«Մոգական» 606 առարկայի վերադարձին մշակույթի նախարարությունը սպասում է ամեն օր ու ժամ. «Փաստ»

«Փաստ» օրաթերթը գրում է.

Մշակույթի նախարար Լիլիթ Մակունցը պաշտոնը ստանձնելուց հետո, որպես գերատեսչության առջև ծառացած կարևորագույն խնդիրներից մեկը, նշել էր պատկերասրահի կտավներն իրենց իրական հասցեատիրոջը վերադարձնելը:

Հիշեցնենք, որ տարիներ առաջ, իբրև Հայաստանի ազգային պատկերասրահի ֆոնդերը թեթևացնելու և գերատեսչությունների պատերը «զարդարելու» պատրվակով, այդ օրերի կառավարությունը որոշում է կայացրել յուրաքանչյուր նախարարությանը 10– ական նկար տրամադրել: Բայց տարիների ընթացքում, գերատեսչություններն իրար միանալու, իրարից բաժանվելու, գույք միացնելու, գույքն իրար մեջ բաժանելու, ինչպես նաև տեղից տեղ տեղափոխվելու ընթացքում դրանց պատկանելու վայրերն ու հասցեատերերը փոխվել են: Այս ընթացքում փոխվել են նաև կառավարություններ, նախարարներ, ինչպես նաև մոտեցումներ: Ու հիմա, երբ նոր իշխանությունները վերջապես որոշել են կտավների «հետևից» գնալ, աջ ու ձախ սկսել են խոսակցություններ շրջանառվել, թե դրանք վաղուց մեջ–մեջ են արված և որ այլևս ոչ մի կտավ էլ չկա: Այս թեմայով նույնիսկ անուններ են շրջանառվում, բայց ինչպես ասում են՝ իրավապահների գործը թողնենք իրենց, մենք զբաղվենք մեր գործով:

Եվ այսպես, նշված հարցի մասին առաջին ձեռքից ինֆորմացիա ստանալու համար «Փաստը» դիմեց մշակույթի նախարարությանը՝ պարզելու, թե Հայաստանի ազգային պատկերասրահին պատկանող կտավներն այս ընթացքում վերադարձվե՞լ են, թե՞ ոչ: Հետաքրքիր էր, թե ո՞ր նախարարություններն են խախտել ժամկետները և, վերջապես, պարզելու համար, թե հետ բերված կտավներից որոնք են բնօրինակներ, արդյո՞ք փորձաքննություն իրականացվելու է, թե ոչ: 

Նախարարությունից մեր հարցմանն ի պատասխան փոխանցեցին, որ իրենք կարող են տվյալներ հրապարակել միայն ՀՀ մշակույթի նախարարի 2011 թ հունիսի 3–ի N 292–Ա հրամանով սահմանված կարգի պահանջներին համապատասխան ՀՀ մշակույթի նախարարության ենթակայության թանգարաններից ժամանակավոր պահպանության հանձնված և ժամկետի խախտմամբ չվերադարձված թանգարանային առարկաների վերաբերյալ: 

«Դրանք հիմնականում կերպարվեստի նմուշներ են, մեծ մասամբ «Հայաստանի ազգային պատկերասրահ» ՊՈԱԿ–ից, ինչպես նաև նախկին «Ցուցահանդեսային կենտրոն» ՊՈԱԿ–ից, որը միացել է պատկերասրահին, «Ժամանակակից արվեստի թանգարան» ՀՈԱԿ–ից, որի ֆոնդերը տնօրինում է նախարարությունը: Պահպանության ժամկետը լրացած թանգարանային առարկաները կազմակերպություններից վերադարձնելու վերաբերյալ գրություններն ուղարկվել են դեռևս ս.թ. մարտ–ապրիլ ամիսներին, ինչպես նաև ներկայում: Այժմ ընթացքի մեջ է տարբեր կազմակերպություններից (գերատեսչություններ, ընկերություններ, թանգարաններ) վերոնշյալ առարկաների վերադարձի գործընթացը»,– ասվում է պատասխանում:

Նախարարության պատասխանում նշված է նաև, որ ներկայում պահպանության ժամկետները լրացած 606 թանգարանային առարկա կա, որի թիվը յուրաքանչյուր օր կարող է նվազել: Ինչ վերաբերում է տարբեր տարիներին անհատների և կազմակերպությունների կողմից օրենքի խախտմամբ վերցված առարկաների մասին, նախարարությունից տեղեկացնում են, որ ցանկերը գտնվում են իրավապահ մարմինների տիրույթում:

«Վերադարձված թանգարանային առարկաները վերոնշյալ կարգի պահանջներին համապատասխան նույնականացվում են, անհրաժեշտության դեպքում կրկին ենթարկվում են փորձաքննության»,– ասվում է նախարարության պարզաբանման մեջ:

Շարունակությունը՝ «Փաստ» օրաթերթի այսօրվա համարում