստեղծել, հասկանալ՝ ինչ կարող են անել: Ասում է, որ իրենք այնտեղ անելիք չունեն, բայց զուտ մարդկային համագործակցության տեսանկյունից հանձնաժողով կուղարկեն, որպեսզի տեղում ուսումնասիրեն իրավիճակը: Շեշտեց, որ դա տեղի կունենա առաջիկա մի քանի օրերի ընթացքոմ, որից հետո կտեղեկացնեն, թե իրենց աշխատանքն ինչ ընթացքի մեջ է: Հանձնաժողովում կընդգրկեն Արաբկիր վարչական շրջանի կանաչապատման և կոմունալ տնտեսության բաժինները:

Շարունակությունը՝ «Փաստ» օրաթերթի այսօրվա համարում