Շատ բաներ արվում են ոչ հրապարակային, որպեսզի մանևրելու տեղ մնա. ռուսաստանցի փորձագետը՝ Նախիջևանի դեպքերին ՀԱՊԿ-ի արձագանքի մասին

 

Նախիջևանում գործողություններով սադրելով՝ Ադրբեջանը փորձում է հասկանալ, թե արդյոք Հայաստանի ռազմական և քաղաքական իշխանությունների միջև անջրպետ կա՞, թե ոչ: Այս մասին Tert.am-ի հետ զրույցում ասաց Մոսկվայի տնտեսագիտական բարձրագույն դպրոցի պրոֆեսոր, փիլիսոփայական գիտությունների դոկտոր Օլեգ Մատվեյչևը:

«Ադրբեջանի իշխանությունները կարծում են, որ ցանկացած երկրում հեղափոխությունից հետո պետությունը թուլանում է: Ենթադրում եմ, որ Ադրբեջանի զինված ուժերի կարծիքով` Հայաստանի կառավարումը, հանձնարարականներ տալն անորոշության մեջ է, որ ռազմական ու քաղաքական իշխանության մեջ անջրպետ կա և դրա համար փորձում են շոշափել, թե ինչ վիճակում է երկիրը»,- ասաց Օ. Մատվեյչևը:

Նա նշեց, որ Ուկրաինայի և այլ պետությունների օրինակով աշխարհն ականատես է եղել, որ հեղափոխություններից հետո պետական ապարատի աշխատանքը դանդաղում է, որովհետև ներգրավվում են նոր մարդիկ, ովքեր դեռևս չեն տիրապետում իրավիճակին:

 

«Ադրբեջանը շարունակելու է հետապնդել իր տեսակետը, որ դա իրենց հողն է, ու իրենք հետ են վերադարձնելու: Քանի դեռ նրանք այս կարծիքին են, Հայաստանը չպետք է կորցնի զգոնությունը, պետք է զգույշ մնա»,- ասաց Օլեգ Մատվեյչևը:

Հարցին՝ ինչպիսի՞ն պետք է լինի Մոսկվայի, ՀԱՊԿ-ի արձագանքը Հայաստանի սահմանին տեղի ունեցած միջադեպի առթիվ, քաղաքագետն ասաց, որ պարտադիր չէ, որ այդ արձագանքը լինի հրապարակային:

«Արձագանքը կա, լինելու է, հարցն այն է, որ այն լինում է կա՛մ հրապարակային, կա՛մ դիվանագիտական աղբյուրներով: Սրանք տարբեր երևույթներ են: Դիվանագետներին սովորեցնում են, որ դիվանագիտության մեծ մասը՝ 90 տոկոսը, տեսանելի չեն, կուլիսային են: Եթե հրապարակային մի բան ասվի, ապա մարդը դառնում է այդ տեսակետի  պատանդը: Ուստի շատ բաներ արվում են ոչ հրապարակային, որպեսզի մանևրելու տեղ մնա»,- շեշտեց նա:

Հարցին՝ Ղարաբաղի հարցում Մոսկվան ինչի՞ միջև է ուզում մանևրել, ի՞նչն է խանգարում հրապարակային հայտնել տեսակետը, Մատվեյչևն ասաց, որ կդժվարանա պատասխանել